ރާއްޖެއަށް މިހާރު ކުރިމަތިވެފައި މި ވަނީ ސިޔާސީ "ކާރިސާ" އެއް: މައުމޫން
26 ޑިސެމްބަރު 2017 | އަންގާރަ 17:56ސިޔާސީ ކާރިސާ އިން ސަލާމަތް ވުމަށް ދިވެހިން މަސައްކަތް ކުރަންޖެހޭ
ކުރީގެ ރައީސް މައުމޫން
ދިވެހި ރާއްޖެއަށް މިހާރު ކުރިމަތިވެފައި މި ވަނީ " ސިޔާސީ ކާރިސާ" އެއް ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެއެވެ.
ބައިނަލްއަގްވާމީ އެއްބައިވަންތަކަމުގެ ދުވަހާއި ގުޅިގެން ރައީސް މައުމޫން ނެރުއްވި ބަޔާނެއްގައި ވިދާޅުވެފައި ވަނީ ދިވެހި ރާއްޖެއަށް މިހާރު ކުރިމަތިވެފައިވާ ސިޔާސީ ކާރިސާ އިން ސަލާމަތް ވުމަށް ދިވެހިން މަސައްކަތް ކުރަން ޖެހޭ ކަމަށެވެ. 2004 ވަނަ އަހަރުގެ ސުނާމީ ކާރިސާ ހިނގި ދުވަހު ދިވެހިން ދެއްކި އެއްބައިވަންތަކަމުން އިބްރަތް ލިބިގެން، މިއަދު ގައުމަށް ދިމާވެފައިވާ ބޮޑެތި މައްސަލަތަކާ، އެއްބައިވަންތަކަމާއި އެކު ކުރިމަތިލުމަށް އެންމެހާ ދިވެހިންނަން ރައީސް މައުމޫން ގޮވާލެއްވިއެވެ.
ރައީސް މައުމޫން ވިދާޅުވީ ދިވެހި ރާއްޖެއަށް މިހާރު ވެސް ދިމާވެފައި މި ވަނީ ބިރުވެރިކަމާއި ނާންމާން ކަމުގެ ދުވަސްތަކެއް ކަމަށާއި އެތައް ބައިވަރު ރައްޔިތުންނަން ދަނީ ނުހައްގުން އަނިޔާ ލިބެމުން ކަމަށެވެ. ސުނާމީ ކާރިސާ އިން އަރައިގަތުމަށް މުޅި ދުނިޔެއަށް ދިވެހީން ދައްކުވައިދިން އެއްބައިވަންތަކަން ނަމޫނާ އަކަށް ބަލައި، ދިވެހި ރާއްޖެއަށް މިހާރު ކުރިމަތިވެފައިވާ ސިޔާސީ ކާރިސާއިން ސަލާމަތްވުމަށް މަސައްކަތް ކުރަންޖެހޭ ކަމަށް ރައީސް މައުމޫންގެ ބަޔާނުގައި ފާހަގަ ކޮށްފައިވެއެވެ.
އެހެންކަމުން ގައުމަށް ދިމާވެފައިވާ ބޮޑެތި މައްސަލަތައް ހައްލުކުރުމަށް ގުޅިފައިވާ ސިޔާސީ ޕާޓީތައް އެއްބައިވަންތަކާއި އެކު ދެމިތިބޭނެ ކަމުގެ ޔާގީންކަން ރައްޔިތުންނަން ރައީސް މައުމޫން ދެއްވިއެވެ.
