ދައުލަތުގެ ރިޒާވް އާއި ގުޅޭގޮތުން ރައްޔިތުންގެ މެދުގައި ކަންބޮޑުވުން އުފެދޭގޮތަށް މައުލޫމާތު ނުފެތުރުމަށް އެމްއެމްއޭ އިން ގޮވައިލައިފި
ދައުލަތުގެ ރިޒާވާ ގުޅޭގޮތުން މީޑިއާތަކުގައި ފެތުރެމުންދަނީ ސައްހަނޫން މައުލޫމާތުތަކެއް
މޯލްޑިވްސް މަނިޓަރީ އޮތޯރިޓީ
ދައުލަތުގެ ރިޒާވް އާއި ގުޅޭގޮތުން ރައްޔިތުންގެ މެދުގައި ކަންބޮޑުވުން އުފެދޭގޮތަށް މައުލޫމާތު ނުފެތުރުމަށާއި އެމްއެމްއޭއިން ޝާއިޢުކުރާ ރިޕޯޓްތަކުގައި ހިމެނޭ މައުލޫމާތުތައް މާނަ އޮޅޭފަދަ ގޮތަކަށް ބޭނުން ނުކުރުމަށް މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިލްތިމާސް ކޮށްފިއެވެ.
އެމްއެމްއޭ އިން މިގޮތަށް އިލްތިމާސް ކޮށްފައި މި ވަނީ އެމްއެމްއޭއިން ޝާޢިއު ކޮށްފައިވާ 2017 ވަނަ އަހަރުގެ ތިންވަނަ ކުއާޓަރުގެ "ކުއާޓަލީ އިކޮނޮމިކް ބުލެޓިން" ގައި ރިޒާވް އާއި ގުޅޭގޮތުން މީޑިއާގައި ދައުރުވަމުންދާ މައުލޫމާތުތަކާ ގުޅިގެންނެވެ.
އެގޮތުން ދައުލަތުގެ ރިޒާވް އާއި ގުޅޭގޮތުން ހަގީގަތް އޮޅޭފަދަ ގޮތަކަށް ބައެއް މީޑިއާތަކުން ރިޕޯޓްކުރަމުން ދާކަމަށް ވަރަށް ހިތާމަޔާއެކު ފާހަގަކުރާ ކަމަށް އެމްއެމްއޭ އިން ނެރުނު ބަޔާނުގައި ބުނެފައިވެއެވެ.
އެމްއެމްއޭގެ ބަޔާނުގައި ބުނެފައިވާ ގޮތުގައި ދައުލަތުގެ ރިޒާވް އަކީ މަހުން މަހަށް ބަދަލު އަންނަމުން ދާ އެއްޗެކެވެ. މިފަދަ ބަދަލުތައް މައިގަނޑު ގޮތެއްގައި ބިނާވަނީ ބޭންކުތަކުން އެމްއެމްއޭގައި ބަހައްޓާ ޑިޕޮސިޓާއި ޔޫޒަބަލް ރިޒާވަށް އަންނަ ބަދަލުތަކަށް ކަމަށް އެ އޮތޯރިޓީގެ ބަޔާނުގައި ބުނެފައިވެއެވެ.
ހަމައެހެންމެ ޔޫޒަބަލް ރިޒާވަށް އަންނަ ބަދަލުތައް މައިގަނޑު ގޮތެއްގައި ބިނާވެގެން ވަނީ ސަރުކާރާއި އެމްއެމްއޭއަށް ލިބޭ ބޭރު ފައިސާގެ އާމްދަނީއާއި އަދި އެމްއެމްއޭއިން ބޭރު ފައިސާގެ މާކެޓަށް ވިއްކާ ޑޮލަރާއި ސަރުކާރުގެ ބޭރު ފައިސާގެ ޕޭމަންޓްތައް ހެދުމަށް ވިއްކާ ޑޮލަރަށް ކަމަށް އެމްއެމްއޭގެ ބަޔާނުގައި ފާހަގަ ކޮށްފައިވެއެވެ.
މިގޮތުން ތިންވަނަ ކުއާޓަރުގެ ބުލެޓިންގެ ޗާޓު 10 އިން ދައްކުވައިދޭ ފަދައިން ދައުލަތުގެ ރިޒާވް މި އަހަރުގެ ފުރަތަމަ ހަ މަސް ދުވަހުގެ ތެރޭގައި ރިޒާވް މައްޗަށް ގޮސްފައިވާކަން ފާހަގަކޮށްފައިވެއެވެ. އަދި ޖުލައި މަހުން ފެށިގެން ދައުލަތުގެ ރިޒާވް ކޮންމެވެސް މިންވަރަކަށް ދަށްވެފައިވާ ކަމަށާއި އެހެން ނަމަވެސް، 2017 ވަނަ އަހަރު ނިމޭއިރު ދައުލަތުގެ ރިޒާވް 2016 ވަނަ އަހަރަށް ވުރެން އިތުރުވެ، 480.1 މިލިއަން ޑޮލަރަށް އިތުރުވާނެ ކަމަށް ލަފާކުރެވޭ ކަމަށް އެމްއެމްއޭގެ ބަޔާނުގައި ބުނެފައިވެއެވެ. އަދި 2018 ވަނަ އަހަރު ނިމޭއިރު މި އަދަދު 593.6 މިލިއަން ޑޮލަރަށް އިތުރުވާނެކަމަށް ވެސް އެމްއެމްއޭ އިން ލަފާކުރެވެއެވެ.
އިގްތިސާދުގެ އެހެނިހެން ބައިތަކަށް ބަލާއިރު، މެދު ރާސްތާގައި ރާއްޖޭގެ އިގްތިސާދު ކުރިއަރާނެ މިންވަރު ހަލުއިވެ އުފެއްދުންތެރިކަން އިތުރުވެގެންދާނެ ކަމަށް ބެލެވޭ ކަމަށް ވެސް އެމްއެމްއޭގެ ބަޔާނުގައި ބުނެފައިވެއެވެ. އަދި ބާޒާރުގައި މުދަލާއި ޚިދުމަތުގެ އަގުތައް އެއް މިންވަރެއްގައި ހިފެހެއްޓި، އުފެއްދުންތެރިކަމުގެ ނިސްބަތުން ބަލާއިރު ކަރަންޓް އެކައުންޓް ޑެފިސިޓް ދަށްވާނެކަމަށް ވެސް އަންދާޒާކުރެވޭ ކަމަށް ބަޔާނުގައި ބުނެފައިވެއެވެ. އެހެންކަމުން ޖުމްލަ ގޮތެއްގައި ރާއްޖޭގެ އިގްތިސާދީ އަދި މާލީ ހާލަތު އިތުރަށް ރަނގަޅުވެގެންދާނެ ކަމަށް އެމްއެމްއޭއަށް ލަފާކުރެވޭ ކަމަށް އެ އިދާރާއިން އަންގާރަ ދުވަހުގެ ރޭ ނެރުނު ބަޔާނުގައި ބުނެފައިވެއެވެ.
މަރުކަޒީ ބޭންކުގެ ބަޔާނުގައި ބުނެފައިވާ ގޮތުގައި އެމްއެމްއޭއިން ޝާޢިއުކުރާ ރިޕޯޓްތަކުގެ މަގްސަދަކީ އިގްތިސާދީ ދާއިރާ އާއި މާލީ ދާއިރާއާ ގުޅޭގޮތުން އާންމުންގެ ތެރެއިން ވީހާވެސް ގިނަ ބަޔަކަށް މައުލޫމާތު ފޯރުކޮށްދީ ހޭލުންތެރިކޮށް ތަފާސްހިސާބުތައް ވަގުތުން ވަގުތައް ފޯރުކޮށްދިނުމެވެ. އަދި މި ރިޕޯޓްތަކުގައި ހިމެނޭ މައުލޫމާތުތައް އެކުލަވާލުމުގައި އެމްއެމްއޭއިން ގެންދަނީ ވަކި މިންގަނޑުތަކެއް ހިފަހައްޓަމުން ކަމަށް ބުނެފައިވެއެވެ.
