ކުޅުދުއްފުށީ އެއާޕޯޓް 12 ހެކްޓަރު ހިއްކައިފި
25 ޑިސެމްބަރު 2017 | ހޯމަ 04:59ޖުމްލަ 15 ހެކްޓަރުގެ ބިން ހިއްކުމަށް ހަމަޖެހިފައިވޭ
ކުޅުދުއްފުށީ އެއާޕޯޓުން ބިން ހިއްކުމަށް ހަމަޖެހިފައިވާ ސަރަހައްދު
ހދ. ކުޅުދުއްފުށީ އެއާޕޯޓު އަޅަން ހަމަޖެހިފައިވާ ސަރަހައްދުން 12 ހެކްޓަރުގެ ބިން ހިއްކައިފި އެވެ.
ކުޅުދުއްފުށީ އެއާޕޯޓް އަޅަން ހަމަޖެހިފައިވާ ސަރަހައްދުން 15 ހެކްޓަރުގެ ބިން ހިއްކުމަށް އެމްޓީސީސީއާ ވަނީ ހަވާލުކޮށްފައެވެ.
ކުޅުދުއްފުށީ ކައުންސިލުން މައުލޫމާތު ދިން ގޮތުގައި، އެއާޕޯޓް އަޅާ ސަރަހައްދުގެ މޫދުން ހަ ހެކްޓަރުގެ ބިން ހިއްކާފައިވާއިރު، އެރަށު ކުޅިންވެސް ހަ ހެކްޓަރު ހިއްކައި މިހާރު ވަނީ ނިންމާފައެވެ.
އެއާޕޯޓް އެޅުމަށް، ގުދުރަތީ މުއްސަނދިކަން ލިބިފައިވާ ކުޅުއްދުއްފުށީ ކުޅިން ޖުމްލަ ނުވަ ހެކްޓަރުގެ ބިން ހިއްކުމަށް ވަނީ ނިންމާފައެވެ.
އެމްޓީސީސީއިން މައުލޫމާތު ދޭ ގޮތުގައި ކުރިއަށް އޮތް ހަފްތާއެއްގާ ދުވަހުގެ ތެރޭގައި ބިން ހިއްކައި އެއްކޮށް ނިންމާލެވޭނެއެވެ.
އެމްޓީސީސީގެ ކޮންނަ ބޯޓު، މަހާޖައްރާފު ބޭނުންކޮށްގެން ކުޅުދުއްފުށީ ބިން ހިއްކުމުގެ މަސައްކަތް ފެށީ މިދިޔަ މަހުގެ 12 ވަނަ ދުވަހު އެވެ. ކުރިން އެމްޓީސީސީއިން ބުނެފައިވާ ގޮތުގައި މަހެއްހާ ދުވަހުގެ ތެރޭގައި ބިން ހިއްކުމުގެ މަސައްކަތް ނިންމާލެވޭނެއެވެ.
ކުޅި ހިއްކައި ނިމުމުން، އެއާޕޯޓުގެ ރަންވޭގެ މަސައްކަތް އެމްޓީސީސީއިން ފަށާނެއެވެ. ސަރުކާރުން ލަފާކޮށްފައިވާ ގޮތުގައި އަންނަ އަހަރުގެ މެދެއްހާ ހިސާބުގައި އެއާޕޯޓުގެ މަސައްކަތް ނިންމައި، ޚިދުމަތް ދޭން ފެށޭވަރުވާނެއެވެ.
