ކުރިޔަށް އޮތް ސީޒަނުގައި ވެސް އިރޭ ފެންނާނީ މާޒިޔާ އިން
23 ޑިސެމްބަރު 2017 | ހޮނިހިރު 07:29މާޒިޔާ އިން އަންނަނީ ކުރިޔަށް އޮތް ސީޒަނަށް ޓީމު ވަރުގަދަކުރަމުން
މުހައްމަދު އިރުފާން (ކ) މާޒިޔާގެ އެއްބަސްވުން އާކުރުން
މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ މުހައްމަދު އިރުފާން (އިރޭ) އެ ކްލަބާއެކު ހަދާފައިވާ އެއްބަސްވުން އާކޮށްފިއެވެ.
މާޒިޔާގެ މެދު ތެރޭގައި މުހިންމު ދައުރެއް އަދާކުރަމުން އަންނަ އިރޭ ވަނީ ފާއިތުވެދިޔަ ސީޒަންތަކުގައި އެ ކްލަބުގައި މޮޅު ކުޅުމެއް ދައްކާފައެވެ. އޭނާ ވަނީ އެ ކްލަބާއެކު 2014 ވަނަ އަހަރުގެ އެފްއޭ ކަޕާއި، މިދިޔަ އަހަރުގެ ޕްރެޒިޑެންޓްސް ކަޕް އަދި މިދިޔަ އަހަރުގެ އުރީދޫ ދިވެހި ޕްރިމިއާ ލީގު ވެސް ކާމިޔާބުކޮށްފައެވެ.
މާޒިޔާ ޒުވާން ޓީމުގެ ކެޕްޓަންކަން ކޮށްފައިވާ އިރޭ ވަނީ 2014 ވަނަ އަހަރު ރާއްޖޭގެ އެންމެ އުންމީދީ ފުޓުބޯޅަ ކުޅުންތެރިޔާގެ މަގާމު ވެސް ހޯދާފައެވެ.
މާޒިޔާ އިން އިރޭގެ އެއްބަސްވުން އާކޮށްފައިވާއިރު، އެޓީމުން އަންނަނީ ކުރިޔަށް އޮތް ސީޒަނަށް ޓީމު ވަރުގަދަކުރަމުންނެވެ. އެގޮތުން އެޓީމުން ވަނީ ބައެއް ކުޅުންތެރިންގެ އެއްބަސްވުން އާކޮށް، އިތުރު ކުޅުންތެރިން ހޯދުމަށް މަސައްކަތް ފަށާފައެވެ.
ފާއިތުވެދިޔަ ތިން ސީޒަނުގައި މާޒިޔާގައި މުހިންމު ދައުރެއް އަދާކުރި މުހައްމަދު އުމެއިރު ވަނީ އެ ކްލަބް ދޫކޮށް، ނިއުރޭޑިއަންޓް ސްޕޯޓްސް ކްލަބާ ގުޅިފައެވެ. އެގޮތުން އުމެއިރު ނެތްތަން ފޫބެއްދުމަށް މާޒިޔާއިން ޓީސީ ސްޕޯޓްސް ކްލަބަށް ކުޅެމުން އަންނަ ނާއިޒް ހަސަން (ދާދު) ގެންނަން އުޅޭކަމަށް ދަނީ އަޑުތައް ފެތުރެމުންނެވެ. އެހެންނަމަވެސް މިކަން އެ ދެ ކްލަބުން ވެސް ދޮގުކުރެއެވެ.
