ރާއްޖޭގައި މަރުވި ލަންކާ މީހާގެ މަރުގެ މައްސަލަ އެޤައުމުން ބަލަނީ!
27 ޑިސެމްބަރު 2017 | ބުދަ 15:01ދެޤައުމުގެ ޑޮކްޓަރުން ދައްކަވާ ވާހަކަ ދިމައެއް ނުވޭ
ކޮންމެ އަހަރަކުވެސް ރިސޯޓުތަކަށާއި ސަފާރީތަކަށް އަންނަ ފަތުރުވެރިން ގެނބިގެން މަރުވުމުގެ ޙާދިސާތައް ހިނގާ
މިމަހުގެ 20ވަނަ ދުވަހު ކ ގުރައިދޫ ބޭރުގައި އަޅާފައިވާ ސަފާރީއަކުން ފައިބައިގެން ފީނަނިކޮށް މަރުވި ލަންކާ މީހާ މަރުވީ ހާޓް އެޓޭކެއް ފަދަ ކަމެއް ދިމާވެގެން ޤުދުރަތީ މަރަކުންކަމަށް އޭނާ ބެލި ޑޮކްޓަރުން ނިންމާފައިވަނިކޮށް، އެމައްސަލަ ލަންކާގެ ކަމާބެހޭ ފަރާތްތަކުން ބަލަން ފަށައިފިއެވެ.
ލަންކާގެ ނިގަމްބޯގެ ކޮރޯނަރ ޑރ. ސިރީ ޖަޔަންތަ ވިކްރަމަރަތުނަ މިހާރުވަނީ މަރުވި ފިރިހެން މީހާއާއިއެކު ރާއްޖެއައި އަންހެން މީހާއާ ސުވާލުކުރުމަށް ފުލުހުންނަށް އަންގަވާފައެވެ. ޑރ. ވިކްރަމަރަތުނަ ވިދާޅުވީ އެމީހާ މަރުވި ސީދާ ސަބަބު ޕޯސްޓްމޯޓަމުން ދެނެގަނެވިފައިނުވާކަމަށާއި، އޭނާއާއެކު ރާއްޖެ އައި އަންހެން މީހާގެ ބަޔާން ނަގަން ޖެހޭނެކަމަށެވެ. ކޮރޯނާރއަށް މައުލޫމާތު ދެއްވަމުން 33 އަހަރުގެ އެފިރިހެން މީހާގެ އަންހެން ކޮއްކޮ ބުނީ އޭނާގެ ބޭބެއަކީ ކޮލެސްޓްރޯލް މަތިވުމުގެ ސަބަބުން ފަރުވާ ހޯދަމުން ދިޔަ މީހެއްކަމަށެވެ. އަދި އޭނާ ގެނބިގެން މަރުވުމުގެ ފަހަތުގައި އިތުރު ކަންތައްތަކެއް ވާކަމަށާއި، ގަސްދުގައި އޭނާ މަރާލީކަމަށް ބެލެވޭކަމަށް އެ އާއިލާއިން ތުހްމަތުކުރެ އެވެ.
އެމީހާ މަރުވީ ގެނބިގެންކަމަށް ނުބެލެވޭކަމަށް ރާއްޖޭގެ ޑޮކްޓަރުން ބުނެފައިވަނިކޮށް، އޭނާގެ ޕޯސްޓްމޯޓަމް ހެދި ޑޮކްޓަރުން ބުނަނީ އޭނާ މަރުވީ ގެނބިގެންކަމަށެވެ. އަދި އޭނާގެ މަރުގެ މައްސަލަ އިތުރަށް ތަހުޤީޤްކުރަމުންދާތީ މަރުވި ސީދާ ސަބަބު ރަސްމީކޮށް ބުނެފައެއް ނުވެއެވެ.
