ޝަރުއީ ދާއިރާ އަށް އިހްތިރާމް ކުޑަ ކުރުމުގެ މައްސަލައެއްގައި މިސްރުގެ ކުރީގެ ރައީސް މުހައްމަދު މުރްސީ އަށް ތިން އަހަރުގެ ޖަލު ހުކުމެއް އިއްވައިފި އެވެ.

މިސްރުގެ ކުރީގެ ރައީސް ހުސްނީ މުބާރަކްގެ ދިގު ވެރިކަމަށްފަހު، އެގައުމުގައި ޑިމޮކްރެޓިކް އުސޫލުން އިންތިޚާބުވި ފުރަތަމަ ރައީސް މުރްސީގެ ވެރިކަން ވައްޓާލާފައިވަނީ އެގައުމުގެ އަސްކަރިއްޔާ އިން 2013 ވަނަ އަހަރު ގެނައި ބަޣާވާތެއްގައެވެ.

2011 ވަނަ އަހަރު އެގައުމަށް ގެނައި އިންގިލާބަށްފަހު ހަތަރު އަހަރުގެ ދައުރަކަށް އިންތިޚާބުވި މުރްސީގެ ވެރިކަން ވައްޓާލިފަހުން މުރްސީ ހުންނަވަނީ ބަންދުގައެވެ.

މުރްސީގެ ވެރިކަމުގައި 2012 ވަނަ އަހަރު އެގައުމުގައި މުޒާހަރާ ކުރި ފަރާތްތަކަށް ހަރުކަށިކަން ދެއްކުމަށް ހިތްވަރުދިން ކަމަށް ބުނާ މައްސަލައެއްގައި މުރްސީ މިހާރުވެސް ދަނީ 20 އަހަރުގެ ޖަލު ހުކުމެއް ތަންފީޒް ކުރައްވަމުންނެވެ.

މީގެ އިތުރުން، މިސްރުގެ ސިއްރު މައުލޫމާތުތަކެއް ގަތަރާއި ހިއްސާކުރި ކަމަށް ބުނެ، އެގައުމުގެ ގައުމީ ސަލާމަތަށް ނުރައްކާވާ ފަދަ އަމަލެއް ހިންގިކަމުގެ މައްސަލައެއްގައި އޭނާގެ މައްޗަށް އިތުރު 25 އަހަރުގެ ޖަލު ހުކުމެއް އިއްވާފައިވާއިރު، އެ ހުކުމަށް އިސްތިއުނާފީ ކޯޓުން ވަނީ ތާއީދުކޮށްފައެވެ.

މިސްރުގެ ޝަރުއީ ދާއިރާ އަށް އިހްތިރާމް ކުޑަ ކުރުމުގެ މައްސަލާގައި ތިން އަހަރުގެ ޖަލު ހުކުމެއް އިއްވުމުގެ އިތުރުން، 2013 ވަނަ އަހަރު މުރްސީ ދެއްކެވި ވާހަކަފުޅަކާއި ގުޅޭ މައްސަލައެއްގައި 56 ހާސް އެމެރިކާ ޑޮލަރުން އޭނާ ޖޫރިމަނާ ކުރުމަށް އެގައުމުގެ ޖިނާއީ ކޯޓުން ހޮނިހިރު ދުވަހު ނިންމާފައިވެއެވެ.

މުރްސީގެ އިތުރުން ޝަރުއީ ދާއިރާ އަށް އިހްތިރާމް ކުޑަ ކުރުމުގެ މައްސަލާގައި އިތުރު 18 މީހެއްގެ މައްޗަށް ހޮނިހިރު ދުވަހު ހުކުމް އިއްވާފައިވެއެވެ. އޭގެ ތެރޭގައި މިސްރުގެ ސިޔާސީ ބްލޮގަރ އަލާ އަބްދުލް ފައްތާހް އަދި ބްރޯޑްކާސްޓަރ ތައުފީގް އޮކާޝާ ހިމެނެއެވެ.

މީގެ ތެރެއިން ފަސް މީހަކު، އެއް ހާސް ހަތް ސަތޭކަ އެމެރިކާ ޑޮލަރުން ޖޫރިމަނާ ކުރުމަށް ކޯޓުން ހުކުމް ކޮށްފައިވެއެވެ.

މުރްސީ ވަނީ އެގައުމުގެ ކޯޓުތަކަށް ދީފައިވާ ބާރުވެރިކަމާއިމެދު ސުވާލު އުފައްދާ، އެކަން ގަބޫލް ނުކުރައްވާނެ ކަމަށް ވިދާޅުވެފައެވެ. މީގެ އިތުރުން އޭނާގެ މައްޗަށް ކުރި ދައުވާގެ ޝަރީއަތުގެ ފުރަތަމަ އަޑު އެހުމުގައި މުރްސީ ވަނީ، އޭނާ ގަދަކަމުން ބަންދުކޮށްފައިވާ ކަމަށް ބުނެ އަޑުގަދަކުރައްވާފައެވެ.

އޭގެ ފަހުން، ޝަރީއަތުގެ އަޑުއެހުންތަކަށް ހުރަސް އެޅިޔަ ނުދިނުމަށް ކަމަށް ބުނެ، މުސްރީގެ ޝަރީއަތްތައް ކުރިއަށް ގެންދާއިރު އޭނާ އިންނަވަނީ، އަޑުބޭރުނުވާފަދަ ބިއްލޫރި ކޮށްޓެއްގެ ތެރޭގައެވެ.

މުރްސީގެ ވެރިކަން އެގައުމުގެ އަސްކަރިއްޔާ އިން ވައްޓާލާފައިވަނީ، މުރްސީ ވެރިކަމަށް ވަޑައިގެންނެވިތާ އަހަރެއްހާ ދުވަސް ފަހުން އެގައުމުގައި ބޭއްވި ބޮޑު މުޒާހަރާތަކަށް ފަހުއެވެ.

މުރްސީގެ ސަރުކާރާއި ދެކޮޅަށް މުޒާހަރާ ކުރި ފަރާތްތަކާއި ދެކޮޅަށް ބާރުގެ ބޭނުން ކުރެއްވި ކަމުގެ ތުހުމަތު އޭނާގެ މައްޗަށް ކޮށްފައިވެއެވެ.

މުސްރީގެ ވެރިކަން ވައްޓާލިފަހުން މިސްރުގެ ސަރުކާރާއި ކަމާއިބެހޭ އިދާރާތަކުން ދަނީ މުރްސީގެ ސަޕޯޓަރުންނާއި ދެކޮޅަށް ތަފާތު ފިޔަވަޅުތައް އަޅަމުންނެވެ. މީގެ އިތުރުން މުރްސީ ނިސްބަތްވާ މުސްލިމް ބްރަދަހުޑް ޕާޓީ އަކީ ޓެރަރިސްޓް ޖަމާއަތެއްގެ ގޮތުގައި ކަނޑައަޅައި، އެޕާޓީ މިސްރުގައި ވަނީ މަނާކޮށްފައެވެ.