ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫންގެ ޝަރީއަތާ ގުޅޭ ގޮތުން ރާއްޖެޓީވީ އިން ދެއްކި ރިޕޯޓާއެކު، ފާރިސްގެ މައްޗަށް އުފުލާފައިވާ ދައުވާގެ އަސާސްތައް ނަފީވެފައިވާ ކަމަށް އޭނާގެ ވަކީލުން ބުނެފިއެވެ.

ފާރިސްގެ މައްޗަށް ރިޝްވަތު ދިނުމުގެ ދައުވާކޮށްފައި ވަނީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރުގެ މައްސަލައިގައި ސޮއިކުރުމަށް މަޖިލިސް މެންބަރަކަށް ރިޝްވަތު ދެއްވި ކަމަށް ބުނެއެވެ. ދައުވާގައިވާ ގޮތުގައި، ފާރިސް ދެއްވި ރިޝްވަތުގެ ފައިސާ އެ މެންބަރާއި ހަވާލުކުރީ ޖުމްހޫރީ ޕާޓީގެ އެކްޓިވިސްޓެއް ކަމަށްވާ އަހުމަދު ޝާފިއުއެވެ.

ނޮވެމްބަރު 9 ވަނަ ދުވަހުގެ ރޭ ރާއްޖެޓީވީ އިން ދެއްކި ރިޕޯޓުގައި ހިމެނެނީ ޝާފިއުގެ އިންޓަވިއުއެކެވެ. ރާއްޖެޓީވީ އަށް ދިން އެ އިންޓަވިއުގައި ޝާފިއު ވަނީ، ރިޝްވަތުގެ ފައިސާ މެންބަރަކަށް ދިން ކަމަށް ކުރާ ތުހުމަތު ދޮގުކޮށްފައެވެ. އަދި ފާރިސް ވިދާޅުވެގެން އެއްވެސް މެންބަރަކަށް ފައިސާ ދީފައިނުވާނެ ކަމަށާއި، އެފަދަ ފައިސާއެއް ފާރިސް އޭނާއާ ހަވާލުކޮށްފައި ވެސް ނުވާ ކަމަށް ޝާފިއު ބުނެފައިވެއެވެ.

މީގެ އިތުރުން، މި މައްސަލައާ ގުޅިގެން ފާރިސްއާ ދެކޮޅަށް ހެކިބަސް ދިނުމަށާއި ބަޔާން ދިނުމަށް ބަޔަކު މީހުން މަޖުބޫރުކޮށް، ބިރު ދައްކަމުންދާ ކަމަށް ވެސް ޝާފިއު ބުނެފައި ވެއެވެ.

ފާރިސްގެ މައްޗަށް ހިންގާ ޝަރީއަތުގައި ބުދަ ދުވަހު ބޭއްވި އަޑުއެހުމުގައި އޭނާގެ ގާނޫނީ ވަކީލު މައުމޫން ހަމީދު ވިދާޅުވީ ފާރިސްގެ މައްޗަށް ދައުލަތުން ކޮށްފައިވާ ދައުވާގެ އަސާސްތައް ބިނާވެފައި ވަނީ ޝާފިއު ހިންގި ކަމަށް ބުނާ އަމަލުތަކަކަށް ކަމަށެވެ. މައުމޫން ވިދާޅުވީ ރާއްޖެޓީވީގެ ރިޕޯޓާ އެކު ދައުވާގެ ހުރިހާ އަސާސްތަކެއް ނަފީވެއްޖެ ކަމަށެވެ.

މައުމޫން ވިދާޅުވި ގޮތުގައި، ރާއްޖެޓީވީގެ ރިޕޯޓަކީ މި މައްސަލައިގައި ހާމަވި އާ ހެއްކެކެވެ. ރާއްޖެޓީވީ އިން ދެއްކި ރިޕޯޓާއެކު ދައުލަތުން ހެކި އުފައްދާފައިވާކަން ހާމަވާކަން ފާހަގަކޮށް ފާރިސްގެ ފަރާތުން ވަނީ އިތުރަށް ދައުވާ ކުރިއަށް ނުގެންދެވޭނެ ކަމަށް ކަނޑައަޅައި ދިނުމަށް އެދިފައެވެ.

މީގެ އިތުރުން، ފާރިސްއާ ދެކޮޅަށް ހެކިބަސް ދިނުމަށާއި ބަޔާން ދިނުމަށް ޝާފިއުއަށް މަޖުބޫރުކޮށް ބިރުދައްކަމުންދާ ކަމަށް ރާއްޖެޓީވީގެ ރިޕޯޓުގައި އޭނާ ބުނެފައިވާކަން މައުމޫން ފާހަގަކުރެއްވިއެވެ. މައުމޫން ވިދާޅުވީ ޝާފިއުއަށް ބިރުދައްކައި ހެއްކަށް ނުފޫޒު ފޯރުވަން މަސައްކަތް ކުރި މައްސަލަ ފުލުހުންގެ އިދާރާއަށް ހުށަހެޅުމުން، ތަހުގީގު ނުކުރަން ނިންމާފައިވާ ކަމަށް ބުނެ ލިޔުމުން ފުލުހުން ޖަވާބުދީފައިވާ ކަމަށެވެ. އެހެންކަމުން، އެ މައްސަލަ ބެލުމަށް ފުލުހުންގެ މައްޗަށް އަމުރުކޮށް ދިނުމަށް އެދި ޕްރޮސެކިއުޓަރ ޖެނަރަލްގެ އޮފީހަށް ހުށަހަޅާފައިވާކަން އޭނާ ފާހަގަކުރެއްވިއެވެ

ފާރިސްގެ ފަރާތުން ހުށަހެޅި ނުކުތާތަކާ ގުޅިގެން ދައުލަތުގެ ވަކީލު ވިދާޅުވީ ރާއްޖެޓީވީ އިން ދެއްކި ރިޕޯޓެއްގައި ދައުލަތުގެ ފަރާތުން މި މައްސަލައިގެ ހެއްކެއްގެ ގޮތުގައި ހުށަހަޅާފައިވާ ޝާފިއުއަށް ބިރުދައްކަމުންދާ ކަމަށް ބުނާ މައްސަލަ ޕްރޮސެކިއުޓަރ ޖެނެރަލްގެ އޮފީހަށް ފާރިސްގެ ފަރާތުން ހުށަހެޅި ކަމަށެވެ. އަދި އެ މައްސަލަ ބަލަމުންދާ ކަމަށް ބުނެ ފުލުހުން ލިޔުމުން ޖަވާބުދީފައިވާ ކަމަށް ދައުލަތުގެ ވަކީލު ވިދާޅުވިއެވެ.

ފާރިސްގެ ފަރާތުން އެ މައްސަލަ ހުށަހެޅުމުން ބަލަމުންނުދާ ކަމަށް ޖަވާބުދާފައިވީ ނަމަވެސް، ޕްރޮސެކިއުޓަރ ޖެނަރަލް ހުށަހެޅުއްވުމުން މައްސަލަ ބަލަމުންދާ ކަމަށް ޖަވާބުދީފައިވާކަން ފާހަގަކުރައްވައި މައުމޫން ހަމީދު ވިދާޅުވީ މި މައްސަލައިގައި ދައުލަތުން ސާބިތުކޮށްދޭން މަސައްކަތް ކުރަނީ ޝާފިއު ހިންގި ކަމަށް ބުނާ އަމަލެއް ކަމަށެވެ.

ޝާފިއުއަށް ނުފޫޒު ފޯރުވަން މަސައްކަތް ކޮށްފައިވަނީ، ދައުލަތުން ސިއްރު ހެއްކެއްގެ ގޮތުގައި ހުށަހަޅާފައިވާ، ރިޝްވަތު ނެންގެވި މެންބަރުކަން މައުމޫން ފާހަގަކުރެއްވިއެވެ. މައުމޫން ވިދާޅުވީ އިންސާފު ލާޒިމުކުރާ ގޮތަކީ، ޝާފިއުއަށް ނުފޫޒު ފޯރުވަން މަސައްކަތް ކުރި މައްސަލަ ތަހުގީގުކޮށް ނިމެންދެން މި ދައުވާގެ ޝަރީއަތް ހުއްޓާލުން ކަމަށެވެ.

މި ވާހަކަތަކާ ގުޅިގެން މައްސަލަ ބައްލަވާ ގާޒީ އަލީ އާދަމް ވިދާޅުވީ ރާއްޖެޓީވީގެ ރިޕޯޓް ހެކީގެ ގޮތުގައި ހުށަހެޅިދާނެ ކަމަށެވެ. އަދި އެ މަރުހަލާގައި މިކަމާ ގުޅޭ ގޮތުން ވާހަކަ ދެއްކުމުގެ ފުރުސަތު އޮންނާނެ ކަމަށް ގާޒީ ވިދާޅުވިއެވެ.

މި މައްސަލައިގެ އަޑުއެހުމެއް ދެން އޮންނާނީ މިމަހުގެ 9 ވަނަ ދުވަހުގެ ހެނދުނު 10:00 ގައެވެ.