ކުއްލި ގޮތަކަށް މަޖިލިސް ބާއްވާ ޗައިނާ ފްރީ ޓްރޭޑް އެގްރިމެންޓުގެ މައްސަލަ ފާސްކުރުމުގެ މަސައްކަތް ފަށައިފި
29 ނޮވެމްބަރު 2017 | ބުދަ 12:37މި މައްސަލަ މަޖިލީހަށް ހުށަހެޅީވެސް މިއަދު
ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު މުހައްމަދު: މަޖިލީހުގެ ރިޔާސަތުގައި
ރާއްޖެއާއި ޗައިނާއާ ދެމެދު ގާއިމު ކުރުމަށް ހަމަޖެހިފައިވާ މިނިވަން ވިޔަފާރީގެ އެގްރިމެންޓުގައި ސޮއި ކުރުމުގެ މައްސަލަ ރައްޔިތުންގެ މަޖިލީހުން ފާސްކުރުމަށް މަޖިލީހުން ކުއްލިގޮތަކަށް ޖަލްސާއެއް ބާއްވާ، މަސައްކަތް ފަށައިފި އެވެ.
ރައްޔިތުންގެ މަޖިލީހުން ބުދަ ދުވަހު 14:30ގައި ޖަލްްސާއެއް ބޭއްވުމަށް ނިންމާ އެޖެންޑާ ކޮށްފައިވަނީ، ބޭރު ގައުމުތަކާއި ދިވެހިރާއްޖެއިންވާ އެއްބަސްވުންތަކުގެ ތެރެއިން ރައްޔިތުން އެއްވެސް އިލްތިޒާމެއް އުފުލަންޖެހޭ ބާވަތްތަކުގެ އެއްބަސްވުންތަކާއި އަދި އެނޫންވެސް އެއްބަސްވުންތަކުގައި ސޮއިކުރަންވާނީ، ރައްޔިތުންގެ މަޖިލީހަށް ހުށަހަޅައި އެ މަޖިލީހުގެ ރުހުމާއެކުގައި ކަމަށް ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 115 ވަނަ މާއްދާގެ (ފ)ގެ ދެވަނަ ނަމްބަރުގައި ބަޔާންކޮށްފައިވާތީ، "ފްރީ ޓްރޭޑް އެގްރީމަންޓް ބިޓްވީން ދަ ގަވަރމަންޓް އޮފް ދަ ޕީޕަލްސް ރިޕަބްލިކް އޮފް ޗައިނާ އެންޑް ދަ ގަވަރމަންޓް އޮފް ދަ ރިޕަބްލިކް އޮފް މޯލްޑިވްސް" ގައި ދިވެހިރާއްޖެއިން ސޮއިކުރުމާމެދު ރައްޔިތުންގެ މަޖިލީހުގެ ރުހުން ހޯދުމަށްޓަކައި ފޮނުއްވާފައިވާ މައްސަލަ ދިރާސާ ކުރައްވައި ގޮތެއް ނިންމެވުމަށް އެ މައްސަލައާގުޅޭ ދާއިމީ ކޮމިޓީއަށް ފޮނުވުމުގެ މައްސަލަ އެކަންޏެވެ.
މަޖިލީހުގެ އެޖަލްސާގައި މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ އެޖެންޑާގެ ދަށުން އެ މައްސަލަ މަޖިލީހަށް އިއްވުމަށްފަހު، ގައުމީ ސަލާމަތުގެ ކޮމެޓީއަށް ވަނީ ފޮނުވާފަ އެވެ.
އެޖަލްސާ ނިންމާލުމާއެކު ގައުމީ ސަލާމަތުގެ ކޮމެޓީގެ ބައްދަލުވުމެއް ބާއްވާ އިކޮނޮމިކް މިނިސްޓަރު މުހައްމަދު ސައީދު ކޮމެޓީއަށް ހާޒިރު ކުރައްވާ އެ އެއްބަސްވުމުގެ މައުލޫމާތު އޮޅުން ފިލުވާފައިވެއެވެ. ނަމަވެސް އެކޮމެޓީގެ ބައްދަލުވުން ކުރިއަށް ގެންދިޔައީ ސިއްރުކޮށްގެންނެވެ.
އެމައްސަލައާ ގުޅިގެން އެކޮމެޓީން ނިންމާފައިވާ ގޮތުގެ ރިޕޯޓު މަޖިލީހަށް ހުށަހެޅުމާއި ވޯޓަށް އެހުމަށް ބުދަ ދުވަހުގެ ރޭ އިތުރު ޖަލްސާއެއް ބޭއްވުމަށް ވެސް ވަނީ ނިންމާފަ އެވެ.
ސަރުކާރަށް މަޖިލީހުގެ މެޖޯރިޓީ ގެއްލިފައިވާ މިދަނޑިވަޅުގައި ގިނަ އަދަދެއްގެ ސިފައިން މަޖިލީހުގެ ސެކިއުރިޓީއަށް ވެއްދުމަށްފަހު، ސަރުކާރުން ބޭނުންވާހާކަމެއް މަޖިލީހުގެ ތެރެއިން މިހާރުވެސް ދަނީ ކުރަމުންނެވެ. މަޖިލީހުގެ މެޖޯރިޓީ މެމްބަރުން ވަނީ މިދިޔަ ޖުލައި މަހުގެ ތެރޭގައި ސޮއިކޮށް މަސީހުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފަ އެވެ. އަދި އެ މެމްބަރުން ވިދާޅުވަމުން ގެންދަވަނީ މަސީހަކީ މިހާރު މަޖިލީހުގެ ރައީސް ނޫން ކަމަށެވެ. ނަމަވެސް މަސީހު ގެންދަވަނީ މަޖިލީހުގެ ރިޔާސަތުގައި އިންނަވާ ޖަލްސާތައްވެސް ކުރިއަށް ގެންދަވަމުންނެވެ.
