ކެނޑިޑޭޓެއް ނެރުމަށް އަދި ލަހެއް ނުވޭ، އެއް ކެނޑިޑޭޓަކު ނެރެވޭނެ: ރައީސް ނަޝީދު
އެއް ކެނޑިޑޭޓަކު ނެރުމުގެ މަޝްވަރާތައް އަދިވެސް ކުރިއަށްދޭ
2013 ވަނަ އަހަރު ރިޔާސީ އިންތިހާބުގެ ކެމްޕޭން އެއްވުމެއްގައި ރައީސް މުހައްމަދު ނަޝީދު
ކުރިއަށް އޮތް 2018 ވަނަ އަހަރު ރިޔާސީ އިންތިހާބަށް ކެނޑިޑޭޓަކު ނެރުމަށް އަދި ލަސްނުވާކަމަށާއި، ގުޅިފައިވާ ސިޔާސީ ޕާޓީތަކަށް އެއް ކެނޑިޑޭޓަކު ނެރެވޭނެކަމުގެ ޔަޤީންކަން ވަރަށް ބޮޑުކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ލަންކާގައި ހުންނަވާ ރާއްޖެ ޓީވީއަށް ދެއްވި އެކްސްލޫސިވް އިންޓަވިއުއެއްގައި ރައީސް މުހައްމަދު ނަޝީދު ވިދާޅުވީ، 2008 ވަނަ އަހަރުގައި އެމްޑީޕީން ކެނޑިޑޭޓަކު ނެރުނު ތާރީޚާއި، 2013 ވަނަ އަހަރު އެމްޑީޕީން ކެނޑިޑޭޓަކު ނެރުނު ތާރީހަށް ބަލާލުމުން ކެނޑިޑޭޓަކު ނެރުމަށް އަދި ލަސްނުވާކަމަށް ދެކިވަޑައިގަންނަވާކަމަށެވެ. އަދި ގުޅިފައިވާ ސިޔާސީ ޕާޓީތަކުން ކެނޑިޑޭޓަކު ނެރުމަށްވެސް ލަސްކަމަށް އަދި ޤަބޫލުނުކުރައްވާކަމަށް ރައީސް ނަޝީދު ވިދާޅުވި އެވެ.
"އަޅުގަނޑުދެކޭގޮތުގައި އަޅުގަނޑުމެންނަށް އެއްބަސްވުމަކަށް އާދެވޭނެ. ކެނޑިޑޭޓަކު ކަނޑައަޅާނެ ގޮތް. އެހެންވީމަ ގުޅިފައިވާ ޕާޓީތަކުން ކެނޑިޑޭޓު، އެއް ކެނޑިޑޭޓެއް ނެރުމުގެ ފުރުސަތު، ނުކުތުމުގެ ފުރުސަތު އަޅުގަނޑު ދެކޭގޮތުގައި އަދިވެސް ވަރަށް ބޮޑު. ހާއްސަކޮށް މިކަން ފާހަގަކުރައްވަންޖެހޭނެ." ކެނޑިޑޭޓަކު ނެރުމާއި ގުޅޭގޮތުން ކުރި ސުވާލުގެ ޖަވާބުގައި ރައީސް ނަޝީދު ވިދާޅުވި އެވެ.
ރައީސް މުހައްމަދު ނަޝީދު ވިދާޅުވީ ރިޔާސީ އިންިތހާބަށްދާއިރު އެންމެ މުހިންމު ކަމަކީ އިންތިހާބަކީ މިނިވަން އިންސާފުވެރި އިންތިހާބެއްކަން ކަށަވަރުކުރުމުގެ މަސައްކަތްކަމަށެވެ. އަދި ރައްޔިތުން އެދޭ ނަތީޖާ ނެރުމަށް އިންތިހާބަކީ މިނިވަން، އިންސާފުވެރި، އިންތިހާބަކަށް ވާންޖެހޭނެ ކަމަށް ރައީސް ނަޝީދު ވިދާޅުވި އެވެ.
ރައީސް މުހައްމަދު ނަޝީދު ވިދާޅުވީ މިނިވަން އިންސާފުވެރި އިންތިހާބެއް ހޯދުމުގެ މަސައްކަތްތައްކުރާއިރު އެކަމުގައި ބޭރުގެ ފަރާތްތަކުގެ ބޮޑު އެހީތެރިކަމެއް ލިބިގެން ދާނެކަމަށެވެ. އަދި ބޭރުގެ ފަރާތްތަކުގެ މަސައްކަތްތައް ކުރިއަށް އޮތް 3 މަސް ދުވަހުގެ ތެރޭގައި ފެނިގެންދާނެ ކަމަށްވެސް ރައީސް މުހައްމަދު ނަޝީދު ވިދާޅުވި އެވެ.
"އަޅުގަނޑު ދެކޭގޮތުގައި ރައްޔިތުން ނޭދޭ ރައީސް ޔާމީންގެ ވެރިކަމަކަށް. އެހެންކަމުން އެ ވެރިކަން ބަދަލުވުމަށް، ރައްޔިތުން އެދޭ ނަތީޖާ ނިކުތުމަށް އިންތިހާބު އިންސާފުވެރި ވާންޖެހޭ. އިންތިހާބު އިންސާފްވެރި ކުރުމަށް އަޅުގަނޑުމެންނަށް ކުރެވެން ހުރި މަސައްކަތަކީ ކޮބައިތޯ ބަލަންޖެހޭ. އެ ސުވާލަށް ވިސްނާއިރު އެނގިވަޑައިގަންނަވާނެ ބޭރުގެ ފަރާތްތަކުގެ ބާރު އެޅުން ދިވެހި ސަރުކާރުގެ މައްޗަށް އަދި އިލެކްޝަންސް ކޮމިޝަންގެ މައްޗަށް އަންނާނެ. އިންސާފުވެރި އިންތިހާބެއް ރާއްޖޭގައި ބޭއްވުމަށް އެ ފަރާތްތަކުން އެހީތެރިވެދޭނެ" ރައީސް ނަޝީދު ވިދާޅުވި އެވެ.
