ޤުދުސް ގެ މައްސަލައަކީ މުޅި އިސްލާމީ އުންމަތުގެ މައްސަލައެއް: މައުމޫން
އެމެރިކާގެ އެ ނިންމުމަކީ އެ ޤައުމުން އެތައް އަހަރެއް ވަންދެން ޤުދުސްއާ މެދު ގެންގުޅުނު ސިޔާސަތެއް މުޅިން ދޫކޮށްލުން
ޤުދުސް އަކީ އިޒްރޭލުގެ ވެރިރަށްކަމުގައި އެމެރިކާއިން ވަނީ ބަލައިގެންފަ
ޤުދުސް ގެ މައްސަލައަކީ މުޅި އިސްލާމީ އުންމަތުގެ މައްސަލައެއް ކަމަށާއި، އެ ބިން ޙިމާޔަތް ކޮށް މުސްލިމުންގެ ބާރު ހިނގާ ބިމެއް ގޮތުގައި ބޭއްވުމަށް އެންމެހާ މުސްލިމުން ގަދައަޅާ މަސައްކަތް ކުރަން ޖެހޭނެކަމަށް ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެ އެވެ.
މުސްލިމުންގެ މުޤައްދަސް ބިމެއް ކަމަށްވާ ޤުދުސް އަކީ އިޒްރޭލުގެ ވެރިރަށުގެ ގޮތުގައި އެމެރިކާއިން ރަސްމީކޮށް ބަލައިގަންނަ ކަން އެމެރިކާގެ ރައީސް ޑޮނަލްޑް ޓްރަމްޕް އިއުލާނު ކުރައްވާފައިވާތީ އެކަން ކުށްވެރިކޮށް، ރައީސް މައުމޫން ނެރުއްވި ބަޔާނެއްގައި ވިދާޅުވީ އެމެރިކާގެ އެ ނިންމުމަކީ އެ ޤައުމުން އެތައް އަހަރެއް ވަންދެން ޤުދުސްއާ މެދު ގެންގުޅުނު ސިޔާސަތެއް މުޅިން ދޫކޮށްލުންކަމަށެވެ. އަދި ފަލަސްތީނުގެ މައްސަލަ އާއި އަދި ޚާއްސަކޮށް ޤުދުސް ގެ މައްސަލައަކީ މުޅި އިސްލާމީ އުންމަތުގެ މައްސަލައެއް ކަމަށް ރައީސް މައުމޫން ވިދާޅުވި އެވެ.
މަސްޖިދުލް އަގްސާ އެއީ މުސްލިމިންގެ ފުރަތަމަ ޤިބުލަކަން ފާހަގަކުރައްވައި ރައީސް މައުމޫން ވިދާޅުވީ އެއީ މުސްލިމުންގެ އެންމެ ޙުރުމަތްތެރި ތިން ޙަރަމްގެ ތެރެއިން އެއް ޙަރަމް ކަމަށެވެ. އެ ބިން ޙިމާޔަތް ކޮށް މުސްލިމުންގެ ބާރު ހިނގާ ބިމެއް ގޮތުގައި ބޭއްވުމަށް އެންމެހާ މުސްލިމުން ގަދައަޅާ މަސައްކަތް ކުރަން ޖެހޭނެކަމަށްވެސް އެމަނިކުފާނު ވިދާޅުވި އެވެ.
ރައީސް މައުމޫން ވިދާޅުވީ އެމެރިކާގެ އެނިންމުމުގެ ސަބަބުން ފަލަސްތީނާއި މުސްލިމުންނަށް ވަރަށް ބޮޑެތި ގޮންޖެހުންތަކަކާއި ކުރިމަތިލާން ޖެހޭނެ ކަމަށެވެ. އަދި އެނިންމުމަކީ މެދުއިރުމަތީގެ ސުލްހަޔަށް ވަރަށް ބޮޑެތި ހުރަސް އެޅި، ހަމަނުޖެހުންތައް އިތުރުވެ، ހަރުކަށި އަމަލުތައްވެސް އިތުރުވެގެން ދާނެ ކަމެއް ކަމަށްވެސް ވިދާޅުވެފައިވެއެވެ. އޭގެ އިތުރުން ދުނިޔޭގެ އެކި ކަންކޮޅުތަކުގައި ހަމަނުޖެހުން ހިނގާފާނެ ކަމެއް ކަމަށް ދެކޭކަމަށްވެސް ރައީސް މައުމޫން ވިދާޅުވި އެވެ.
އެހެން ކަމުން، އެމެރިކާގެ އެ ނިންމުމަކީ އިންސާފުން އެއްކިބާވެ، ތާރީޚީ ހަމަތަކާ ޚިލާފު، އަދި މެދު އިރުމަތީގެ ޞުލްހައަށް ބޮޑެތި ހުރަސްތަކެއް އަޅާނެ ނިންމުމަކަށްވާތީ، އެ ނިންމުން އެންމެ ހަރުކަށި އިބާރަތުން ކުށްވެރިކުރާ ކަމަށް ރައީސް މައުމޫން ނެރުއްވި ބަޔާނުގައި ވިދާޅުވެފައިވެއެވެ.
އިޒްރާއީލާއި ފަލަސްތީނާ ދެމެދު އުފެދިފައިވާ ޚިޔާލު ތަފާތުވުންތަކުގެ ތެރެއިން އެންމެ ނާޒުކު މައްސަލައަކީ ޤުދުސްގެ މައްސަލައެވެ. އިޒްރާއީލުން 1967 ވަނަ އަހަރު ކުރި ހަނގުރާމާގައި އިރުމަތީ ޤުދުސް ހިފުމަށް ފަހު، އިޒްރާއީލުން ޤަބޫލުކުރަނީ އިރުމަތީ ގުދުސްއަކީ އެމީހުންގެ ވެރިރަށުގެ ގޮތުގައެވެ. އެހެންނަމަވެސް ފަލަސްޠީނުން ބޭނުން ވަނީ ފަލަސްޠީނުގެ މިނިވަން ދައުލަތެއް އުފެދުމުން، އެ ދައުލަތުގެ ވެރިރަށުގެ ގޮތުގައި އިރުމަތީ ޤުދުސް ހެދުމަށެވެ.
ޤުދުސްގައި މިހާތަނަށް އެއްވެސް ޤައުމެއްގެ އެމްބަސީއެއް ޤާއިމްކޮށްފައެއް ނުވެއެވެ. އަދި ޤުދުސްއަކީ އިޒްރާއީލުގެ އިޚްތިޞާސް ހިނގާ އިޒްރާއީލުގެ ސަހަރެއްގެ ގޮތުގައި ބައިނަލްއަޤުވާމީ މުޖުތަމަޢުއިން ބަލައިގަނެފައެއް ވެސް ނުވެއެވެ.
