ގުދުސްގެ ގަރާރާ ދެކޮޅަށް ވޯޓު ދިނުމަށް ނައޫރޫއަށް އިސްރާއިލުން ހަދިޔާކުރީ ފެނާއި ނަރުދަމާގެ ނިޒާމެއް!

ގުދުސްއަކީ އިސާރާއިލުގެ ވެރިރަށުގެ ގޮތުގައި އެމެރިކާއިން ބަލިގަތުމާ ދެކޮޅަށް، އދ. ގެ އާންމު މަޖިލީހަށް ހުށަހެޅި ގާރާރާ ދެކޮޅަށް ވޯޓު ދިނުމަށް މައިކްރޮނީޝިއާގެ ޖަޒީރާ ގައުމެއް ކަމަށްވާ ނައޫރޫއަށް، އިސްޒްރާއިލުން ހަދިޔާކުރީ ފެނާއި ނަރުދަމާގެ ނިޒާމެއްކަން ފަޅާއަރައިފިއެވެ.

އިސްރާއިލުގެ ކިބައިން ނައޫރޫގެ ރައީސް ބެރޮން ވާގާ އެދިފައި ވަނީ އެ ގައުމުގައި ފެނާއި ނަރުދަމާގެ ނިޒާމެއް ގާއިމު ކޮށްދިނުމަށް ކަމަށާއި އަދި އެ ގައުމުގައި ފެނާއި ނަރުދަމާގެ ނިޒާމެއް ގާއިމުކުރުމަށް އިސްރާއިލުގެ ބޮޑުވަޒީރު ނަތަންޔާހޫ 72000 ޑޮލަރުގެ ހަދިޔާކުރެއްވި ކަމަށް ރިޕޯޓުތައް ބުނެއެވެ. އިސްރާއިލުން ފޯރުކޮށްދިން އެހީތެރިކަމުގެ ސަބަބުން ނައޫރޫ އިން ވަނީ އދ. ގައި ނެގި ވޯޓުގައި އިސްރާއިލާއި އެމެރިކާއާ އެއްކޮޅަށް ވޯޓު ދީފައެވެ.

ގާތްގަނޑަކަށް 13،000 މީހުންގެ އާބަދީއަކާ އެކު ނައޫރޫއަކީ ދެކުނު ޕެސިފިކްގައި އޮންނަ އެންމެ ކުޑަ ގައުމެވެ. އަދި ބިމުގެ ގޮތުން ބަލާއިރު އެ ގައުމަކީ ދުނިޔޭގެ ތިން ވަނަ އަށް އެންމެ ކުޑަ ގައުމެވެ.

އިސްރާއިލުން އިންޑިއާއަށް ވެސް 115،000 ޑޮލަރުގެ ޑީސެލިނޭޝަން ޕްލާންޓެއް ހަދިޔާކުރި ކަމަށް ރިޕޯޓުތައް ބުނާއިރު އދ. ގައި ނެގި ވޯޓުގައި އިންޑިއާ އިން ވޯޓު ދީފައި ވަނީ އިސްރާއިލާ ދެކޮޅަށެވެ.

ނައޫރޫގެ އިތުރުން އިސްރާއިލާ އެއްކޮޅަށް ވޯޓުދިން އެހެން ގައުމުތަކުގެ ތެރޭގައި ޕަލާއޫ، ޓޯގޯ، މާޝަލް އައިލެންޑްސް، މައިކްރޮނީޝިއާ، ނައޫރޫ، ގުއާޓެމާލާ އަދި ހޮންޑިއުރާސް ހިމެނެއެވެ. މިއީ ހުސް ކުދި ގައުމުތަކުގެ ގޮތުގައި ފާހަގަކުރެވޭ ގައުމުތަކެވެ.

އިސްރާއިލުގެ މި ހަދިޔާތަކާ އެކު ވެސް، އދ. ގައި ނެގި ވޯޓުގައި އެ ގައުމަށް ކުރިމަތިލާން ޖެހުނީ ލަދުވެތި ނަތީޖާއަކާއެވެ. އެގޮތުން 193 ގައުމުގެ މައްޗަށް އެކުލެވޭ އދ. ގެ އާއްމު މަޖިލީހުގެ ބައްދަލުމަށް ހުށަހެޅި ގަރާރު ފާސްކޮށްފައިވަނީ، 128 ގައުމެއްގެ ތާއީދާއެކުގައެވެ. މިގަރާރާ ދެކޮޅަށް ވޯޓު ދީފައި ވަނީ އެންމެ ނުވަ ގައުމަކުންނެވެ. ގަރާރަށް ވޯޓަށް އެހުމުން، 35 ގައުމަކުން ވަކިކޮޅަކަށް ވޯޓު ދީފައެއްނުވެއެވެ. މި ގަރާރު ފާސްކޮށްފައި ވަނީ އެ ގަރާރާ ދެކޮޅަށް ވޯޓު ދީފި ނަމަ އެހީތައް ކަނޑާލާނެ ކަމަށް އެމެރިކާ އިން އިންޒާރު ވެސް ދީފައި ވަނިކޮށެވެ.