ދެ ރުފިޔާގެ އާ ފާއިސާ ފޮތި ތަޢާރަފްކޮށްފި

އަލަށް ފަރުމާކޮށްފައިވާ ދެ ރުފިޔާގެ އާ ފައިސާ ފޮތި ތަޢާރަފްކޮށްފިއެވެ.

ބުދަ ދުވަހު ހެނދުނު އެމްއެމްއޭގައި ބޭއްވި ކުޑަ ހަލްފާއެއްގައި ދެ ރުފިޔާގެ އާ ފާއިސާ ފޮތި ތަޢާރަފްކޮށްދެއްވީ ގަވަނަރ އަޒީމާ އާދަމްއެވެ.

އާ ކޮއިންއެއް ތައާރަފްކުރުމުގެ ބޭނުމަކީ ކުރިން ބޭނުންކުރަމުން އައި ދެ ރުފިޔާގެ ކޮއިން ބަރުވުމުގެ އިތުރަށް ގެންގުޅެން އުނދަގޫ ކަމަކަށް ވުމެވެ. އަލަށް ތަޢާރަފްކުރި ދެ ރުފިޔާއަކީ މިހާރު ބޭނުންކުރަމުންދާ އެއް ރުފިޔާއަށް ވުރެ ވެސް ސައިޒުގެ ގޮތުން ކުޑަ އަދި ބަރު ދަނުގެ ގޮތުން ލުއި ރުފިޔާއެއް ކަމަށް އެމްއެމްއޭގެ އެސިސްޓެންޓް އެގްޒެކެޓިވް ޑިރެކްޓަރ މުނާ އިބްރާހިމް ވިދާޅުވިއެވެ.

އަލަށް ތަޢާރަފްކުރި ދެ ރުފިޔާއަކީ ދެ މައުދަނަކުން ބޭނުންކޮށްފައިވާ ރުފިޔާއެކެވެ. އެގޮތުން ބޭރު ފަށަލައިގެ ވަށް ބުރަކަށް ރަންކުލައިގައި ހުރި އިރު އެތެރެ ފަށަލައިގައި ބޭނުންކޮށްފައިހުރީ ރިހި ކުލައެވެ. އެއީ ބޭރު ފަށަލައިގައި ނިކެލް ބްރާސް އާއި އެތެރެ ފަށަލައިގައި ނިކެލް ޕްލޭޓެޑް ސްޓީލްއެވެ.

ޑައިމީޓަރުގައި 25.50 މިލިމީޓަރ ހުންނަ މި ފާއިސާ ފޮތީގެ ބަރުދަނުގައި ހުންނަނީ 6.20 ގްރާމްއެވެ.

އަލަށް މިތަޢާރަފްކުރި ފާއިސާ ފޮތި ބުދަ ދުވަހުން ފެށިގެން ދައުރުވަމުންދާއިރު ކުރިން ބޭނުންކުރަމުން އައި ދެ ރުފިޔާ ވެސް މި ފާއިސާ ފޮއްޗާ އެކު ދައުރުވަމުންދާނެއެވެ.

މިހަފްލާގައި ވަނީ އާ ދެ ރުފީޔާއިން އެންމެ ފުރަތަމަ ޓްރާންސްސެކްޝަން ހެދި ފަރާތަކަށް ރުފިޔާ ހަވާލުކޮށްފައެވެ.