ހއ. ދިއްދޫ ގޮނޑުދޮށުގައި މީހަކު މަރުވެފައި އޮއްވާ ފެނިއްޖެ
ފުލުހުން ރިޕޯޓް ކޮށްފައި ވަނީ މިއަދު ހެނދުނުގެ ވަގުތެއްގައި
ހއ. ދިއްދޫ
ހއ. ދިއްދޫ ގޮނޑުދޮށުގައި މީހަކު މަރުވެފައި އޮއްވާ ފެނިއްޖެއެވެ.
ރާއްޖެއެމްވީ އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ދިއްދޫ އިރުމަތީ ފަރާތު މޫދުގައި އުމުރުން 80 އަހަރުގެ ދިވެހި އަންހެނަކު މަރުވެފައި އޮއްވާ ފެނިގެން ރިޕޯޓް ފުލުހުންނަށް ކޮށްފައި ވަނީ ހެނދުނު 9:10 ހާއިރު ކަމަށެވެ.
ނަމަވެސް އަންހެން މީހާގެ ހަށިގަނޑު ފެނިފައި ވަނީ ކިހާއިރަކު ކަމެއް އަދި ފެނުނީ ކޮން ބަޔަކަށް ކަމެއް ފުލުހުން ހާމައެއް ނުކުރެއެވެ.
އޮފިޝަލް ވިދާޅުވީ ފުލުހުން ބަލަން ޖެހޭ ކަންކަން ބެލުމަށް ފަހު އެ އަންހެން މީހާގެ ހަށިގަނޑު މިހާރު އާއިލާއާ ހަވާލު ކޮށްފައިވާ ކަމަށެވެ. ނަމަވެސް ފުލުހުން ބަލާފައި ވަނީ ކޮން ކަންތައްތަކެއް ކަމެއް ހާމަކޮށްފައެއް ނުވެއެވެ. އަދި އަންހެން މީހާގެ ހަށިގަނޑަށް އެއްވެސް ގެއްލުމެއް ލިބިފައިވާކަން ނުވަތަ ނޫންކަން ފުލުހުން ހާމަކޮށްފައެއް ނުވެއެވެ.
މީގެ އިތުރުން އޮފިޝަލް ވިދާޅުވީ އެ މައްސަލަ މިހާރު ފުލުހުން ތަހުގީގު ކުރަމުންދާ ކަމަށެވެ.
