ތުރުކީގެ އަސްކަރިއްޔާއަށް 40،000އަށް ވުރެ ގިނަ ސިފައިން ނަގަނީ
3 ޖެނުއަރީ 2018 | ބުދަ 06:00ނާކާމިޔާބު ކޮށްލި ބަޣާވާތަށްފަހު އެތައް ހާސް ސިފައިންވަނީ ވަކިކޮށްފައި
ނާކާމިޔާބު ކޮށްލި ބަޣާވާތަށް ފަހު އެތައް ހާސް ސިފައިންވަނީ ވަޒީފާއިން ވަކިކޮށްފައި
ތުރުކީއަށް 2016 ވަނަ އަހަރު ގެންނަން އުޅުނު ބަޣާވާތާގުޅިގެން އަސްކަރިއްޔާއިން އެތައް ހާސް ސިފައިންނެއް ވަކި ކުރުމަށް ފަހު މި އަހަރު އިތުރު 43،000 ސިފައިން އަސްކަރިއްޔާއަށް ވައްދާނެ ކަމަށް އެ ގައުމުގެ ދައުލަތުގެ މީޑިއާއިން ބުނެފިއެވެ.
ނަން ހާމަނުކުރަން ނޭދޭ އަސްކަރިއްޔާގެ އޮފިޝަލަކު ވިދާޅުވި ކަމަށް އަނަދޮލޫ އޭޖެންސީން ބުނެފައިވަނީ އަލަށް ވެއްދޭ ފަރާތްތަކުގެ ތެރޭގައި 3،755 އޮފިސަރުންނާއި 5،375ނޮން ކޮމިޝަންޑް ސްޓާފް ހިމެނެއެވެ.
އެ ރިޕޯޓްގައިވާ ގޮތުން 13،213 ސްޕެޝަލައިޒްޑް ސަރޖަންޓުން އަދި 20،595 ކޮންޓްރެކްޓް އޮފިސަރުން ވެސް ނަގާނެއެވެ.
ތުރުކީއިން ތުހުމަތު ކުރާގޮތުގައި ބަޣާވާތުގެ އަޑީގައި ހުންނެވީ އެމެރިކާއަށް އަރުވާލެއްވިގެން ދިރިއުޅުއްވަމުން ގެންދަވާ ތުރުކީގެ ލީޑަރު ފަތުހުﷲ ގޫލެން އެވެ.
ނާކާމިޔާބުވި ބަޣާވާތުގައި 300 މީހުން މަރުވެފައިވާއިރު ބަޣާވާތަށް ފަހު އަސްކަރިއްޔާއިންނާއި ދައުލަތުގެ އެކި އިދާރާތަކުން އެތައް ހާސް މުވައްޒަފުންނެއް ވަޒީފާތަކުން ވަކިކުރެވިގެންދިޔައެވެ.
ތުރުކީގެ އިދާރާތަކުން ވަނީ ޖުލައި 15 ވަނަ ދުވަހަކީ ތުރުކީގެ ޑިމޮކްރަސީއަށް ނަސްރު ލިބުނުދުވަހެއްގެ ގޮތުގައި ފާހަގަކޮށް" ޑިމޮކްރަސީއާ އެއްބައިވަންތަކަމުގެ ދުވަހު"ގެ ގޮތުގައި އެ ދުވަސް ފާހަގަކުރުމަށް ހަމަޖައްސާފައެވެ.
ނާކާމިޔާބު ބަޣާވާތަށް ފަހު ތުރުކީއިން 50،000 މީހުން ހައްޔަރުކޮށް އޭގެ ތިންގުނަ މީހުން ވަޒީފާތަކުން ވަނީ ވަކިކޮށްފައެވެ. މިއީ އެގައުމުގެ ތާރީޚްގައި މިހާ ގިނަ އަދަދެއްގެ ބަޔަކު އެއްފަހަރާ ވަޒީފާތަކުން ސޮއިކުރި ފުރަތަމަ ފަހަރެވެ.
ރައީސް އޮރްދޮޣާން ވަނީ މިދިޔަ އަހަރުގެ ކުރީކޮޅު ނެގި ފެން ނުފެންނަ ވޯޓް ކާމިޔާބް ކުރައްވައި ބާރުތައް ވަރުގަދަ ކުރައްވާފައެވެ.
