މެންބަރު މަޚްލޫފް މެލޭޝިއާގެ އިދިކޮޅު ލީޑަރާއި ބައްދަލުކުރައްވައިފި
މަޚްލޫފް ވަނީ ކުރީގެ ބޮޑުވަޒީރު މަހާތީރާއިވެސް ބައްދަލުކުރައްވާފަ
ޑރ. އަޒީޒާ އާއިއެކު މަޚްލޫފް ބޭއްވެވި ބައްދަލުކުރެއްވުމުގެ ތެރެއިން
މެލޭޝިއާއަށް މިހާރު ވަޑައިގެން އުޅުއްވާ ރައްޔިތުންގެ މަޖިލީހުގެ ގަލޮޅު ދާއިރާގެ މެންބަރު އަޙުމަދު މަޚްލޫފް، އެ ޤައުމުގެ ކުރީގެ ބޮޑުވަޒީރު ދަތުކް ސެރީ އަންވަރު އިބްރާހިމްގެ އަނބިކަނބަލުން، އަދި އެ ޤައުމުގެ މިހާރުގެ އިދިކޮޅު ލީޑަރު، ދަތުކް ސެރީ ޑރ. ވާން އަޒީޒާ ބިންތު ވާން އިސްމާއިލް އާއި ބައްދަލުކުރައްވައިފިއެވެ.
ބުރާސްފަތި ދުވަހު ބޭއްވެވި މި ބައްދަލުކުރެއްވުމުގައި ދިވެހިރާއްޖޭގެ ހަލަތާއި ގުޅޭގޮތުން ޑރ. އަޒީޒާ އާއި މަޚްލޫފް މަޢުލޫމާތު ހިއްސާ ކުރައްވާފައިވާއިރު، ޖަލު ޙުކުމް ތަންފީޒުކުރައްވަމުން ގެންދަވާ އަންވަރު އިބްރާހިމްގެ މައްސަލަ އާއި ގުޅޭގޮތުން ޑރ. އަޒީޒާ ވަނީ މަޚްލޫފާ އާއިވެސް މަޢުލޫމާތު ހިއްސާ ކުރައްވާފައެވެ.
މި ބައްދަލުކުރެއްވުމަށް ފަހު މަޚްލޫފް ކުރެއްވި ޓްވީޓެއްގައި، އދގެ ވަރކިންގ ގްރޫޕް އޮން އާބިޓްރަރީ ޑިޓެންޝަންގެ ނިންމުމާއި އެއްގޮތަށް މެލޭޝިއާގެ ކުރީގެ ބޮޑުވަޒީރު، ދަތުކް ސެރީ އަންވަރު އިބްރާހިމް މިނިވަން ކުރުމަށް ވަނީ ގޮވާލައްވާފައެވެ.
މަޚްލޫފްގެ މި ދަތުރުފުޅުގައި މެލޭޝިއާގެކުރީގެ ބޮޑުވަޒީރު މަހާތިރް ބިން މުޙައްމަދާއިވެސް ވަނީ ބައްދަލުކުރައްވާފައެވެ.
މެލޭޝިއާއަށް ވަޑައިގެން، މެންބަރު މަޚްލޫފް އެ ޤައުމުގެ އިދިކޮޅު ފަރާތްތަކާއި ބައްދަލުކުރައްވާ މި ދަނޑިވަޅަކީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ދަޢުވަތަކަށް، މި ޑިސެމްބަރު މަހުގެ 19 ވަނަ ދުވަހު، މެލޭޝިއާގެ މިހާރުގެ ބޮޑުވަޒީރު، ދާތޯ ސްރީ، ހާޖީ މުޙައްމަދު ނަޖީބް ބިން ތުން ހާޖީ އަބްދުލް ރައްޒާޤްގެ ދެކަނބަލުން ރާއްޖެއަށް ވަޑައިގަތުމަށް ހަމަޖެހިފައިވާކަންވެސް ދިވެހި ސަރުކާރުން އިޢުލާނު ކުރި ވަގުތެވެ.
