ރާއްޖޭގައި އަތްގަދަކުރަނީ އިންޑިއާއަށް ރައްދު ދިނުމުގެ ގޮތުން: ޗައިނާ
21 ޑިސެމްބަރު 2017 | ބުރާސްފަތި 00:09މިވާހަކަ ލިޔެފައިވަނީ ޗައިނާގެ އަސްކަރީ ޚަބަރުތަކާއި މައުލޫމަތު ގެެނެސްދޭ ވެބްސައިޓެއްގައި
ޗައިނާއިން ލޯނު އެހީގެ ދަށުން އަޅައިދޭ ބްރިޖް
އިންޑިއާ ކަނޑުގައި ހިމެނޭ ދިވެހިރާއްޖެއާއި އަވަށްޓެރި ސްރީލަންކާގައި ޗައިނާއިން އިންވެސްޓްކޮށް، މިސަރަހައްދަށް އަތް ގަދަކުރަމުންދަނީ އިންޑިއާއިން ޗައިނާގެ ސަލާމަތަށް ނުރައްކާކުރުމުންކަމަށް، އަސްކަރީ ޚަބަރާއި މައުލޫމާތު ގެނެސްދޭ ޗައިނާގެ ވެބްސައިޓަކުން ބުނެފިއެވެ.
ޒިލޫ.ކޮމް ގައި ލިޔެފައިވާ ލިޔުމެއްގައިވަނީ ޗައިނާއިން ރާއްޖެއާއި ލަންކާގެ މައްޗަށް އަތްގަދަކޮށް، އިންޑިއާ ސިއްސުވާލައިފިކަމަށެވެ. ނަން ހާމަކޮށްފައިނުވާ ބައެއް ތަޖުރިބާކާރުންނާއި ހަވާލާދީ އެވެބްސައިޓްގައި ބުނެފައިވަނީ އިންޑިއާއިން ކަންބޮޑުވަނީ ރާއްޖެއާއި ލަންކާއާއިއެކު ޗައިނާއިން ވިޔަފާރީގެ ގުޅުން ބަދަހިކުރުމުން ނޫންކަމަށާއި، އަސްކަރީ އަދި ސްޓްރެޓީޖިކް ގުޅުން ބަދަހިކުރުމުންކަމަށެވެ. އަދި މިއީ ފެށުމެއްކަމަށްވެސް އެފަރާތްތަކާއި ހަވާލާދީ އެވެބްސައިޓްގައި ބުނެފައިވެއެވެ.
ޑިސެމްބަރު މަހުގެ 7 ވަނަ ދުވަހު ރާއްޖެއިން ޗައިނާއާއިއެކު، ރާއްޖޭގައި ޗައިނާގެ ކަނޑުގެ ދިރާސާކުރާ މަރުކަޒެއް ޤާއިމްކުރުމަށް ވަނީ އެއްބަސްވެފައެވެ. އަދި އޭގެ 2 ދުވަސްފަހު ޑިސެމްބަރު 9ވަނަ ދުވަހު ލަންކާއިން ވަނީ ލަންކާގެ ދެކުނުގެ ހަންބަންތޯޓާ ބަނދަރު ޗައިނާއަށް 99 އަހަރަށް ވިއްކާލާފައެވެ.
އިންޑިއާއިން ޗައިނާގެ ދިފާޢަށް ނުރައްކާކުރަމުންދާތީ، އެކަމުގެ ބަދަލު ހިފުމެއްގެ ގޮތުން އިންޑިއާ ކަނޑަށް ޗައިނާއިން އަތްގަދަކުރަމުންދާކަމަށް ޗައިނާއިން ބުނެފައިވާއިރު، މެލޭޝިއާގެ ސްޓްރެއިޓް އޮފް މަލާކާގައި އިންޑިއާއިން ދާދި ފަހުން ވަނީ ވަރުގަދަ އަސްކަރީ ތަމްރީންތަކެއް ބާއްވާފައެވެ. އަދި ޗައިނާ އައި އިންޑިއާ ގުޅޭ ސަރަހައްދީ ރޮނގުގައިވެސް އިންޑިއާއިން ވަނީ އޮޕަރޭޝަންތަކެއް ހިންގާފައެވެ.
ރާއްޖެއިން މިމަހުގެ ކުރީކޮޅު ޗައިނާއާއިއެކު މިނިވަން ވިޔަފާރީގެ އެއްބަސްވުމެއް ޤާއިމްކޮށްފައިވާއިރު، އިންޑިއާއިން ބުނަމުންދަނީ ރާއްޖެއިން އިންޑިއާއަށް އިސްކަންދޭނެކަމަށް އަދިވެސް އުއްމީދުކުރާކަމަށެވެ.
