މަތީ ތައުލީމް ހާސިލްކުރަން އެޑިއުކޭޝަން މިނިސްޓްރީން ދޫކުރާ ލޯނު 566 އަށް ވުރެ ގިނަ ދަރިވަރުންނަށް ދީފި އެވެ.

އަންގާރަ ދުވަހުގެ ރޭ އިސްކަންދަރު ސްކޫލުގައި ބޭއްވި ހަފުލާއެއްގައި އެ ދަރިވަރުންނަށް ލޯނު ލިބުނުކަމުގެ ލިޔުން ހަވާލު ކޮށްދެއްވީ އެޑިއުކޭޝަން މިނިސްޓަރު ޑރ. އާއިޝަތު ޝިހާމެވެ.

އެޑިއުކޭޝަނުން މައުލޫމާތު ދިން ގޮތުގައި މި ފަހަރު ލޯނު ދޫކޮށްފައިވަނީ ރާއްޖޭގައި ތިބެގެން ޑިޕްލޮމާ އިން ފެށިގެން މާސްޓާޒްއާ ހަމައަށް އަދި ރާއްޖޭން ބޭރުގައި ޑިޕްލޮމާއިން ފެށިގެން މާސްޓާޒްއާ ހަމައަށް ކިޔެވުމަށެވެ. ދަރިވަރުންނަށް މަތީ ތައުލީމް ހާސިލްކޮށްދިނުމުގެ ބޭނުމުގައި ސަރުކާރުން މިދިޔަ އޮގަސްޓު މަހު ހުޅުވާލި ފުރުސަތުގައި 1000 ދަރިވަރުންނަށް ލޯނު ދިނުމަށް ވަނީ ހަމަޖެހިފަ އެވެ. ނަމަވެސް 612 ކުދިން ލޯނަށް ކުރިމަތިލި އިރު ލޯނު ދޫކޮށްފައި ވަނީ 566 ދަރިވަރަކަށެވެ.

މިއީ ރާއްޖެ އާއި ރާއްޖޭން ބޭރުގައި ތިބެގެން މަތީ ތައުލީމް ހާސިލްކުރަން ލޯނު ދޫކުރި 10 ވަނަ ބުރެވެ. މި ފަހަރު ލޯނު ދޫކޮށްފައިވަނީ ރާއްޖޭގައި ތިބެގެން ޑިޕްލޮމާ އިން ފެށިގެން މާސްޓާޒްއާ ހަމައަށް އަދި ރާއްޖޭން ބޭރުގައި ޑިޕްލޮމާއިން ފެށިގެން މާސްޓާޒްއާ ހަމައަށް ކިޔެވުމަށެވެ.

ރައީސް އަބްދުﷲ ޔާމީން އިއުލާން ކުރެއްވި 2050 ސްކޮލަޝިޕަށް ކުރިމަތިލުމަށް އަންނަ މަހުގެ ކުރީކޮޅު ހުޅުވާލާނެ ކަމަށް އެޑިއުކޭޝަން މިނިސްޓަރު ވިދާޅުވި އެވެ. އަދި އަންނަ އަހަރުގެ މާޗު މަހުގެ އެއް ވަނަ ލޯނުގެ ސްކީމުގެ އާ ބުރަކަށް އިއުލާނު ކުރެވޭނެ ކަމަށް ވިދާޅުވި އެވެ.