އިބްރާހިމްދީދީގެ މައްޗަށް ހިންގާ ޝަރީއަތުގެ އަޑުއެހުމެއް ބުރާސްފަތި ދުވަހު
22 ނޮވެމްބަރު 2017 | ބުދަ 17:01ޝަރީއަތުގެ އަޑުއެހުމެއް އޮތީ ހެނދުނު 11.0 ގައި
އިބްރާހިމް ދީދީ ކްރިމިނަލް ކޯޓަށް ވަޑައިގަންނަވަނީ: ދީދީގެ މައްޗަށް ދައުވާކުރަނީ އަބްދުﷲ ގާޒީ ބަންދުކުރި މައްސަލައިގައި
ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު ބްރިގޭޑިއަރ ޖެނެރަލް (ރޓޑ) އިބްރާހީމް މުހައްމަދު ދީދީގެ މައްޗަށް ދައުލަތުން އުފުލާފައިވާ ޓެރެރިޒަމް ދައުވާގެ އަޑުއެހުމެއް ބުރާސްފަތި ދުވަހަށް ތާވަލުކޮށްފި އެވެ.
އިބްރާހިމް ދީދީގެ މައްޗަށް ޓެރަރިޒަމްގެ ދައުވާ އުފުލާފައި ވަނީ ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ސިފައިންގެ ބެލުމުގެ ދަށަށް ގެންދިޔަ މައްސަލައިގަ އެވެ. މި ދައުވާއާ ގުޅިގެން ބާއްވާ އަޑުއެހުމެއް ތާވަލުކޮށްފައި ވަނީ ބުރާސްފަތި ދުވަހުގެ 11.00 އަށެވެ.
އިބްރާހިމް ދީދީގެ މައްޗަށް އުފުލާފައިވާ ދައުވާއަށް އޭނާ ވަނީ އިންކާރުކުރައްވާފަ އެވެ.
މި މައްސަލައަކީ މީގެ ކުރިން ދައުވާ ނުކުރަން ޕްރޮސެކިއުޓާ ޖެނަރަލް ނިންމާފައިވާ މައްސަލައެއް ކަމަށް އިބްރާހިމް ދީދީ ދަނީ ވިދާޅުވަމުންނެވެ. އެގޮތުން މީގެ ކުރިން އެ މައްސަލަ ކޯޓުގައި ހިނގަމުން ދަނިކޮށް ދައުވާ އަނބުރާ ގެންދިއުމަށް ފަހު ދައުވާ ނުކުރަން ނިންމައި، ޕީޖީ އޮފީހުން އިބްރާހިމް ދީދީ ސިޓީއެއްގައި ފޮނުވާފައިވާ ކަމަށް އިބްރާހިމް ދީދީ ވިދާޅުވެ އެވެ. އަދި އެކަން އެންގީ ޕީޖީގެ ބިއުރޯ އިން އޭރުގެ ޑިރެކްޓަރު މުހައްމަދު އިޔާޒު ކަމަށް ވާތީ އޭނާ ކޯޓަށް ހާޒިރުކޮށްދިނުމަށް އިބްރާހިމް ދީދީގެ ފަރާތުން ކްރިމިނަލް ކޯޓުގައި ވެސް އެދިވަޑައިގެންނެވި އެވެ.
ނަމަވެސް މި މައްސަލައަކީ ކުރިއަށް ގެންދެވިދާނެ މައްސަލައެއް ކަމަށް ކްރިމިނަލް ކޯޓުން ވަނީ ކަނޑައަޅާފަ އެވެ.
