އިންޑއާގެ އުތުރުގެ ސަރަހައްދެއްގައި 50 މީހުންނާއެކު ބްރިޖެއްގެ މަތިން ދަތުރުކޮށްފައި ދިޔަ ބަހެއް ވެއްޓި މަދުވެގެން 32 މީހުން މަރުވެއްޖެކަމަށް ފުލުހުން ބުނެފިއެވެ.

ބަސް ދުއްވަން އިނީ އުމުރުން 16 އަހަރުގެ ކުއްޖެއް ކަމަށާއި ބަސް ކޮންޓްރޯލުން ނެއްޓި ރެއިލިން ފޫއަޅުވާލުމަށް ފަހު 30 މީޓަރު އުހުން ވެއްޓިފައި ވަނީ ބަނާސް ކޯރަށް ކަމަށް ރިޕޯޓްތައް ބުނެއެވެ.

އިންޑިއާގެ ބައެއް މީޑިއާތައް ބުނާ ގޮތުން ބަސް ދަތުރުކުރަމުން ދިޔައީ ރާޖަސްތާނުން ސަވާއީ މަދްޕޯރ ޑިސްޓްރިކްޓްގައި ހުންނަ ރާމްދޭވްޖީ ހިންދޫ ފައްޅިއަށެވެ.

މަރުވި މީހުންގެ ހަށިތައް ހޯދާފައިވާއިރު ޒަޚްމްވި މީހުންވަނީ ހޮސްޕިޓަލަށް ގެންގޮސްފައެވެ.

ފުލުހުންނާ ހަވާލާދީ ހިންދުސްތާނު ޓައިމްސްއިން ބުނެފައިވަނީ މަރުވި މީހުންގެ ތެރޭގައި ޑްރައިވަރު ވެސް ހިމެނޭކަމަށެވެ. އޭނާއަކީ ތަމްރީން ލިބިފައި ނުވާ ކުޑަކުއްޖެއް ކަމަށް ފުލުހުން ވަނީ ބުނެފައެވެ.

ފުލުހުން ބުނެފައިވަނީ މަރުވި ގިނަ މީހުންނަކީ އަންހެނުންނާއި ކުޑަކުދިންކަމަށާއި އެމީހުން މަރުވެފައިވަނީ ގެނބިގެންކަމަށެވެ.

މީހުން ސަލާމަތްކުރުމުގެ މަސައްކަތްކުރި ފަރާތްތަކުން ވެހިކަލުގެ ތެރޭ ތާށިވެފައި ތިބި މީހުން ނަގާފައިވަނީ ސްޓީލް ކަޓަރުން ވެހިކަލް ކީހާލައިގެންނެވެ. ބަސް ފަހުން ވަނީ ދަމާފަ ކޯރުގެ އައްސޭރިއަށް އަރުވާފައެވެ.

ބޮޑުވަޒީރު ނަރެންދުރަ މޯދީވަނީ މިހާދިސާއާ ގުޅިގެން ހިތާމަ ފާޅުކުރައްވައި މަރުވި މީހުންގެ އާއިލާތަކަށް ތައުޒިޔާ ރައްދުކުރައްވާފައެވެ.

އިންޑިއާގައި މަގުމަތީގެ އެކްސިޑެންޓް އިންތިހާއަށް އާއްމުވެފައި ވާއިރު މިނެޓަކު ހަތަރު އެކްސިޑެންޓް ހިނގައެވެ.

ގިނަ ހާދިސާތައް ހިނގަން ދިމާވެފައިވާ ސަބަބަކީ ވެހިކަލް ރަނގަޅަށް ނުބެލެހެއްޓުމާއި ދުއްވުމުގެ ފެންވަރު ދަށްވުމާއި. މަގުތަކުގެ ފެންވަރު ދަށްވުމުންނެވެ.