މުސްލިމުންނާއި ދެކޮޅަށް ޓްވީޓްކުރި މަޖިލިސް މެމްބަރެއްގެ މައްސަލަ ބަލަނީ

ޖަރުމަންވިލާތުގެ ޤާނޫން ހަދާ މަޖިލީހުގެ މެމްބަރަކު، މުސްލިމުންނާއި ދެކޮޅަށް ރުޅިވެރިކަން އުފެދޭފަދަ ޓްވީޓެއް ކުރެއްވި މައްސަލައެއް ޖަރުމަންވިލާތުގެ ފުލުހުން ބަލަން ފަށައިފިއެވެ.

ޖަރުމަންވިލާތުގެ ފުލުހުން ބަލަމުންދަނީ އެޤައުމުގެ ކަނާތުފިޔައިގެ އެފްޑީ ޕާޓީގެ ޑެޕިއުޓީ ލީޑަރު ބީޓްރިކްސް ވޮން ސްޓޯޗްގެ މައްސަލައެކެވެ. އޭނާ މުސްލިމުންނާއިމެދު މީހުންގެ މެދުގައި ރުޅިވެރިކަން އުފެދޭފަދަ ޓްވީޓެއް ކުރައްވާފައިވަނީ ޖަރުމަނުވިލާތުގެ ކޮލޯންގެ ފުލުހުން އާ އަހަރު ފާހަގަ ކުރުމަށް ޢަރަބި ބަހުން ކޮށްފައިވާ ޓްވީޓަކަށް ރައްދު ދެއްވަމުންނެވެ. ކޮލޯންގެ ފުލުހުން ވަނީ ޢަރަބި ބަހުގެ އިތުރުން އިނގިރޭސި ބަހާއި، ޖަރުމަން ބަހުގެ އިތުރުން ފަރަންސޭސީ ބަހުން ވެސް އެޓްވީޓްކޮށްފައެވެ.

ފުލުހުން އަންނަނީ އެމައްސަލައިގައި ނަފްރަތު އުފެއްދުމުގެ ކުށުގެ ދައުވާ އޭނާގެ މައްޗަށް ކުރާނީތޯ ބަލަމުންނެވެ.

މިޓްވީޓްގެ މައްސަލައިގައި ޓްވިޓަރއިން ވަނީ 12 ގަޑިއިރަށް އޭނާގެ ޓްވިޓަރ އެކައުންޓް ސަސްޕެންޑް ކޮށްފައެވެ. އަދި ޓްވިޓަރ އެކައުންޓް ސަސްޕެންޑް ކުރުމުން އޭނާގެ ފޭސްބުކް ޕޭޖްގައި ހަމަ އެވާހަކަތައް ޕޯސްޓް ކުރުމުން، ފޭސްބުކްއިން ވެސް އޭނާގެ ޕޯސްޓް ރިމޫވް ކޮށްފައިވެއެވެ.

ހަމަނުޖެހުން އުފައްދާ، މީހުންގެ މެދުގައި ދީނީ އަދި ނަސްލީ ރުޅިވެރިކަން އުފައްދާ ފަރާތްތަކާއި ދޭތެރޭ ހަރުކަށި ފިޔަވަޅު އެޅުމުގެ ޤާނޫނެއް ޖަރުމަންވިލާތުގައި ދާދިފަހުން ވަނީ ފާސްކޮށްފައެވެ. އަދި އެފަދަ ޕޯސްޓްތައް ރިމޫވް ނުކުރާ ސޯޝަލް މީޑިއާ ސައިޓްތައް ޖޫރިމަނާކުރަން ވެސް އެޤައުމުން ވަނީ ނިންމާފައެވެ.

ސްޓީޗް ނިސްބަތްވެވަޑައިގަންނަވާ ޕާޓީއިން ވަނީ އޭނާގެ އަމަލުތައް ދިފާޢުކޮށްފައެވެ.