އިންޑިއާ އަކީ އަޅުގަނޑުމެންނާއި އެންމެ ގާތް ޤައުމު، އެންމެ ގާތް އެކުވެރިޔާ: ރައީސް ޔާމީން
24 ޑިސެމްބަރު 2017 | އާދީއްތަ 13:36އިންޑިއާއަކީ، ރާއްޖެއާއި އެންމެ ގާތް ޤައުމު
ރައީސް އަބްދުﷲ ޔާމީން، ނ. ވެލިދޫ ރައްޔިތުންނާއި މުހާތަބުކޮށް ވާހަކަދައްކަވަނީ
ރާއްޖެއަށް އެންމެ އެހީތެރިވާ އެއް ޤައުމަކީ އިންޑިއާ ކަމަށާއި، އިންޑިއާއަކީ އަބަދުވެސް އެންމެ ގާތް ޤައުމު ކަމަށް ރައީސުލްޖުމްހޫރިއްޔާ އަބްދުﷲ ޔާމީން ވިދާޅުވެއްޖެ އެވެ.
މިއީ ރައީސް އަބްދުﷲ ޔާމީން އިންޑިއާ އާއި ރާއްޖޭގެ ގުޅުމާއި ގުޅޭގޮތުން ފަހުގެ ތާރީހެއްގައި ވާހަކަދެއްކެވި ފުރަތަމަ ފަހަރެވެ.
ނ. ވެލިދޫ ރައްޔިތުންނާއި ބައްދަލުކޮށް ވާހަކަފުޅު ދައްކަވަމުން ރައީސް ޔާމީން ވިދާޅުވީ ނޫސްވެރިންނާއި ލިޔުންތެރިން ލިޔުންތައް ލިޔުއްވާއިރު ވިސްނަވަންޖެހޭ ކަމަށެވެ. އަދި ޗައިނާއެކު ވެފައިވާ މިނިވަން ވިޔަފާރީގެ އެއްބަސްވުމުގެ ސަބަބުން އިންޑިއާއާއެކު އޮތް ގުޅުމަށް އެއްވެސް ބުރުލެއް ނާރާނެ ކަމަށް ރައީސް ޔާމީން ވިދާޅުވި އެވެ. އެމަނިކުފާނު ވިދާޅުވީ އެ އެއްބަސްވުމުގެ ސަބަބުން އެއްވެސް އެހެން ޤައުމަކާއެކު އޮންނަ ގުޅުމަށް ބުރޫ އަރައިގެންވާނެ ކަމަށް ގަބޫލު ނުކުރައްވާ ކަމަށެވެ.
"އިންޑިއާއަކީ އަޅުގަނޑުމެންނާއި އެންމެ ގާތް ޤައުމު. އަޅުގަނޑުމެންނާއި އެންމެ ގާތް ޤައުމަކީ އިންޑިއާ، އެއީ ޖަމާނުއްސުރެ އެކަން އޮތް ގޮތް. އެހެންވީމައި އަޅުގަނޑުމެން އެއްގޮތަކަށް ވެސް ކޮށްގެންނުވާނެ ކަމަކީ އިންޑިއާ އާއި އިންޑިއާގެ ވެރިންނާއި ސިޔާސީ ބޭފުޅުންނަށް ރައްދުވާ ގޮތަށް ބަދުބަސް ބުނުމަކީ އަޅުގަނޑުމެން ކޮށްގެންވާނެ ކަމެއް ނޫން. ހަމަ ޔަޤީނުން ވެސް އެއީ ސަރުކާރުން ކުރާނެ ކަމެއް ނޫން. އަޅުގަނޑުމެންނަށް އެންމެ އެހީތެރިވެދޭ ޤައުމަކީ އިންޑިއާ." ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ، އިންޑިއާ އާއިއެކު ވެސް ސަރުކާރުން އެއްބަސްވުންތައްވެފައިވާ ކަމަށާއި، އަދި އިންޑިއާއި އެކުގައިވެސް މިނިވަން ވިޔަފާރީގެ އެއްބަސްވުމެއް ޤާއިމް ކުރުމަށް މަސައްކަތް ކުރަމުން އަންނަ ކަމަށެވެ.
އިންޑިއާއަކީ އެންމެ ގާތް އެކުވެރިޔާ ކަމަށް ރައީސް އަބްދުﷲ ޔާމީން ވިދާޅުވިއިރު، އިންޑިއާ ސަފީރާއި ބައްދަލުކުރުމުގެ ސަބަބުން ގއ. އަތޮޅު ކައުންސިލް ވަނީ ސަސްޕެންޑް ކޮށްފަ އެވެ. އަދި އިންޑިއާ ރުޅިއަރުވައި، ޗައިނާއެކު ގާތް ގުޅުންތައް ޤާއިމް ކުރުމަށް ރައީސް ޔާމީންގެ ސަރުކާރުން ގެންދަނީ މަސައްކަތް ކުރަމުންނެވެ.
މިނިވަން ވިޔަފާރީގެ އެއްބަސްވުމާއި ގުޅެގޮތުން އިތުރަށް ވާހަކަފުޅު ދައްކަވަމުން ރައީސް ޔާމީން ވިދާޅުވީ އެ އެއްބަސްވުމުގެ ދަށުން ފައިދާ ކުރަނީ ކޮން ޤައުމަކަށްތޯ ބަލަން ނުޖެހޭ ކަމަށެވެ. އަދި އެއްބަސްވުމުގެ ދަށުން ޤައުމަށް ކިތަންމެ ކުޑަކޮށް ފައިދާވި ނަމަވެސް އެއީ ލިބޭ ފައިދާއެއްގެ ގޮތުގައި ބަލައިގަންނަންޖެހޭ ކަމަށް ރައީސް ވިދާޅުވި އެވެ.
