އިނގިރޭސިވިލާތުގެ މަޝްހޫރު ކުޅިވަރު ވެބްސައިޓެއް ކަމަށްވާ ސްކައި ސްޕޯޓްސް އިން ހޮވި 2017 ވަނަ އަހަރުގެ އެންމެ މޮޅު ކުޅުންތެރިޔަކަށް ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ ހޮވިއްޖެއެވެ.

މެސީއަށް މި މަގާމު ލިބުނުކަން ސްކައި ސްޕޯޓްސް އިން ވަނީ އެ ޗެނަލްގެ ވެބްސައިޓް މެދުވެރިކޮށް އާންމު ކުރި ލިސްޓަކުން ކަށަވަރު ކޮށްދީފައެވެ. މިއީ މުޅި ސީޒަނުގައި ކުޅުންތެރިން ދެއްކި ކުޅުމަށް ބެލުމަށް ފަހު އާންމުކޮށްފައިވާ ލިސްޓަކަށްވާއިރު މެސީއަށް މި މަގާމު ލިބުނީ ބާސާ އަދި އާޖެންޓީނާގެ ގައުމީ ޓީމާއެކު އޭނާ ދެއްކި މޮޅު ކުޅުމުގެ ސަބަބުންނެވެ.

އެގޮތުން ބާސާއިން މިދިޔަ ސީޒަނުގެ ސްޕެނިޝް ކޮޕާ ޑެލްރޭ ކާމިޔާބު ކުރުމުގެ އިތުރަށް ލަލީގާގެ ދެވަނަ ހޯދިއިރު އޭނާ ވަނީ އެ ޓީމުގެ މުހިންމު ދައުރެއް އަދާކޮށްފައެވެ. އަދި މި ސީޒަން ފެށިގެން ބާސާއިން ދައްކަމުން އަންނަ މޮޅު ކުޅުމުގެ އެންމެ އިސް މޭސްތިރިއަކީ މެސީއެވެ. ހަމައެހެންމެ އާޖެންޓީނާ ވޯލްޑް ކަޕަށް ކޮލިފައި ކޮށްދިނުމުގައި ވެސް މެސީގެ ހިއްސާ ބޮޑެވެ. އޭނާ ވަނީ މިހިނގަމުންދާ 2017 ވަނަ އަހަރު 54 ލަނޑު ޖަހާފައެވެ. މިއީ ޔޫރަޕުގައި ކުޅެމުން އަންނަ އެހެން ހުރިހާ ފޯވާޑުންނަށް ވުރެ އިތުރު އަދަދެކެވެ.

މެސީގެ ފަހަތުން މި ލިސްޓުގެ ދެވަނަ ލިބިފައި ވަނީ ޓޮޓެންހަމްގެ ހުނަރުވެރި ފޯވާޑް ހެރީ ކޭންއަށެވެ. ފްރާންސް ފުޓްބޯލް އިން ދިން ބެލެންޑޯ އެވޯޑުގެ 10 ވަނަ ހޯދި ކޭން ވަނީ 2017 ގައި މިއަހަރު 52 ލަނޑު ޖަހާފައެވެ. އޭނާ އަންނަނީ އިނގިރޭސި ޕްރިމިއާ ލީގާއި ޔުއެފާ ޗެމްޕިއަންސް ލީގުގައި މޮޅު ކުޅުމެއް ދައްކަމުންނެވެ. މި ކުޅުމުގެ ސަބަބުން އިނގިރޭސި ގައުމީ ޓީމުގެ ކެޕްޓަން ބޭންޑް ވެސް ކޭންއާ ވަނީ ހަވާލު ކޮށްފައެވެ.

މި ލިސްޓުގެ ތިންވަނަ ލިބިފައި ވަނީ ޕީއެސްޖީއަށް ކުޅެމުން އަންނަ ބްރެޒިލްގެ ފޯވާޑް ނޭމާއަށެވެ. މިދިޔަ ސީޒަނުގައި ބާސާއަށް ކުޅުމަށް ފަހު އޭނާ ޕީއެސްޖީއަށް ބަދަލުވީ ދުނިޔޭގެ ރެކޯޑު ޓްރާންސްފާ ފީއެއް ކަމަށްވާ 222 މިލިއަން ޔޫރޯއަށެވެ. ނޭމާގެ ލީޑާޝިޕުގެ ދަށުން ޕީއެސްޖީއިން އަންނަނީ މި ސީޒަނުގައި ތަފާތު މޮޅު ކުޅުމެއް ދައްކަމުންނެވެ.

ފީފާއިން ހޮވި ދުނިޔޭގެ އެންމެ މޮޅު ކުޅުންތެރިޔާގެ މަގާމު ހޯދި ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަށް މި ލިސްޓުން ލިބިފައިވަނީ ހަތަރު ވަނައެވެ.

މި ލިސްޓުގެ އެންމެ މަތިން ރޭންކު ކުރެވިފައިވާ ގޯލްކީޕަރަކީ 49 ވަނައިގައި ރޭންކު ކުރެވިފައިވާ ބާސާގެ ކީޕަރު މާކް އެންޑާ ޓާސްޓީޖެންއެވެ. މި އަހަރުގެ ތެރޭގައި އޭނާގެ ކޮޅަށް ވަދެފައިވަނީ އެންމެ 28 ލަނޑުކަން ފާހަގަ ކޮށްލެވެއެވެ.  އެންމެ މަތީގައި ރޭންކު ކުރެވިފައިވާ ޑިފެންޑަރަކީ މެންޗެސްޓާ ސިޓީއަށް ކުޅެމުން އަންނަ އާޖެންޓީނާގެ ނިކޮލަސް އޮޓަމެންޑީއެވެ. އަދި އެންމެ މަތިން ރޭންކު ކުރެވުނު މިޑްފީލްޑަރަކީ ފަސްވަނައިގައި ރޭންކު ކުރެވުނު ޓޮޓެންހަމްއަށް ކުޅެމުން އަންނަ ކްރިސްޓިއަން އެރިކްސެންއެވެ.

މެސީއަށް މި މަގާމު ލިބިފައިވާއިރު އޭނާއަށް މިއަހަރު ބޭއްވި ގިނަ އެވޯޑު ހަފްލާތަކުގައި ލިބިފައިވަނީ ރޮނާލްޑޯގެ ފަހަތުން ދެވަނައެވެ. އެހެން ނަމަވެސް އޭނާއަކީ ދުނިޔޭގެ ތާރީހުގައި ވެސް އުފެދުނު އެންމެ މޮޅު ކުޅުންތެރިޔާގެ ގޮތުގައި ގިނަ ބަޔަކު ދެކޭ ކުޅުންތެރިޔާއެވެ.