ޖަލަށްލާފައިވާ ޕެރޫގެ ކުރީގެ ރައީސް އަލްބަރޓޯ ފުޖިމޯރީއަށް މިހާރުގެ ލީޑަރ ޕެޑްރޯ ޕަބްލޯ ކުޒިންސްކީ މައާފްދެއްވައިފިއެވެ.

ކުޒިންސްކީގެ އޮފީހުން ނެރުނު ބަޔާނެއްގައި ބުނީ އުމުރުފުޅުން 79 އަހަރުގެ ފުޖިމޯރީއަށް މައާފްދެއްވީ ސިއްހީ ހާލަތަށް ބެލުމަށް ފަހު ކަމަށެވެ. އަދި 1990 އިން 2000 ވަނަ އަހަރާ ހަމައަށް ވެރިކަން ކުރެއްވި ފުރޖިމޯރީ ވަނީ ލޭގެ ޕްރެޝަރު ދަށްވުމާއި ހިތްޕުޅުގެ ވިންދު ބަދަލުވުމާ ގުޅިގެން ދާދިފަހުން ހޮސްޕިޓަލަށް ގެންގޮސް ފަރުވާ ދީފައެވެ.

އިންސާނީ ހައްގުތަކަށް އަރައިގަތުމާ ކޮރަޕްޝަނުގެ މައްސަލައިގައި ފުޖިމޯރީ ގެންދަވަނީ 25 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.

އޭނާއަށް ތާއީދުކުރާ ފަރާތްތަކުން، މާއޮއިސްޓުންނާ ހަނގުރާމަ ކުރެއްވުމުން އޭނާއަށް ތާއީދުކުރާއިރު ފާޑުކިޔާ ފަރާތްތަކުން ސިފަކުރާ ގޮތުގައި އޭނާއަކީ ކޮރަޕްޓް ޑިކްޓޭޓަރެކެވެ.

ވޭތުވެދިޔަ އަހަރުތަކުގައި އޭނާ ވަނީ ސިއްހީ މައްސަލަތަކާ ހުރެ އެތައް ފަހަރެއްގެ މަތިން ހޮސްޕިޓަލުގައި އެޑްމިޓްކޮށްގެން ފަރުވާދީފައެވެ.

ފުޖިމޯރީއަށް މައާފް ދެއްވާފައި މިވަނީ ކޮރަޕްޝަނުގެ ތުހުމަތުގައި ރައީސް ކުޒިންސްކީގެ މައްޗަށް ގާނޫނުހަދާ މަޖިލީހުގައި ނެގުނު އިތުބާރު ނެތްކަމުގެ ވޯޓުން އޭނާ ސަލާމަތްކުރުމަށް ފުޖިމޯރީއަށް ތާއީދުކުރާ ފަރާތްތަކުން އެހީތެރެވެދީފައި ވަނިކޮށެވެ.

އިދިކޮޅު ފަރާތްތަކުން ތުހުމަތުކުރާ ގޮތުގައި ރައީސް ވަނީ ފުޖިމޯރީއަށް ތާއީދުކުރާ ފަރާތްތަކުން މަޖިލީހުގައި ދެއްވި އެއްބާރުލެއްވުމުގެ ބަދަލުގައި އޭނާ މިނިވަން ކުރެއްވުމަށް ކުޒިންސްކީ ވަނީ ވައުދުވެ ވަޑައިގެންފައެވެ. ނަމަވެސް އެ ވާހަކަތަށް ކުޒިންސްކީ ދޮގުކުރައްވައެވެ.

ކުޒިންސްކީގެ މައްޗަށް ފުރަތަމަ ހުކުމް ކޮށްފައި ވަނީ 2007 ވަނަ އަހަރު ރިޝްވަތާއި މަގާމުގެ ނުފޫޒު ނަހަމަ ގޮތުގައި ބޭނުންކުރިކަމުގެ ކުށުގައި ހަ އަހަރަށެވެ. އޭގެ ފަހުން 2009 ވަނަ އަހަރު ވަނީ އެނާގެ ވެރިކަމުގެ ދުވަސްވަރު އެތައް ބަޔަކު މެރުމަށް ހުއްދަދިނުން ފަދަ ކަންކަން ހިމެނޭ ގޮތުން އިންސާނީ ހައްގުތަކަށް އަރައިގެންފައިވާ ކަމަށް ސާބިތުވެ 25 އަހަރުގެ ޖަލުހުކުމެއް ކޮށްފައެވެ.