ފުޖިމޯރީ މިނިވަން ކުރި މައްސަލާގައި ޕެރޫގެ ވަޒީރަކު އިސްތިއުފާ ދެއްވައިފި

ޕެރޫގެ ކުރީގެ ރައީސް އަލްބާޓޯ ފުޖިމޯރީ އަށް މަޢާފް ދެއްވައި، އޭނާ މިނިވަން ކުރި މައްސަލާގައި އެގައުމުގެ ސަގާފަތާއިބެހޭ ވަޒީރު ސަލްވަޑޯ ޑެލް ސޮލަރ މަގާމުން އިސްތިއުފާ ދެއްވައިފި އެވެ.

ކޮރަޕްޝަނާއި އިންސާނީ ޙައްޤުތަކަށް އަރައިގަތުމުގެ މައްސަލަތަކެއްގައި ޖަލު ހުކުމެއް ތަންފީޒް ކުރަމުން ދަނިކޮށް، ފުޖިމޯރީ އަށް މަޢާފް ދެއްވާ، ޖަލުން މިނިވަންކޮށްފައި ވަނީ މިދިޔަ އާދީއްތަ ދުވަހު އެވެ. އޭނާ އަށް މަޢާފް ދެއްވުމަށް ނިންމެވީ، ސިއްހީ ހާލަތު ދަށް ވުމާއި ގުޅިގެން ކަމަށް ރިޕޯޓްތައް ބުނެއެވެ.

އެ ނިންމުމާއި ގުޅިގެން ޕެރޫގެ ވެރިރަށް ލީމާގައި ފެށި އިހްތިޖާޖްތައް ކުރިމަތިލުންތަކަކަށް ބަދަލުވެގެންދިޔައިރު، އެމައްސަލާގައި ސަރުކާރުގެ އިސް ދެ ބޭފުޅަކު އިސްތިއުފާ ދެއްވާފައިވެއެވެ.

ފިލްމް ޑިރެކްޓަރެއް ކަމަށްވާ ޑެލް ސޮލަރ، ސަގާފަތާއިބެހޭ ވަޒީރުގެ މަގާމުން އިސްތިއުފާ ދެއްވި ސަބަބު އާއްމު ކުރައްވާފައެއް ނުވެއެވެ.

ސްޕެނިޝް ބަހުން ބުދަ ދުވަހު ކުރެއްވި ޓްވީޓެއްގައި ޑެލް ސޮލަރ ވަނީ، އެގައުމަށް ޚިދުމަތް ކުރުމަށް ދެއްވި ފުރުޞަތަށްޓަކައި ޕެރޫގެ ރައީސަށް ޝުކުރު ދަންނަވާފައެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޕެރޫގެ ބޮޑުވަޒީރު މާސިޑީޒް އަރާއޯޒް ވަނީ، ފުޖިމޯރީ މިނިވަން ކުރައްވާފައި ވަނީ ޕެރޫގެ މިހާރުގެ ރައީސް ޕެޑްރޯ ޕަބްލޯ ކުޒިންސްކީގެ ރިޔާސަތު ހިމާޔަތް ކުރެއްވުމަށް އިދިކޮޅު ފަރާތްތަކާއެކު ހެދި ޑީލެއްގެ ދަށުން ކަމަށް ބުނާ ރިޕޯޓްތައް ދޮގު ކުރައްވާފައެވެ.

ކޮރަޕްޝަންގެ މައްސަލައަކާއި ގުޅިގެން ޕެރޫގެ ރައީސް ކުޒިންސްކީގެ މައްޗަށް، ޕެރޫގެ ގާނޫނު ހަދާ މަޖިލީހުގައި ފާއިތުވި ހަފްތާގައި ނެގި އިތުބާރު ނެތްކަމުގެ މައްސަލައިގެ ވޯޓުން ސަލާމަތްވެވަޑައިގެންނެވީ ހަނި ގޮތަކަށެވެ.

ޕެރޫގެ ކުރީގެ ރައީސް އަލްބާޓޯ ފުޖިމޯރީ، 25 އަހަރުގެ ޖަލު ހުކުމެއް ތަންފީޒް ކުރައްވަމުން ގެންދެވީ އޭނާގެ ވެރިކަމުގައި އިންސާނީ ހައްގުތަކަށް އަރައިގަތުމާއި، ކޮރަޕްޝަންގެ މައްސަލަތަކާއި ގުޅިގެންނެވެ. އޭނާގެ ސިއްހީ ހާލުކޮޅު ވަރަށް ބޮޑަށް ދަށްވުމާއި ގުޅިގެން ޖަލު ހުކުމް މަޢާފް ކޮށްދިން ނަމަވެސް، ފާޑު ކިޔާ ފަރާތްތަކުން ދަނީ ފުޖިމޯރީ އަށް އިއްވާފައިވާ ޖަލު ހުކުމް ފުރިހަމަޔަށް ތަންފީޒް ކުރަން ޖެހޭނެ ކަމަށް ބުނަމުންނެވެ.

މިމައްސަލާގައި އެގައުމުގައި އިހްތިޖާޖް ކުރަމުންދާއިރު، ބުރާސްފަތި ދުވަހުވެސް އިހްތިޖާޖްތައް ކުރިއަށް ގެންދިޔުމަށް ތާވަލް ކޮށްފައިވެއެވެ.

ޖަލު ހުކުމް މަޢާފް ކޮށްދެއްވުމާއި ގުޅިގެން އަންގާރަ ދުވަހު ފޭސްބުކް މެދުވެރިކޮށް ދެއްވި ވީޑިއޯ ޚިތާބެއްގައި ފުޖިމޯރީ ވަނީ، ރައީސް ކުޒިންސްކީ އަށް ޝުކުރު ދަންނަވާފައެވެ.

1990 ވަނަ އަހަރުން ފެށިގެން 2000 ވަނަ އަހަރުގެ ނިޔަލަށް ޕެރޫގެ ރައީސް ކަން ކުރެއްވި ފުޖިމޯރީ އަށް ފުރަތަމަ ޖަލު ހުކުމެއް އިއްވާފައިވަނީ ވެރިކަމުގެ ބާރުތައް ނަހަމަ ގޮތުގައި ހިއްޕެވުމާއި ރިޝްވަތުގެ މައްސަލައަކާއި ގުޅިގެންނެވެ. އެމައްސަލާގައި 2007 ވަނަ އަހަރު އޭނާގެ މައްޗަށް ހަ އަހަރުގެ ޖަލު ހުކުމެއް އިއްވާފައިވާއިރު، ވެރިކަމުގެ ދުވަސްވަރު އިންސާނީ ހައްގުތަކަށް އަރައިގަތް މައްސަލައެއްގައި އޭނާ 25 އަހަރަށް ޖަލަށް ލުމަށް 2009 ވަނަ އަހަރު ވަނީ ހުކުމް ކޮށްފައެވެ.

އުމުރުފުޅުން 79 އަހަރުގެ ފުޖިމޯރީގެ މައްޗަށް ވަނީ "ޑެތު ސްކޮޑް" އަށް ޕެރޫގައި ބަޔަކު މެރުމަށް ހުއްދަ ދިން ކަމުގެ މައްސަލައެއް ސާބިތުވެފައެވެ.

އޭނާ އަށް މަޢާފް ދެއްވިކަން ހާމަ ކުރަމުން ޕެރޫގެ ރައީސް ކުޒިންސްކީގެ އޮފީހުން ނެރުނު ބަޔާނެއްގައި ވަނީ، ކުރީގެ ރައީސް އަލްބާޓޯ ފުޖިމޯރީގެ އިތުރުން ޖަލު ހުކުމް ތަންފީޒް ކުރަމުންދިޔަ އިތުރު ހަތް މީހަކަށް އިންސާނިއްޔަތަށްޓަކައި މަޢާފް ދެއްވާފައިވާ ކަމަށެވެ. ސިއްހީ ހާލުކޮޅު ގޯސްވެފައިވާ ކަމަށް ބުނާ ފުޖިމޯރީގެ އިތުރުން މަޢާފް ދިން ހަތް މީހުންވެސް ހާލަތު އެއް ގޮތް ކަމަށް އެބަޔާނުގައި ބުނެފައިވީ ނަމަވެސް، ފުޖިމޯރީގެ އިތުރުން މަޢާފް ދިން ހަތް މީހުންގެ ނަމެއް ހާމަކޮށްފައެއްނުވެއެވެ.

އެބަޔާނުގައި އިތުރަށް ބުނެފައިވަނީ، ފުޖިމޯރީ އަށް ފަރުވާ ނުކުރެވޭ ފަދަ، މައިބަދައިގެ ސިއްހީ މައްސަލައެއް ކުރިމަތިވެ، ހާލަތު ގޯސްވަމުންދާ ކަމަށް ޑޮކްޓަރުން މަޢުލޫމާތު ދީފައިވާ ކަމަށެވެ.

އެބަޔާނަށް ފަހު ޕެރޫގެ ރައީސް ކުޒިންސްކީ ވަނީ، އޭނާ ފަދަ އަމިއްލަފުޅަށް ޑިމޮކްރެޓުންގެ ގޮތުގައި ގަބޫލް ކުރާ ފަރާތްތަކުން ފުޖިމޯރީ ޖަލުގައި އަވަހާރަވުމަށް ދޫކޮށްނުލައްވާނެ ކަމަށާއި، އިންސާފު ގާއިމް ކުރުމަކީ ބަދަލު ހިފުން ނޫން ކަމަށް ވިދާޅުވެފައެވެ. އަދި ފުޖިމޯރީ އަށް މަޢާފް ދެއްވުމަށް ނިންމެވީ އުނދަގޫ ނިންމެވުމެއް ކަމަށާއި، އެހެން ނަމަވެސް އެއީ އަމިއްލަފުޅު ނިންމެވުމެއް ކަމަށް ކުޒިންސްކީ ވިދާޅުވި އެވެ.