ނުވަ އަހަރަށް ފަހު ބިޔޯންސޭ ބިލްބޯޑް ޗާޓުގެ އެއްވަނަ އަށް

ނުވަ އަހަރުގެ މެދުކެނޑުމަކަށް ފަހު އެމެރިކާގެ މަޝްހޫރު ލަވަކިޔުންތެރިޔާ ބިޔޯންސޭ 'ބިލްބޯޑް ހޮޓް ހަންޑްރެޑް' ޗާޓުގެ އެއްވަނަ މަގާމު ހޯދައިފިއެވެ.

ބިޔޯންސޭ އަށް މި މަގާމު ލިބިފައިވަނީ އިނގިރޭސިވިލާތުގެ ކުޅަދާނަ ލަވަކިޔުންތެރިޔާ އެޑް ޝީރަންގެ އެންމެ ފަހު އަލްބަމް 'ޑިވައިޑް' ގައި ހިމެނޭ 'ޕާފެކްޓް' ލަވައިގެ ރިމިކްސް ލަވަޔާއެކުއެވެ. އެޑް ޝީރަންގެ މި ލަވަ އެންމެ ފުރަތަމަ ރިލީސްކުރީ ސޯލޯ ލަވައެއްގެ ގޮތުގައި ނަމަވެސް މި ޑިސެމްބަރު މަހުގެ އެއްވަނަ ދުވަހު ބިޔޯންސޭއާއެކު ކިޔާފައިވާ ޑުއެޓް ލަވައެއް އެޑް ވަނީ ރިލީސްކޮށްފައެވެ.

މިލަވަ ވެގެން ގޮސްފައިވަނީ 2008 ވަނަ އަހަރުގެ ޑިސެމްބަރު މަހު ބިޔޯންސޭގެ 'ސިންގަލް ލޭޑީސް' ލަވައަށްފަހު ބިލްބޯޑު ޗާޓުގެ އެއްވަނަ މަގާމު ލިބުނު އޭނާގެ އަޑު ހިމެނިފައިވާ ފުރަތަމަ ލަވައަށެވެ. ބިޔޯންސޭގެ އަޑު ހިމެނިފައިވާ ހަ ލަވައެއް ވަނީ މި މަގާމު ކުރިން ހޯދާފައެވެ. މި ލަވަޔާއެކު އެޑް ޝީރަންއަށް ވެސް ވަނީ އެއްވަނަ މަގާމު ލިބިފައެވެ. މިއީ އޭނާގެ ލަވައަކަށް އެއްވަނަ މަގާމު ލިބުނު ދެވަނަ ފަހަރެވެ. އެގޮތުން އޭނާގެ އެންމެ ފަހު އަލްބަމްގައި ހިމެނުނު ލަވަ 'ޝޭޕް އޮފް ޔޫ' ވަނީ މިއަހަރުގެ ތެރޭގައި 12 ހަފްތާ ވަންދެން ބިލްބޯޑް ޗާޓުތަކުގައި ރަސްކަން ކޮށްފައެވެ.

މިދިޔަ ހަފްތާފެ ތެރޭގައި އެކަނިވެސް މި ލަވައިގެ 181000 (އެއް ލައްކަ އަށްޑިހަ އެއް ހާސް) ޑިޖިޓަލް ކޮޕީ ވަނީ ވިކިފައެވެ.