ކުރީގެ ފަސް ރުފިޔާގެ ނޫޓުތަކަކީ ލީގަލް ޓެންޑަރެއް ނޫން ކަމަށް ރައީސް ކަނޑައަޅުއްވައިފި

ދިވެހިރާއްޖޭގައި މިހާރު ބޭނުން ކުރަމުންދާ ރުފިޔާގެ ތެރެއިން، 2017 ވަނަ އަހަރުގެ މޭމަހުގެ 10 ވަނަ ދުވަހުގެ ކުރިން ނެރެފައިވާ 5 (ފަސް) ރުފިޔާގެ ކަރުދާސް ނޫޓުތަކަކީ، 2018 ވަނަ އަހަރުގެ ޖަނަވަރީ މަހުގެ އެއް ވަނަ ދުވަހުން ފެށިގެން ދިވެހިރާއްޖޭގެ ލީގަލް ޓެންޑަރެއް ނޫން ކަމުގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ބުދަ ދުވަހު ކަނޑައަޅުއްވައިފިއެވެ.

މިގޮތަށް ކަނޑައެޅުއްވީ، ޤާނޫނު ނަންބަރު 81/6 (މޯލްޑިވްސް މަނިޓަރީ އޮތޯރިޓީގެ ޤާނޫނު 1981) ގެ ދަށުން، ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ކަމަށް ރައީސް އޮފީހުން ބުނެއެވެ.

Advertisement

މި ނޫޓުތައް ދިވެހިރާއްޖޭގެ ލީގަލް ޓެންޑަރަކަށް ބަދަލު ކުރުމަށްޓަކައި 2021 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ނިޔަލަށް މޯލްޑިވްސް މަނިޓަރީ އޮތޯރިޓީއަށް ހުށަހަޅާ ފަރާތްތަކަށް، ހުށަހަޅާ ނޫޓުގެ ނުވަތަ ނޫޓުތަކުގެ ސިއްކައިގެ އަގު، އެ އޮތޯރިޓީ އިން ލިބިދޭ ގޮތަށް ވެސް ރައީސުލްޖުމްހޫރިއްޔާ ވަނީ ހަމަޖައްސަވާފައެވެ.

ކަރުދާސް ފަސް ރުފިޔާގެ ނޫޓު ބޭނުން ކުރެވޭނެ އެންމެ ފަހު ދުވަސް ކައިރި ވެފައިވާއިރު މިހާތަނަށް ކަލެކްޓް ކުރެވިފައި ވަނީ ދައުރުވާ ފައިސާގެ 23.3 ޕަސެންޓް ކަމަށް މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އިން ވަނީ ބުނެފައެވެ.

މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އިން ވަނީ ފަސް ރުފިޔާގެ ކަރުދާސް ނޫޓް ވިޔަފާރީގެ މުއާމަލާތަށް ބޭނުން ކުރެވޭނެ އެންމެ ފަހު ތާރީހަކީ 31 ޑިސެމްބަރު 2017 ކަމަށް ކަނޑައަޅާފަ އެވެ.

އެމްއެމްއޭއިން ވަނީ ވިޔަފާރިވެރިން ވެސް ލިބޭ ކަރުދާސް ނޫޓް އަނބުރާ ކަސްޓަމުންނަށް ދޫނުކޮށް، އެމްއެމްއޭއާ ހަވާލުކޮށް، ރަންދިހަފަހެއްގެ ނޫޓަށް ބަދަލު ކުރުމަށް އިލްތިމާސް ކޮށްފައެވެ.