ޝްރައްދާއަކީ ސާހޯއަށް އެންމެ އެކަށީގެންވާ އެކްޓްރެސް: ޕްރަބާސް

ތެލުގޫ އެކްޓަރ ޕްރަބާސް މިހާރު ދަނީ އޭނާގެ އެންމެ ފަހުގެ ފިލްމު "ސާހޯ"ގެ ޝޫޓިން ކުރިއަށް ގެންދަމުންނެވެ.

މި ފިލްމުގައި ޕްރަބާސްގެ އިތުރުން ލީޑް ރޯލުން ފެނިގެންދަނީ ބޮލީވުޑްގެ ތަރި ޝްރައްދާ ކަޕޫރެވެ.

އިންޑިއާގެ ނޫހެއް ކަމަށްވާ ޕީޓީއައި އަށް ޕްރަބާސް ވަނީ "ސާހޯ"އާ ބެހޭ ގޮތުން އިންޓަވިއުއެއް ދީފައެވެ. ޕްރަބާސް ބުނީ އޭނާ މިހާތަނަށް ބޮލީވުޑްގެ އެކްޓްރެސްއަކާ އެކީ މަސައްކަތް ކޮށްފައި ނުވާ ކަމަށާއި އޭނާއަށް ބޮލީވުޑްގެ ތަރިއަކާ އެކު މަސައްކަތް ކުރަން ލިބުނީތީ އުފާކުރާ ކަމަށެވެ. "ސާހޯ"ގައި އޭނާއާ އެކު ފެނިގެންދާ ޝްރައްދާއަކީ އޭނާ ކުޅޭ ރޯލަށް އެންމެ އެކަށީގެންވާ ތަރި ކަމަށް ޕީޓީއައި އަށް ޕްރަބާސް ދީފައިވާ އިންޓަވިއުގައި ވަނީ ބުނެފައެވެ. ޕްރަބާސް ބުނީ ޝްރައްދާގެ ކެރެކްޓާއަކީ އެ ފިލްމަށް އެންމެ މުހިއްމު އެއް ކެރެކްޓާ ކަމަށެވެ. ޝްރައްދާއަކީ ވަރަށް ބުރަކޮށް މަސައްކަތް ކުރާ ތަރިއެއް ކަމަށާއި ޝޫޓިންގެ ތެރޭގައި އެކަން ހާމަވެގެންދާ ކަމަށް ވެސް ޕްރަބާސް ބުންޏެވެ.

"ސާހޯ"ގެ ޑައިރެކްޓަރަކީ ސުޖީތެވެ. ސްކްރީން ޕްލޭ ލިޔެފައި ވަނީ ވެސް އޭނާއެވެ. "ސާހޯ" ތިން ބަހަކުން ގެނެސްދޭނެއެވެ. އެއީ ތެލުގޫ، ތަމަޅަ އަދި ހިންދީ ބަހުންނެވެ. މިފިލްމުގެ ޝޫޓިން ފަށާފައި ވަނީ މިއަހަރުގެ ޖޫން މަހުގެ ތެރޭގައެވެ.

"ސާހޯ"ގެ ފުރަތަމަ ފެނިލުން ވަނީ ދައްކާލާފައެވެ. "ސާހޯ"ގެ ފުރަތަމަ ފެނިލުން އަދި އެ ފިލްމުގެ ޕޯސްޓަރ އާންމު ކޮށްފައި ވަނީ ޕްރަބާސްގެ އުފަންދުވަސް ކަމަށްވާ އޮކްޓޯބަރު މަހުގެ 23 ވަނަ ދުވަހުއެވެ. މި ޕޯސްޓަރުން އޭނާ ފެންނަނީ ކޯޓާ އެކު މާރސްކް އަޅައިގެން ހުންނަ މަންޒަރެވެ.

ސާހޯގެ ފުރަތަމަ ފެނިލުން

ޕްރަބާސް އާއި ޝްރައްދާގެ އިތުރުން މި ފިލްމުން ފެނިގެންދަނީ ބޮލީވޫޑްގެ އެކްޓަރ ނީލް ނިތިން މުކޭޝް އަދި ބޮލީވުޑްގެ އެކްޓަރ ޖެކީ ޝްރޮފްއެވެ. ސަތޭކާ ފަންސާސް ކްރޯޑްގެ ބޮޑު ބަޖެޓަކުން އުފައްދާ މި ފިލްމުގެ ގިނަ މަންޒަރުތައް ނަގަނީ ހާއްސަކޮށް ތައްޔާރުކުރާ ސެޓެއްގައެވެ.

މި ފިލްމު ސިނަމާތަކަށް އަންނާނެ ދުވަހެއް އަދި ހާމަކޮށްފައި ނުވާއިރު ޚަބަރުތައް ބުނާ ގޮތުގައި ސިނަމާތަކަށް މި ފިލްމު އަންނާނީ އަންނަ އަހަރުގެ މެދެތެރޭގައެވެ.