މަސްވެރިންގެ ޝަކުވާތައް އަހާނެ މީހަކު ފިޝަރީޒް މިނިސްޓްރީގައެއް ނެތް: ޑރ. އިބްރާހިމްދީދީ
ފްރީ ޓްރޭޑް އެގްރީމަންޓުގެ ސަބަބުން ރާއްޖޭގެ މަސްވެރިންނަށް އިތުރު ނިކަމެތި ކަމެއް ލިބިގެންދާނެ
ރާއްޖެޓީވީގެ ބޮޑު ސުވާލު ޕްރޮގްރާމުގައި ކުރީގެ ޕިޝަރީޒް މިނިސްޓަރު ޑރ. އިބްރާހީމް ދީދީ
ރާއްޖޭގެ މަސްވެރިންގެ ޝަކުވާތައް އަހާނެ މީހަކު ޕިޝަރީޒް މިނިސްޓްރީގައި ނެތް ކަމަށް ކުރީގެ ޕިޝަރީޒް މިނިސްޓަރު ޑރ. އިބްރާހީމް ދީދީ ވިދާޅުވެއްޖެއެވެ.
ރާއްޖެޓީވީގެ ބޮޑު ސުވާލު ޕްރޮގްރާމުގައި ވާހަކަ ދައްކަވަމުން ޑރ. އިބުރާހިމްދީދީ ވިދާޅުވީ މަސްވެރިންގެ ކަންބޮޑުވުންތަކަށް ސަރުކާރުން އަޅާ ނުލާ ކަމަށެވެ. އަދި އެމްޑީޕީ ސަރުކާރުން މަސްވެރިންނަށް ދެމުންދިޔަ ސަބްސިޑީވެސް މި ސަރުކާރުން ކަނޑާލާފައިވާ ކަމަށާއި މަހުގެ އަގު ވެސް ދަށް ކޮށްފައިވާ ކަމަށް ޑރ. އިބުރާހިމްދީދީ ވިދާޅުވިއެވެ.
ބެޔަސް ނުބެޔަސް މަސްވެރިންނަށް މި ސަރުކާރުން ދޭން ބުނި ދިހަ ހާސް ރުފިޔާގެ ވައުދަކީ މި ސަރުކާރުން ވި ސިޔާސީ ވައުދެއް ކަމަށް ޑރ. އިބުރާހިމްދީދީ ވިދާޅުވިއެވެ.
"މިއަދު ކިތަންމެ ވަރަކަށް ރައްޔިތުންނަށް އޮޅުވާލަން މަސައްކަތް ކުރިޔަސް ރައްޔިތުން މާ ކުރީގައި އެ ތިއްބެވީ. ދިވެހި މަސްވެރިންނަކީ އެއަށްވުރެ މާ ހޭލުންތެރި ބައެއް. އެހެންވީމަ ރައްޔިތުންނަށާއި މަސްވެރިންނަށް އޮޅުވާލަން މި ސަރުކާރުން މަސައްކަތް ކުރިއެއް ކަމަކު، މިއަދު ފިޝަރީޒް މިނިސްޓަރު ފެއިލް ވެވަޑައިގެން ހުންނެވިކަން މަސްވެރިން އެބަ ގަބޫލުކުރޭ. އެހެންވީމަ މަސްވެރިކަމާއި ބެހޭ ވަޒީރާ މަތިކޮށްފައިވާ ގާނޫނީ މަސްއޫލިއްޔަތު އަދާ ނުކުރެވި، މުޅިން އެހެން ސިޔާސީ ވާހަކަތަކެއް ރައްޔިތުންނަށް އޮޅުވާލަން ދެއްކީމަ ކާކުތޯ ގަބޫލުކުރާނީ" ޑރ. އިބުރާހިމްދީދީ ވިދާޅުވިއެވެ.
ރާއްޖެއިން ޗައިނާ އާއިއެކު ގާއިމްކުރެވުނު ފްރީ ޓްރޭޑް އެގްރީމަންޓުގެ ސަބަބުން ރާއްޖޭގެ މަސްވެރިންނަށް އިތުރު ނިކަމެތި ކަމެއް ލިބިގެންދާނެކަން ޑރ. އިބުރާހިމް ދީދީ ފާހަގަކުރެއްވިއެވެ. އަދި މަހަށް ލިބޭ ހަމަ އަގުވެސް ލިބިގެން ނުދާނެ ކަމަށް އޭނާ ވިދާޅުވިއެވެ.
ދިވެހި މަސްވެރިންނަށް އެންމެ ބޮޑު ހިނިތުންވުމެއް ގެނެސްދިނީ އެމްޑީޕީ ސަރުކާރުން ކަމަށް ޑރ. އިބްރާހިމްދީދީ ފާހަގަކުރެއްވިއެވެ.
ޑރ. އިބްރާހިމްދީދީ ވަނީ މި ސަރުކާރުން މަސްވެރިންނާއި ދޭތެރޭ އަމަލު ކުރަމުންދާ ގޮތަށް ވަރަށް ބޮޑަށް ފާޑު ވިދާޅުވެފައެވެ.
