ރޭ ލަންކާއަށް ކުރި ވިއްސާރައާއި ގުޅިގެން ދިވެހިން އުޅޭ ބައެއް ގެތަކަށް ގެއްލުން ލިބިއްޖެ އެވެ.

ރާއްޖެއިން ސްރީލަންކާއަށް ކަނޑައަޅުއްވާފައިވާ ހުންނަވާ ސަފީރު މުހައްމަދު ހުސައިން ޝަރީފު (މުންދު) ވިދާޅުވީ، ރޭ ކުރި ވިއްސާރައާއި ގުޅިގެން  އެއްވެސް ދިވެއްސަކަށް ގެއްލުމެއް ލިބިފައިނުވާ ކަމަށެވެ. އެހެންނަމަވެސް ދިވެހިން ދިރިއުޅޭ 12 ވަރަކަށް ގެއަށް ގެންލުން ލިބިފައިވާ ކަމަށް އޭނާ ވިދާޅުވި އެވެ. އަދި ސްރީލަންކާގައި ހުންނަ ރާއްޖޭގެ އެމްބަސީގެ އިތުރުން ސޯސަލް ވިލާއަށް ވެސް ގެއްލުންތަކެއް ލިބިފައިވާ ކަމަށް އޭނާ ވިދާޅުވި އެވެ.

ގެއްލުން ލިބުނު ބައެއް ގެތަކުގެ ފުރާޅު ހަލާކުވެފައިވާކަމަށް އޭނާ ވިދާޅުވި އެވެ.

މުންދު ވިދާޅުވީ، ގެއްލުންލިބުނު ގެތަކަށް އެހީތަކެތިކަން ފޯރުކޮށްދިނުމަށް ގްރޫޕްތަކުގައި މަސައްކަތް ކުރަމުންދާ ކަމަށެވެ.

ސްރީލަންކާގައި ދިރިއުޅޭ ދިވެހިންނަށް ގެއްލުން ލިބިފައިވާ އިރު ކުރިއަށް އޮތް 12 ގަޑިއިރު ތެރޭގައި ރާއްޖޭގެ ބޮޑު ބަޔަކަށް ގުގުރުމާއި އެކު ވިއްސާރަކޮށް ބައެއް އަތޮޅުތަކަށް ބޯކޮށް ވާރޭ ވެހެމުންދާނެ ކަމަށް މެޓް އޮފީހުން ހާމަކުރެވެ. ވައިގަދަވެ ކަނޑުތައް ވެސް ގަދަވާނެ ކަމަށް ލަފާކުރެވޭތީ، އާންމުކޮށް ހުރިހާ ފަރާތްތަކުން ވެސް މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސް ކޮށްފަ އެވެ.