ހުވަދު އަތޮޅުގެ ބައެއް ސްކޫލްތަކަށް ޕްރިންސިޕަލުން ހޯދަނީ، ޓީޗަރުން އަދިވެސް ހަމަނުވޭ!
3 ޖެނުއަރީ 2018 | ބުދަ 03:01ގިނަ އަދަދެއްގެ ޕްރިންސިޕަލުންނާއި ޓީޗަރުން ހޯދަން އިއުލާންކޮށްފައިވާއިރު، ސްކޫލްތައް ހުޅުވެން ވަނީ ކައިރިވެފައި
މާލޭގެ ސްކޫލެއްގައި ޓީޗަރަކު ފިލާވަޅު ނަގައިދެނީ
ހުވަދު އަތޮޅުގެ ބައެއް ސްކޫލްތަކަށް ޕްރިންސިޕަލުން ހޯދުމަށް އެޑިއުކޭޝަން މިނިސްޓްރީއިން އިއުލާން ކޮށްފިއެވެ.
އަންގާރަ ދުވަހު އެޑިއުކޭޝަން މިނިސްޓްރީއިން ޕްރިންސިޕަލުން ހޯދަން އިއުލާން ކޮށްފައިވާ ސްކޫލްތަކަކީ؛ ގއ ނިލަންދޫ ސްކޫލް، ގއ ކޮނޑޭ ސްކޫލް، ގއ ކަނޑުހުޅުދޫ ސްކޫލް، ގދ ފިޔޯރީ ސްކޫލް އަދި ގދ ނަޑައްލާ ސްކޫލެވެ. އައު އަހަރުގެ ޗުއްޓީއަށް އޮފީސްތައް ބަންދުވުމުގެ ކުރިންވެސް ބައެއް ސްކޫލްތަކަށް ޕްރިންސިޕަލުން ހޯދަން އެޑިއުކޭޝަނުން އިއުލާންކުރިއެވެ. އެ ސްކޫލްތަކަކީ ލ ދަނބިދޫ ސްކޫލް، ލ އިސްދޫ ސްކޫލް، ލ ކުނަހަންދޫ ސްކޫލް، ތ އޮމަދޫ ސްކޫލް، ތ މަޑިފުށީ ސްކޫލް، ތ އަތޮޅު މަދަރުސާ، ތ ބުރުނީ ސްކޫލް، އދ މަންދޫ ސްކޫލް، ދ ހުޅުދެލި ސްކޫލް އަދި ދ މާއެނބޫދޫ ސްކޫލެވެ. މީގެ އިތުރުން ވެސް ނިމިދިޔަ ޑިސެމްބަރު މަހު އެހެން ބައެއް ސްކޫލްތަކަށް ވެސް ޕްރިންސިޕަލުން ހޯދަން އިއުލާން ކޮށްފައިވާއިރު، އަދިވެސް ބައެއް ސްކޫލްތަކަށް ޓީޗަރުން ހަމައެއް ނުވެއެވެ.
އެގޮތުން ހޯމަ ދުވަހާއި އަންގާރަ ދުވަހު ވެސް ބައެއް ސްކޫލްތަކަށް ޓީޗަރުންނާއި ވަގުތީ ޓީޗަރުން ހޯދުމަށް އިއުލާން ކޮށްފައިވާއިރު، ޑިސެމްބަރު މަހު ޓީޗަރުން ހޯދުމަށް ކުރި އިއުލާންތަކަށް ލިބުނު ތަރުޙީބުގެ ތަފްޞީލެއް ނޭނގެއެވެ. ދިވެހި ސަރުކާރުގެ ގެޒެޓްގައި އެންމެ ފަހުން ކޮށްފައިވާ އިއުލާންތަކުގެ ތެރޭގައި ގިނައީ ޓީޗަރުން ހޯދުމަށް ކޮށްފައިވާ އިއުލާންތަކެވެ. ޓީޗަރުންގެ އިތުރުން ގިނަ އަދަދެއްގެ ސްކޫލްގެ އެހެނިހެން މަޤާމްތަކަށް މީހުން ހޯދަން އިއުލާން ކޮށްފައިވާއިރު، ދިރާސީ އައު އަހަރުގެ ކިޔެވުން ފެށޭއިރު، ސްކޫލްތައް ތައްޔާރުވެފައިވޭތޯ ބެލެނިވެރިން ގެންދަނީ ސުވާލު ކުރަމުންނެވެ.
އަދި މިކަމުގެ ތަފްޞީލު ހޯދުމަށް އަންގާރަ ދުވަހު އެޑިއުކޭޝަން މިނިސްޓްރީގެ ބަހެއް ހޯދުމަށް ކުރި މަސައްކަތް ވަނީ ކާމިޔާބު ނުވެފައެވެ.
