ޕީޖީގެ ސަބަބުން ޝަރީއަތުގައި އިންސާފެއް ނެތް، ދިފާއުވުމަށް ވެސް ފުރުސަތެއް ނެތް: ފާރިސްގެ ވަކީލުން
3 ޖެނުއަރީ 2018 | ބުދަ 14:02ޕްރޮސިކިއުޓަރ ޖެނެރަލްގެ އަމަލުފުޅުތައް ހުރީ އިންސާފުވެރި ޝަރީއަތަކަށް ހުރަސް އެޅޭ ގޮތަށް
ދިއްގަރުު ދާއިރާގެ މެމްބަރު އަހުމަދު ފާރިސް މައުމޫން: ޕީޖީން ޤާނޫނާ ހިލާފަށް އެތަށް ކަމެއް ކުރާ ކަމަށް ވަކީލުން ތުހުމަތުކުރެއްވި
ދިއްގަރު ދާއިރާގެ މެމްބަރު އަހުމަދު ފާރިސް މައުމޫންގެ މައްޗަށް ދައުލަތުން އުފުލާފައިވާ ދައުވާގައި ޕްރޮސިކިއުޓަރ ޖެނެރަލްގެ ފަރާތުން އަމަލުކުރައްވާ ގޮތުގެ ސަބަބުން އިންސާފަށް ނުރައްކާވާ ކަމަށާއި، މައްސަލައިގައި ދިފާއުވުމަށް ވެސް އެކަށީގެންވާ ފުރުސަތު ނުދޭ ކަމަށް ޤާނޫނީ ވަކީލުން ވިދާޅުވެއްޖެއެވެ.
ފާރިސް މައުމޫންގެ މައްޗަށް ދައުލަތުން އުފުލާފައިވާ ދައުވާގެ ޝަރީއަތަށް ފަހު، އެންދެރިމާ ގޭގައި ނޫސްވެރިންނަށް މައުލޫމާތު ދެއްވަމުން ފާރިސް މައުމޫންގެ ޤާނޫނީ ވަކީލް މައުމޫން ހަމީދު ވިދާޅުވީ ޕްރޮސިކިއުޓަރ ޖެނެރަލްގެ އަމަލުތައް ހުރި ގޮތުން އިންސާފުވެރި ޝަރީއަތަކަށް ވަރަށް ބޮޑު ނުރައްކަލެއް ކުރިމަތިވެފައި ވާކަމަށެވެ. އަދި އަހުމަދު ފާރިސް މައުމޫނަށް ލިބިގެންވާ އިންސާފުވެރި ޝަރީއަތުގެ ހައްޤަށް ވަރަށް ބޮޑު ނުރައްކަލެއް ޕްރޮސިކިއުޓަރ ޖެނެރަލް ކުރިމަތިކުރަމުންގެންދާ ކަމަށް މައުމޫން ހަމީދު ވިދާޅުވި އެވެ.
"އިންސާފުވެރި ޝަރީއަތަކަށް ހުރަސް އޭޅޭ ގޮތަށް ޕްރޮސިކިއުޓަރ ޖެނެރަލްގެ އަމަލުފުޅުތައް ހުންނެވީ. އެންމެ ފުރަތަމަ މިއީ އުފައްދާފައިވާ މައްސަލައެއް އެންމެންނަށް އެނގޭ ގޮތަށް ފުލުހުން އެކަށީގެންވާ ގޮތަކަށް ތަހުޤީޤް ނުކުރަނީސް އެ އޮތީ ދައުވާ އުފުލައްވާފައި. ފާރިސް ހައްޔަރުކުރުމަށް މަސައްކަތްކުރީ ޤާނޫނު އޮޅުއްވާލައްވައިގެން," މައުމޫން ހަމީދު ވިދާޅުވިއެވެ.
މައުމޫން ހަމީދު ވިދާޅުވީ ފާރިސް މައުމޫންގެ މައްޗަށް ދައުލަތުން އުފުލާފައިވާ ދައުވާގައި ޤާނޫނުގައި ބުނާ ތަފްސީލްތައް ވެސް ހިމަނާފައި ނުވާ ކަމަށެވެ. އެގޮތުން ފާރިސް މައުމޫން ރިޝްވަތު ދެއްވި ދުވަހަކާއި، ތަނާއި، ގަޑިއެއް ދައުވާގައި ބަޔާންކޮށްފައިނުވާކަމަށް މައުމޫން ހަމީދު ފާހަގަކުރެއްވި އެވެ. އަދި ތަފްސީލްތައް ދައުވާގައި ބަޔާންކޮށްފައި ނެތުމުން ދިފާއުވުމަށް ހުރަސްއެޅިގެންދާ ކަމަށް މައުމޫން ހަމީދު ވިދާޅުވިއެވެ.
އޭނާ ވިދާޅުވީ ތަފްސީލްތައް ދައުވާގައި ބަޔާންކޮށްފައި ނެތުމުން ޕްރޮސިކިއުޓަރ ނެޖެރަލްގެ ހިތްޕުޅަށް އަރާހާ ހުރިހާ ކަމަކަށް ދިފާއުވުމަށް ތައްޔާރުކުރަންޖެހޭ ކަމަށެވެ. ނަމަވެސް އެގޮތަށް ކަންތައްތައް ކުރުމުން އެއީ އިންސާނުންނަށް ކުޅަދާނެވެގެން ވާނެ ކަމެއް ނޫން ކަމަށް މައުމޫން ހަމީދު ވިދާޅުވިއެވެ.
"2000 އެތައް ގަޑިއިރެއްގެ ކޮންމެ މިނެޓެއްގައި، ކޮންމެ ތަނެއްގައި ތިމަންނަ ހުރީ މިވެނިކަމެއް ކުރަން ކަމަށް ފާރިސް އެބަޖެހޭ ވިދާޅުވާން. އެހެން ނޫނީ ނެތް އެލިބޭ ޑިފެންސެއް ހުށައެޅޭކަށް." ޤާނޫނީ ވަކީލް ވިދާޅުވިއެވެ.
ވަކީލް އިބްރާހިމް ޝަމީލް ވިދާޅުވީ ފާރިސްގެ ފަރާތުން 21 ހުށައެޅުމެއް ކޯޓަށް ހުށައަޅާފައިވާ ކަމަށެވެ. އަދި ބުދަ ދުވަހުގެ ޝަރީއަތުގައި ތިން ހުށައެޅުމެއް ކޯޓަށް ހުށައަޅާފައިވާނެ ކަމަށް އޭނާ ވިދާޅުވިއެވެ. އޭގެ ތެރެއިން ބައެއް ހުށައެޅުންތަކުގައި މައްސަލައަކީ ޝަރީއަތްކުރުމެއް ނެތި ބާތިލްކުރަންޖެހޭ ދައުވާއެއް ކަމަށް ކަނޑައަޅައިދިނުމަށް ހުށައަޅާފައިވާނެ ކަމަށް ޝާމިލް ވިދާޅުވިއެވެ.
"އަޅުގަނޑުމެން ގަބޫލުކުރާ ގޮތުގައި މި މައްސަލައަކީ ބާތިލްކުރެވެންޖެހޭނެ މައްސަލައެއް،" ވަކީލް ވިދާޅުވިއެވެ.
