ކުރީގެ ދެ ސަރުކާރަކުން ކަންކުރި ގޮތް ރައްޔިތުންނަށް ފެނިއްޖެ ކަމަށާއި އެހެން ޕާޓީއަކަށް ވެރިކަން ހޯދައިދޭން މަސައްކަތް ކުރާ ޕާޓީއަކަށް ޖުމްހޫރީ ޕާޓީ ވާން ނުޖެހޭ ކަމަށް ޖުމްހޫރީ ޕާޓީއާ އެނބުރި ގުޅިވަޑައިގެންނެވި ކުރީގެ ހޯމް މިނިސްޓަރު، އުމަރު ނަސީރު ވިދާޅުވެއްޖެއެވެ.
ޖުމްހޫރީ ޕާޓީގެ ސްލޮޓެއްގައި މި ސަރުކާރުގެ ހޯމް މިނިސްޓަރު ކަމަށް ވަޑައިގެންނެވުމަށް ފަހު ސަރުކާރު ކޯލިޝަނުން ޖޭޕީ ބޭރުކޮށްލުމުން ވެސް ރައީސް ޔާމީން ސަރުކާރުގައި ދެމިހުންނެވި އުމުރު، އަލުން އަނބުރާ ބުރާސްފަތި ދުވަހު ވަނީ ޖޭޕީއަށް ސޮއިކުރައްވާފައެވެ. ސޮއިކުރެއްވުމަށް ފަހު ވިދާޅުވީ މިއަދު ޖުމްހޫރީ ޕާޓީއަކީ ރާއްޖޭގައި އޮތް ތިން ވަނަ އަށް އެންމެ ބޮޑު ޕާޓީ ކަމަށާއި ޖުމްހޫރީ ޕާޓީން މިއަދު ވިސްނަންވީ އެގޮތުގައި އޮންނާނީތޯ ނުވަތަ އެއްވަނަ ޕާޓީއަށް ވާނީތޯ ކުރެވޭ ސުވާލު ކަމަށެވެ. ނޫން ނަމަ އެހެން ޕާޓީއަކަށް ވެރިކަމަށް ގެނައުމަށް ޣުލާނު ކުރަން އޮންނާނީތޯ އުމަރު ވަނީ ސުވާލުކުރައްވާފައެވެ.
އުމަރު ވިދާޅުވީ ޕާޓީތައް ވެރިކަމަށް ގެނައުމުގައި ފާއިތުވި ނުވަ އަހަރު ޖޭޕީން ކޮށްފައި ވަނީ ވަރަށް ހިތި ތަޖުރިބާއެއް ކަމަށެވެ. އަދި ޖޭޕީއަކީ މީހުން ވެރިކަމަށް ގެންނަ ޕާޓީއެއް ކަމަށް ވެސް އުމަރު ސިފަކުރެއްވިއެވެ.
"މިހިތި ތަޖްރިބާ ތަކުރާރުކުރަން ބޭނުން ނޫން ނަމަ މިޕާޓީއަށް މަޖްބޫރުވާނީ މުޅިން އާ މިސްރާބަކަށް މި ޤައުމު ގެންދިއުމަށްޓަކައި ފަލިތައް އަތަށް ނަގައި، ރިޔާތައް ނިއުޅާލައިގެން 2018 އަށް ދެގޮތެއް ނުވެ ދަތުރުކުރަން ފެށުން. އެހެން ނޫނީ ކުރިން ކުރި ތަޖްރިބާ އަދި ކުރަން ޖެހިދާނެ،" އުމަރު ވިދާޅުވިއެވެ.
އިސްލާހީ މަސައްކަތުގައި ކޯލިޝަނާ އެކު މަސައްކަތް ކުރަން ބޭނުން ނުވަނީ އެމްޑީޕީ ކޯލިޝަންގައި އޮތުމުން ކަމަށް ކުރިން ވިދާޅުވި އުމަރު ވިދާޅުވީ ކޯލިޝަނުން އެއް ކެނޑިޑޭޓަކު ނެރުމަށް އޮތް ހުރަކީ އެކަން ކުރާނެ ފޯމިއުލާއެއް ނެތުން ކަމަށެވެ. އެކަމަކު ފޯމިއުލާއެއް އެބަ އޮތް ކަމަށާއި އެއީ ތިންވަނަ ފަރާތަކަށް ޚާއްޞަ މަޖިލީހުގެ ރައީސްކަން ދީގެން ޤާނޫނު އަސާސީ ނިންމި ފޯމިއުލާ ކަމަށެވެ. އިދިކޮޅު ކޯލިޝަނުން ކެންޑިޑޭޓެއް ކަނޑަނޭޅި ހޭދަވާ ކޮންމެ ދުވަހަކީ ދެން ވާދަކުރާ ފަރާތަކަށް ލިބިގެންދާ ކާމިޔާބެއް ކަމަށާއި އޭގެ ގެއްލުން އިދިކޮޅު ފަރާތްތަކަށް ކުރާނެ ކަމަށް އުމަރު ވިދާޅުވިއެވެ.
ރައީސް ޔާމީނާ ގުޅޭ ގޮތުން ޕްރައިމަރީގައި ދެއްކެވި ވާހަކަތައް ވަޒީރުކަން ދިފާއު ކުރައްވަން މަޖިލީހުގައި އަނބުރާލެއްވި އުމަރު ނަސީރު ވިދާޅުވީ އަނެއް ދެ ޕާޓީން ކުރި ވެރިކަން ރައްޔިތުންނަށް ފެނިއްޖެ ކަމަށާއި އެދެސަރުކާރުން ހެދި މިސްޓޭކްތައް ހަދާތޯ ބަލަން ވެސް ޖޭޕީ ވެރިކަމަށް އަންނަން ވެއްޖެ ކަމަށެވެ.
"ފެހި ޤާނޫނު އަސާސީ ރާއްޖެއަށް އައުމަށް ފަހު މިއުފެދުނު ހުރިހާ ސަރުކާރުތަކުން ވެސް "ފެހި" ޤާނޫނު އަސާސީގެ ބޭރުން އެކިކަންކަން ކުރައްވައި އަދި އޭގެ ހިތި ނަތީޖާއާ އެފަރާތްތަކަށް ފަހުން ބަދަލު ވެފައިވާތީ، ދިވެހި ރައްޔިތުންގެ ވަރަށް ގިނަ ބައެއްގެ އުއްމީދަކީ މި ޕާޓީގެ ލީޑަރ ޤާސިމް އިބްރާހީމްގެ ލީޑަރޝިޕްގެ ދަށުގައި ގެނެވުނު ޤާނޫނު އަސާސީގެ މަތީގައި މި ޕާޓީ ވެރިކަން ކުރާގޮތް ދުށުން. ރައްޔިތުން ވަނީ އަނެއް ދެޕާޓީގެ ވެރިކަން ތަޖުރިބާ ކޮށްފަ. އެހެންވެ ދިވެހިންގެ އެތައް ބަޔަކު މިއަދު ބޭނުން ވަނީ މި ޕާޓީ ވަކަރަށް ޖަހާލަން. މިޕާޓީގެ ވެރިކަމެއްގައި ކަންކަން ހިނގާނޭ ގޮތް ދެކެން. އަނެއް 2 ސަރުކާރު ހެދި މިސްޓޭކްތައް އަލުން ތަކުރާރު ކުރޭތޯ ބަލަން" އައިޑީޕީގެ ނަމުގައި ޕާޓީއެއް އުފައްދަވައި 2008 ވަނަ އަހަރު ވެރިކަމަށް ކުރިމަތިލައްވައި ތިންހާހެއްހާ ވޯޓު ވެސް ލިބިވަޑައިނުގެންނެވި އުމަރު ވިދާޅުވިއެވެ.
ގާސިމާ މެދު ސަރުކާރުން އިހާނެތިކޮށް ހިތަމުން ގެންދިޔައިރު ވެސް މަގާމުގެ ދިފާއުގައި އެއްޗެއް ވިދާޅުނުވެ ސަރުކާރާ އެކު ހުންނެވި އުމުރު ވިދާޅުވީ ރާއްޖޭގެ ތިން ވަނަ ޕާޓީން ވެރިކަން ކުރާ ޕާޓީއަކަށް ޖޭޕީ ބަދަލުވުމުގެ ޝައުޤުވެރިކަން ހުރި ނަމަ އެކަމުގައި އެހީތެރިވެދިނުމަށް ކަމަށާއި ތިން ވަނަ ޕާޓީގެ ގޮތުގައި އަދިވެސް އޮތުމުގެ ޝައުގުވެރިކަން ޖޭޕީގައި އޮތް ނަމަ އުމަރުގެ ޚިދުމަތެއް މުހިއްމެއް ނުވާނެ ކަމަށެވެ.
