މިސްރުގެ އުތުރު ސިނާއީ ސަރަހައްދުގައި ހަނގުރާމަވެރިންތަކެއް ކަމަށް ބެލެވޭ ބަޔަކު މިސްކިތަކަށް ހަމަލާދިނުމުގެ ސަބަބުން 85 މީހަކު މަރުވެއްޖެ ކަމަށް ރިޕޯޓުތައް ބުނެފިއެވެ.
މިސްރުގެ ދައުލަތުގެ ނިއުސް އެޖެންސީ އިން މަންޒަރު ދުށްމީހުންނާ ހަވާލާދީ ބުނެފައި ވަނީ މިހާދިސާ ހިނގާފައިވަނީ ބިރް އަލް-އަބަދް ޓައުންގައި ކަމަށާއި އަދި ހަނގުރާމަވެރިން ހަމަލާދީފައި ވަނީ ހުކުރު ނަމާދު ގަޑީގައި ކަމަށެވެ. އަދި ހަނގުރާމަވެރިން ހަމަލާދީފައި ވަނީ ބޮމާއި ބަޑި ބޭނުންކޮށްގެން ކަމަށްވާއިރު ހަމަލާ ދޭން އައި މީހުން އައީ "އޮފް-ރޯޑް ވެހިކަލްތަކުގައި" އެވެ.
މިސްރުގެ ދީނީ ގޮތުން ހައްދުފަހަނައަޅައި ދިއުން 2013 ވަނަ އަހަރުން ފެށިގެން ވަރަށް ބޮޑަށް އިތުރުވެފައިވާއިރު ހުކުރު ދުވަހުގެ ހަމަލާގައި 80 މީހުން ޒަޚަމްވެފައިވެއެވެ.
ހަމަލާގެ ފަހަތުގައި ތިބީ ކޮންބައެއް ކަމެއް އަދި ނޭނގޭއިރު މިސްރުގެ ރައީސް، ހުކުރު ދުވަހު ދިން ހަމަލާ އާއި ގުޅިގެން ސަލާމަތީ ޚިދުމަތްތަކާ ބައްދަލުކުރައްވަން ހަމަޖެހިފައިވާ ކަމަށްވެސް ރިޕޯޓުތައް ބުނެއެވެ.
މިހަމަލާއާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ކުރައްވާފައިވާ ޓްވީޓެއްގައި ވިދާޅުވީ ދުނިޔެއިން ޓެރަރިޒަމް ބަލައިނުގަންނާނެކަމަށާއި، އަސްކަރީ ގޮތުން ޓެރަރިސްޓުން ބަލިކުރަން ޖެހޭކަމަށެވެ. އަދި ހައްދުފަހަނައަޅައި ދިޔުމުގެ ފިކުރު ނައްތާލަން ޖެހޭކަމަށް އޭނާ ވިދާޅުވިއެވެ.
