ޕްރައިމަރީއަކުން \"ގައުމީ ކެންޑިޑޭޓަކު\" ނެރުމަށް ގާސިމް ތާއިދުކުރޭ: އަލީ ވަހީދު
ގުޅިފައިވާ ޕާޓީތަކުން އެއްބައިވަންތަ ސަރުކާރެެއް ގާއިމު ކުރުމަށް ނަޝީދުވަނީ ގޮވާލައްވާފައި
ގާސިމް އިބްރާހިމް
ގުޅިފައިވާ ޕާޓީތަކުގެ މެދުގައި ޕްރައިމަރީއެއް ބާއްވައިގެން "ގައުމީ ކެންޑިޑޭޓަކު" ނެރުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ތާއިދު ކުރައްވާ ކަމަށް، ގާސިމާ ބައްދަލުކުރެއްވުމަށް ފަހު، އެމްޑީޕީގެ ކުރީގެ ޗެއާޕާސަން އަލީ ވަހީދު ވިދާޅުވެއްޖެ އެވެ.
އިނގިރޭސި ވިލާތަށް އަމިއްލަ އަށް އަރުވާ ލެއްވިގެން ހުންނެވި އަލީ ވަހީދާއި ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު އަދި ޖުމްހޫރީ ޕާޓީގެ ނައިބު ލީޑަރު އަމީން އިބްރާހިމް، ޖަރުމަނުވިލާތަށް ވަޑައިގެން ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ ބުދަ ދުވަހު ވަނީ ބައްދަލު ކުރައްވައިފަ އެވެ.
އެ ބައްދަލު ކުރެއްވުމަށް ފަހު އަލީ ވަހީދު ކުރެއްވި ޓްވީޓެއްގައި ވިދާޅުވެފައި ވަނީ ހަތަރު ޕާޓީ އަށް އިންސާފުވެރި ހަމަހަމަ ޑިމޮކްރެޓިކް ޕްރައިމަރީއަކުން ގައުމީ ކެންޑިޑޭޓެއް އިންތިހާބުކުރަން ގާސިމް އިބްރާހިމް ތާއިދު ކުރެއވީތީ އުފާކުރަައްވާ ކަމަށެވެ. އަދި ޕާޓީތަކުގެ މެދުގައި މަޝްވަރާކޮށްގެން މިކަމުގައި ގޮތެއް ނިމިއްޖެ ނަމަ "ދަރު ނުވެވޭ ވަރަށް ކައިރި ނުވެ، ކައިރި ނުވެވޭ ވަރަށް ދުރުނުވެ" ގައުމާއި ރައްޔިތުންގެ މަސްލަހަށް އިސްކުރަންޖެހޭ ކަމަށް ކަމަށް ވެސް އޭނާ ވިދާޅުވި އެވެ. މީގެ އިތުރުން ގާސިމްވެސް ވަނީ އެއްބައިވަންތަ ސަރުކާރެއް ގާއިމު ކުރުމަށް ރައްޔިތުންގެ އެއްބާރުލުން ބޭނުންވާ ކަމަށް ވިދާޅުވެފަ އެވެ.
އެއް ކެންޑިޑޭޓަކު ނެރުމާ ގުޅޭ ގޮތުން ޕާޓީތަކުގެ މެދުގައި މަޝްވަރާ ކުރަމުން ދިޔަ ނަމަވެސް، އެކަމާމެދު އަދިވެސް ގޮތެއް ނުނިންމެ އެވެ. ގުޅިފައިވާ ޕާޓީތަކުން އެއްބައިވަންތަ ސަރުކާރެެއް ގާއިމު ކުރުމަށް ރިޔާސީ އެއް ކެންޑިޑޭޓަކު ނެރި، އިންތިގާލީ ވެރިކަމެއް ގާއިމު ކުރުމަށް ކުރީގެ ރައީސް މުހައްމަދު ނަޝީދު ވެސް ވަނީ ގޮއްވާލައްވާފަ އެވެ. އަދި އެމަނިކުފާނު ވިދާޅުވަމުން ގެންދަވަނީ ރިޔާސީ އިންތިހާބުގައި ވާދަ ކުރެއްވޭނެ ކަމަށެވެ.
