ވެނެޒުއޭލާގެ ސަރުކާރާ ދެކޮޅު 80 އެކްޓިވިސްޓުން ޖަލުން މިނިވަންކުރަނީ
25 ޑިސެމްބަރު 2017 | ހޯމަ 03:52ސަރުކާރާ ދެކޮޅަށް ކުރި މުޒާހާރާތަކުގައި މި އަހަރު 120 އަށްވުރެ ގިނަ މީހުން މަރާލާފައިވޭ
ހައްޔަރުކުރެވިފައިވާ ފަރާތްތަކުގެ އާއިލާތަކުން އެމީހުން ދޫކޮށްލާތީ އިންތިޒާރުގައި
ވެނެޒުއޭލާގެ ސަރުކާރާ ދެކޮޅަށްކުރި މުޒާހަރާތަކުގައި ޖަލަށްލާފައިވާ އެކްޓިވިސްޓުންގެ ތެރެއިން 80 މީހުން ދޫކޮށްލުމަށް ނިންމާފައިވާ ކަމަށް އެ ގައުމުގެ ސަރުކާރުން ބުނެފިއެވެ.
އެ ގައުމުގެ އެންޖީއޯއަކުން ބުނީ އާދީއްތަ ދުވަހުގެ ހެނދުނާހަމައަށް 36 ގައިދީން ދޫކޮށްލާފައިވާކަމަށެވެ.
އަދިވެސް ބާކީ 150 ގައިދީން ހައްޔަރުކުރެވިފައި އެބަތިއްބެވެ.
"ސިޔާސީ ހައްޔަރީން"ގެ ގޮތުގައި ސިފަކުރާ އެ ގައިދީން ދޫކޮށްލާފައިވަނީ އެ ގައުމުގެ އިދިކޮޅު ފަރާތްތަކުގެ އެދުމުގެމަތިން ކަމަށް އެންޖީއޯ ތަކުން ބުނެއެވެ.
ނަމަވެސް ރައީސް ނިކޮލަސް މަޑޫރޯ ވިދާޅުވީ އެކްޓިވިސްޓުން ޖަލަށްލާފައި ވަނީ ގާނޫނީ އިމުގެތެރެއިން ސައްހަ ދައުވާތަކެއްގެ މައްޗަށްކަމަށެވެ.
އެ ސަރަހައްދުގެ ޓްރޭޑް ގްރޫޕެއްކަމަށްވާ މާކޯޝަރއިންވެސް ވަނީ ގައިދީން ދޫކޮށްލުމަށް ގޮވާލާފައެވެ.
ސަރުކާރާ ދެކޮޅަށް ކުރި މުޒާހާރާތަކުގައި މި އަހަރު 120 އަށްވުރެ ގިނަ މީހުން މަރާލާފައިވެއެވެ.
