ނައިޖީރިއާގެ މިސްކިތެއްގައި ހަމަލާދީ 11 މީހުން މަރާލައިފި

ނައިޖީރިއާގެ މިސްކިތެއްގައި އަމިއްލަ އަށް މަރުވެގެން ދިން ބޮމުގެ ހަމަލާއެއްގައި 11 މީހުން މަރުވެއްޖެ އެވެ.

ނައިޖީރިއާގެ އިރުއުތުރުގެ ބޯނޯ ސްޓޭޓްގެ އަވަށެއް ކަމަށްވާ ގަމްބޯރޫގެ މިސްކިތަކަށް ހަމަލާދީފައިވަނީ ފަތިސް ނަމާދުގެ ވަގުތުގައި ކަމަށް މަންޒަރު ދުށް ފަރާތްތަކާއި ހަވާލާދީ ރިޕޯޓްތައް ބުނެއެވެ.

ހަމަލާ ދިން މިސްކިތް ހިމެނޭ ބޯނޯ ސްޓޭޓަކީ، ނައިޖީރިއާ އަދި ކެމަރޫން ގުޅޭ ސަރަހައްދީ ރޮނގުގެ ކައިރި ސަރަހައްދެވެ. އެ ސަރަހައްދަކީ ނައިޖީރިއާގެ ހަތިޔާރު އެޅި ޖަމާއަތެއް ކަމަށްވާ ބޯކޯ ހަރާމުން މީގެ ކުރިން މިފަދަ ގިނަ ހަމަލާތަކެއް ދީފައިވާ ސަރަހައްދެކެވެ.

މަންޒަރު ދުށް ފަރާތްތަކާއި ހަވާލާދީ ރޮއިޓަރސް ނިއުސް އޭޖެންސީ އިން ބުނީ، ފަތިސް ނަމާދުގެ ވަގުތުގައި މިސްކިތުގެ ތެރެއިން ބާރު އަޑުފަށްގަނޑަކާއެކު ގޮވުމެއްގެ އަޑު އިވިގެންދިޔަ ކަމަށާއި، މިހަމަލާގައި މިސްކިތް ހަލާކުވެ، ގިނަ ގެއްލުންތަކެއް ލިބިފައިވާ ކަމަށެވެ.

އަދި ހަމަލާއަށް ގަޑިއިރުތަކެއް ފަހުން، މިސްކިތުގެ ތެރެއިން މަރުވެފައިވާ 11 މީހެއްގެ ހަށިގަނޑު ނެރެފައިވާ ކަމަށާއި، އަމިއްލަ އަށް މަރުވެގެން ހަމަލާ ދިން މީހާގެ ހަށިގަނޑާއެކު އެއަދަދު 12 އަށް އަރާ ކަމަށް ރޮއިޓަރސް އިން ރިޕޯޓްކޮށްފައިވެއެވެ.

މިހަމަލާގެ ޒިންމާ މިހާތަނަށް އެއްވެސް ފަރާތަކުން އުފުލާފައެއްނުވެއެވެ. އެހެންނަމަވެސް ހަމަލާ ދިން ސަރަހައްދާއި، ހަމަލާގެ ބާވަތުން މިއީ ބޯކޯ ހަރާމް ޖަމާއަތުގެ ހަމަލާއެއް ކަމަށް ބެލެވޭ ކަމަށް ރިޕޯޓްތައް ބުނެއެވެ.

ބޯކޯ ހަރާމް އަކީ 2009 ވަނަ އަހަރު ނައިޖީރިއާގެ އިރުއުތުރުގައި އުފެދުނު ހަތިޔާރުއެޅި ހަނގުރާމަވެރިންގެ ޖަމާއަތެކެވެ. "ހުޅަނގުގެ ތައުލީމް ހަރާމް" ކަމަށް ބުނެ އުފެއްދި ހައްދުފަހަނައަޅާފައިވާ އެޖަމާއަތުގެ ހަމަލާތައް ގިނަކޮށް، އެމީހުންގެ ހަރަކާތްތައް ފުޅާ ވެގެންދިޔައިރު، ބޯކޯ ހަރާމް އާ ގުޅިގެން އުފެދުނު ކުރިމަތިލުންތަކުގައި މިހާތަނަށް 20 ހާހެއްހާ މީހުން މަރުވެ، 2.6 މިލިއަނަށްވުރެ ގިނަ މީހުންގެ ގެދޮރު ގެއްލިފައިވެއެވެ.

އެޖަމާއަތުން ވަގަށްނަގައި، ރަހީނުކޮށްގެން ގެންގުޅުނު 700 އަށްވުރެ ގިނަ މީހުން މިދިޔަ ހަފްތާގެ ތެރޭގައި ސަލާމަތްވެފައިވެއެވެ. ބޯކޯ ހަރާމް އިން ނައިޖީރިއާގައި ބަންދު ކޮށްގެން ގެންގުޅެނިކޮށް ފިލި މީހުންގެ ތެރޭގައި ދަނޑުވެރިންނާއި، މަސްވެރިން އަދި އެފަރާތްތަކުގެ އާއިލާ ހިމެނޭ ކަމަށް ނައިޖީރިއާގެ އަސްކަރިއްޔާ އިން މައުލޫމަތު ދެއެވެ.

ބޯކޯ ހަރާމްގެ އެންމެ ބާރުގަދަ ދުވަސްވަރު، ލޭކް ޗާޑް ސަރަހައްދުގައި ބޮޑެތި ވާދީތަކުގެ ކޮންޓްރޯލް ހޯދާފައިވެއެވެ. އެހެންނަމަވެސް އަވަށްޓެރި ޗާޑް، ކެމަރޫން އަދި ނައިޖަރގެ އެހީތެރިކަމާއެކު ނައިޖީރިއާގެ އަސްކަރިއްޔާ އިން ހިންގި ބޯކޯ ހަރާމް އާ ދެކޮޅަށް ކުރި ހަނގުރާމާގައި، އެޖަމާއަތުގެ ބާރު ކަނޑުވާލާ، ނައިޖީރިއާގެ އިރުއުތުރުގެ ގިނަ ޕްރޮވިންސްތަކުން ހަނގުރާމަވެރިން ފައްސާލާފައިވެއެވެ.

ބައިނަލްއަޤްވާމީ ކޯލީޝަންގެ އަސްކަރީ އޮޕަރޭޝަންތަކުގެ ސަބަބުން ބޯކޯ ހަރާމް ހަރަކާތްތައް ބަލިކަށިވިނަމަވެސް، އެސަރަހައްދުގައި ދޭތެރެދޭތެރެއިން އަމިއްލަ އަށް މަރުވެގެން ހަމަލާތައް ދީފައިވެއެވެ.

އެގޮތުން، މިދިޔަ ޑިސެމްބަރު މަހުގެ ކުރީކޮޅު ނައިޖީރިއާގެ ބިއޫ ސަހަރުގެ ބާޒާރެއްގައި އަމިއްލަ އަށް މަރުވެގެން ދެމީހަކު ދިން ބޮމުގެ ހަމަލާއެއްގައި 17 މީހުން މަރާލާފައިވެއެވެ.

އެހަމަލާ ދީފައިވަނީ، މޫބީގެ މިސްކިތެއްގައި ފުރާވަރުގެ ކުއްޖަކު އަމިއްލަ އަށް މަރުވެގެން ދިން ބޮމުގެ ހަމަލާއެއްގައި 50 މީހަކު މަރާލިތާ ދެހަފްތާވެސް ނުވަނީހެވެ.