ފަނޑިޔާރުން އައްޔަން ކުރުން ލަސްވާ ސަބަބު އެނގޭނީ ކޮމިޝަންގެ މެމްބަރުންނަށް: ޖޭއެސްސީ

ކްރިމިނަލް ކޯޓާއި ސިވިލް ކޯޓަށް ފަނޑިޔާރުން އައްޔަން ކުރުމަށް ލަސްވާ ސަބަބު އެނގޭނީ ކޮމިޝަންގެ މެމްބަރުންނަށް ކަމަށް ޖުޑިޝަލް ސާވިސް ކޮމިޝަން (ޖޭއެސްސީ) ގެ މީޑިއާ އޮފިޝަލް ވިދާޅުވެއްޖެއެވެ.

ކްރިމިނަލް ކޯޓާއި ސިވިލް ކޯޓުގެ ފަނޑިޔާރު ކަމަށް ކުރިމަތިލުމަށް ހުޅުވާލި ފުރުސަތުގައި 31 ފަރާތަކުން ކުރިމަތިލިއިރު، ޝޯޓް ލިސްޓް ވެފައިވަނީ 21 ފަރާތެކެވެ. އެ ފަރާތްތަކާ އިންޓަވިއުކޮށްފައި ވަނީ ސެޕްޓެންބަރު މަހުގެ 27 ވަނަ ދުވަހު އެވެ.

ފަނޑިޔާރުން އައްޔަން ކުރުން ލަސްވަމުންދާ ސަބަބާ ބެހޭ ގޮތުން ރާއްޖެއެމްވީން ސުވާލު ކުރުމުން ޖޭއެސްސީގެ މީޑިއާ އޮފިޝަލް ވިދާޅުވީ ކްރިމިނަލް ކޯޓަށާއި ސިވިލް ކޯޓަށް ފަނޑިޔާރުން އައްޔަން ކުރުމުގެ މައްސަލަ މިހާރު ޖޭއެސްސީގެ އެޖެންޑާގައި ހިމަނާފައިވާ ކަމަށާއި އެ މައްސަލަ އަށް ގޮތެއް ނުނިމި ލަސްވާ ސަބަބު އެނގޭނީ ޖޭއެސްސީގެ މެމްބަރުންނަށް ކަމަށެވެ.

ފަނޑިޔާރުން އައްޔަން ކުރުމުގެ މައްސަލަ ޖޭއެސްސީގެ އެޖެންޑާގައި ހިމެނުމަށް ފަހު ޖޭއެސްސީގެ ޖަލްސާއެއް ނުބާއްވަނީތޯ ސުވާލު ކުރުމުން ކޮމިޝަންގެ މީޑިއާ އޮފިޝަލް ވިދާޅުވީ ކޮމިޝަންގެ ޖަލްސާތައް ބާއްވާ ކަމަށާއި ނަމަވެސް ފަނޑިޔާރުން އައްޔަން ކުރުމުގެ މައްސަލައިގައި ގޮތެއް ނުނިމިވާ ސަބަބު އޭނާ އަށް ދަންނަވަން ނެނގޭ ކަމަށެވެ. އަދި ކޯޓްތަކަށް ފަނޑިޔާރުން އައްޔަން ކުރެވުމުން އެކަން މީޑިއާތަކަށް އަންގަވާނެ ކަމަށް ޖޭއެސްސީގެ މީޑިއާ އޮފިޝަލް ވިދާޅުވިއެވެ.

ކްރިމިނަލް ކޯޓަށާއި ސިވިލް ކޯޓަށް ގާޒީން ހޯދުމަށް ޖޭއެސްސީ އިން އިއުލާނު ކުރީ ސެޕްޓެންބަރު 17 ވަނަ ދުވަހު އެވެ. ޖޭއެސްސީ އިން ފުރަތަމަ އިއުލާނު ކުރީ ދެ ކޯޓުން ކުރެ ކޮންމެ ކޯޓަކަށް ދެ ގާޒީން ހޯދުމަށެވެ. އޭގެ ފަހުން އެ ކޮމިޝަނުން ވަނީ ކްރިމިނަލް ކޯޓަށް ހޯދަން ބޭނުންވާ ގާޒީން އަދަދު ހަތަރަކަށް އިތުރުކޮށްފަ އެވެ.

ކްރިމިނަލް ކޯޓުގެ ގާޒީންނަށް މުސާރަ އާއި އިނާޔަތްތަކުގެ ގޮތުގައި މަހަކު 48،000 ވުރެ ގިނަ ރުފިޔާ ލިބޭނެ އެވެ. އަދި ސިވިލް ކޯޓުގެ ގާޒީންނަށް 46،000 އަށް ވުރެ ގިނަ ރުފިޔާ ލިބޭނެ އެވެ. މީގެ އިތުރުން ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން ފޯނު އެލަވަންސާއި މެޑިކަލް އިންޝުއަރެންސް ލިބޭނެއެވެ.

ކްރިމިނަލް ކޯޓަށް ގާޒީން އައްޔަން ކުރުމުގެ މައްސަލަ ޖޭއެސްސީގެ އެޖެންޑާގައި ހިމަނާފައިވާއިރު އެކޯޓުގެ އިސްގާޒީ ކަމުގައި ހުންނެވި އަބްދުލް ބާރީ ޔޫސުފް ޖުވެނައިލް ކޯޓަށް ބަދަލުކޮށް، ގާޒީ އަހުމަދު ޝަކީލް ވަނީ ފެމިލީ ކޯޓަށް ބަދަލު ކޮށްފަ އެވެ. މީގެ އިތުރުން ޖޭއެސްސީ އިން ވަނީ އެ ކޯޓުގެ ގާޒީ އަހުމަދު ރަޝީދު ސަސްޕެންޑް ކޮށްފަ އެވެ.

ހައިކޯޓަށް އަލަށް ނަގާ ފަނޑިޔާރުން އައްޔަން ކުރުމުގެ މައްސަލަ ވެސް އެޖެންޑާގައި ހިމަނާފައިވާ އިރު، ފަނޑިޔާރުން އައްޔަން ކުރަން ގާނޫނުގައި ބުނެފައިވާ މުއްދަތު ފަހަނައަޅައި ވަނީ ގޮސްފަ އެވެ.

ގާނޫނަށް ގެނައި އިސްލާހުގައި ބުނެފައިވާ ގޮތުގައި އެ އިސްލާހަށް އަމަލުކުރަން ފަށާތާ ތިން މަސް ދުވަހުގެ ތެރޭގައި ފަނޑިޔާރުން އައްޔަން ކުރަން ޖެހެ އެވެ. އެހެން ނަމަވެސް، ގާނޫނަށް އަމަލުކުރަން ފެށިތާ ސެޕްޓެމްބަރު 18 ވަނަ ދުވަހަށް ތިން މަސް ދުވަސް ފުރިފައިވާއިރު ވެސް، ފަނޑިޔާރުން އައްޔަން ކޮށްފައެއް ނުވެ އެވެ.

ކުރިން ހައިކޯޓުގެ ބެންޗުގައި ނުވަ ފަނޑިޔާރުން ތިއްބަވާއިރު، ގާނޫނު އިސްލާހު ކޮށްފައި ވަނީ 11 ފަނޑިޔާރުން ތިއްބަވާ ގޮތަށެވެ. އިސްލާހު ގެނައި އިރު ވެސް، ދެ ފަނޑިޔާރެއްގެ މަގާމު ހުސްވެފައި ވާތީ 11 ފަނޑިޔާރުން ހަމަކުރުމަށް، އިތުރު ހަތަރު ފަނޑިޔާރުން ހައިކޯޓަށް އައްޔަން ކުރަން ޖެހެއެވެ.

ހައިކޯޓް ފަނޑިޔާރު ކަމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލި ފަރާތްތަކުގެ ތެރެއިން ޝޯޓް ލިސްޓްވި ފަރާތްތަކާ ވެސް އިންޓަވިއުކޮށް ހުރިހާ ކަމެއް ނިންމާފައިވާއިރު، މިހާރު އޮތީ ހަމައެކަނި އައްޔަންކުރާނެ ފަނޑިޔާރުން ކަނޑައެޅުމެވެ.