ރައީސް ޔާމީން ގެންގުޅުއްވަނީ މުޅި ދުނިޔެ ދޫކޮށް އެކަހެރިވުމުގެ ސިޔާސަތު: ޑރ. ހުސައިން
ގައުމީ އެއްބައިވަންތަކަމުގެ ދުވަސް ބައްދަލުކުރިއިރު ރާއްޖެ އޮތީ ވަރަށް ނުބައި ފައްތަރެއްގައި
ޖޭޕީގެ ނާއިބު ލީޑަރު ޑރ. ހުސައިން ރަޝީދު
ރައީސުލްޖުމްހޫރިއްޔާ އަބްދުﷲ ޔާމީން ގެންގުޅުއްވަނީ މުޅި ދުނިޔެ ދޫކޮށް, އެކަހެރިވުމުގެ ސިޔާސަތެއް ކަމަށް ޖުމްހޫރީ ޕާޓީގެ ނާއިބު ލީޑަރު ޑރ. ހުސައިން ރަޝީދު ވިދާޅުވެއްޖެއެވެ.
ގައުމީ އެއްބައިވަންތަކަމުގެ ދުވަހުގެ މުނާސާބަތުގައި ގުޅިފައިވާ ސިޔާސީ ޕާޓީތަކުން ކުނޫޒުގައި ބޭއްވި ހާއްސަ ޕެނަލް ޑިސްކަޝަންގައި ވާހަކަ ދައްކަވަމުން ޑރ. ހުސައިން ވިދާޅުވީ ގައުމީ އެއްބައިވަންތަކަމުގެ ދުވަސް ބައްދަލުކުރިއިރު ރާއްޖެ އޮތީ ވަރަށް ނުބައި ފައްތަރެއްގައި ކަމަށާއި ގުޅިފައިވާ ޕާޓީތަކުން އެކަންކަން އިސްލާހުކުރުމަށް މަސައްކަތްކުރި ނަމަވެސް ފެންނަމުންދަނީ ރައީސް ޔާމީން މުޅި ދުނިޔެ ދޫކޮށް އެކަހެރިވުމުގެ ސިޔާސަތު ގެންގުޅުއްވާ މަންޒަރު ކަމަށެވެ.
"ހަގީގަތުގައި ވެސް އަޅުގަނޑުމެންގެ ގައުމީ އެއްބައިވަންތަކަމުގެ ދުވަސް އަޅުގަނޑުމެންނާއި ބައްދަލުކުރިއިރު ރާއްޖެ މިއޮތީ ވަރަށް ނުބައި ފައްތަރެއްގައި. އެއީ ރައީސް ޔާމީން ގެންގުޅުއްވާ ސިޔާސަތުގެ ސަބަބުން ރާއްޖެ ދުނިޔޭގައި ވަރަށް ބޮޑަށް އެކަނިވެރިވެ ރާއްޖެއަށް ކުރިން އޮތް ތާއިދާއި އެއްބާރުލުން ދުނިޔޭގައި ނުލިބިފައިވާ ދަނޑިވަޅެއްގަ. އަޅުގަނޑުމެންގެ ތެރޭގައި ކަންކަން ހުރި ގޮތުން އެކަންކަން އިސްލާހުކުރުމަށް ގުޅިފައިވާ ސިޔާސީ ޕާޓީތަކުން މަސައްކަތް ކުރަމުން ދިޔަ ނަމަވެސް އެކުރާ ކޮންމެ މަސައްކަތަކާ ގުޅިގެން ފެންނަމުންދަނީ ދުނިޔެ ދޫކޮށް އެކަހެރިވުމުގެ ސިޔާސަތު ޔާމީން ގެންގުޅުއްވާތަން."
މި ޕެނަލް ޑިސްކަޝަންގައި ވާހަކަ ދައްކަމުން އެމަނިކުފާނު ވިދާޅުވީ ރާއްޖެއިން ޒަމާނުއްސުރެ ގެންގުޅުނު ހާރީޖީ ސިޔާސަތު މި ސަރުކާރުން ދޫކޮށްލައްވާފައިވާ ކަމަށެވެ.
