ފުވައްމުލަކު ތުނޑި ސަރަހައްދުން މިނިކަށިތަކެއް ފެނިއްޖެ

ފުވައްމުލަކު ތުނޑި ސަރަހައްދުން މިނިކަށިތަކެއް ފެނިއްޖެއެވެ.

ފުލުހުން ބުނީ މިނިކަށިތަކެއް ފެނިގެން ރިޕޯޓްކޮށްފައި ވަނީ ބުރާސްފަތި ދުވަހުގެ ހަވީރު 04:50 ހާއިރު ކަމަށެވެ. އަދި އެ މިނިކަށިތަކުގެ ސާމްޕަލް ނަގާފައިވާ ކަމަށް ފުލުހުންގެ މީޑިއާ އޮފިޝަލް ވަނީ ރާއްޖެއެމްވީއަށް ވިދާޅުވެފައެވެ.

ފުވައްމުލަކު ސިޓީ ކައުންސިލްގެ އިންފޮމޭޝަން އޮފިސަރ ހުސައިން ނާސިފް ވިދާޅުވީ މި ދުވަސްވަރާ ދިމާކޮށް މިދިޔަ އަހަރު ވެސް އެސަރަހައްދުން މިނިކަށިތަކެއް ފެނުނު ކަމަށެވެ. މިނިކަށިތައް ފެންނަނީ މޫސުން ބަދަލުވެ ތުނޑި ސަރަހައްދުގެ ފަސްގަނޑު ދަމައިގެން ދިއުމުގެ ސަބަބުން އެފަސްގަނޑުގެ ތެރޭގައި މިނިކަށިތައް ހުރުމުން ކަމަށް ބެލެވޭ ކަމަށް އޭނާ ވިދާޅުވިއެވެ. އަދި އެސަރަހައްދަކީ ކުރިން މީހުން ވަޅުލި ސަރަހައްދަކަށް ވެދާނެ ކަމަށް ވެސް އޭނާ ވިދާޅުވިއެވެ.

މައުލޫމާތު ލިބޭ ގޮތުގައި ފުވައްމުލަކު ސިޓީ ކައުންސިލުން މިހާރު ވަނީ މިނިކަށިތައް އެހެން ސަރަހައްދެއްގައި ވަޅުލާފައެވެ.