ސެވިއްޔާގެ ކޯޗު އެޑުއާޑޯ ބެރިޒޯއަށް ކެންސަރު ޖެހިފައިވާކަން އިއުލާންކޮށްފިއެވެ.

ޔުއެފާ ޗެމްޕިއަންސް ލީގުގައި އަންގާރަ ދުވަހުގެ ރޭ ސެވިއްޔާ އާއި ލިވަޕޫލް ބައްދަލުކުރި މެޗަށް ފަހު ސެވިއްޔާ އިން ނެރުނު ނޫސްބަޔާނެއްގައި ބުނީ އެ ކްލަބުގެ ކޯޗު ބެރިޒޯ އަށް ޕްރޮސްޓޭޓް ކެންސަރު ޖެހިފައިވާ ކަމަށާއި، އެކަމަށް އޭނާ ފަރުވާ ހޯދަމުން އަންނަ ކަމަށެވެ.

ސެލްޓަވިގައި ތިން އަހަރު ހޭދަކުރުމަށް ފަހު، މި ސީޒަނުގައި ސެވިއްޔާގެ ކޯޗުކަމާ ބެރިޒޯ ހަވާލުވީ ދެ އަހަރުގެ އެއްބަސްވުމެއްގެ ދަށުންނެވެ.

ސެވިއްޔާ އަދި ލިވަޕޫލް ބައްދަލުކުރި މެޗުގެ ފުރަތަމަ ހާފް ނިމުނީ 0-3 ގެ ނަތީޖާއިން ސެވިއްޔާގެ މައްޗަށް ލިވަޕޫލް ކުރީގައި އޮވެގެންނެވެ. އެހެން ނަމަވެސް ދެވަނަ ހާފްގައި ސެވިއްޔާ އިން ވަނީ ތިން ލަނޑު ޖަހާ ނަތީޖާ ހަމަހަމަކޮށް މެޗު ނިންމާލާފައެވެ.

ބެރިޒޯ އަށް އަވަސް ޝިފާއަކަށް އެދި ގިނަ ކްލަބްތަކުން އަދި ކުޅުންތެރިން އަންނަނީ ސޯޝަލް މީޑިއާގައި ޕޯސްޓްތައް ކުރަމުންނެވެ.

އުމުރުން މިހާރު 48 އަހަރުގެ ބެރިޒޯ ވަނީ ކުޅުންތެރިޔެއްގެ ގޮތުގައި ސެލްޓަވިގޯ އަދި ރިވާޕްލޭޓް ފަދަ ކްލަބްތަކަށް ކުޅެފައެވެ. އޭނާ ވަނީ އާޖެންޓީނާގެ ގައުމީ ޓީމަށް ވެސް ކުޅެފައެވެ.

ޗިލީގެ އެސިސްޓެންޓް ކޯޗުގެ މަގާމު ވެސް ފުރާފައިވާ ބެރިޒޯގެ އިރުޝާދުގެ ދަށުން މި ސީޒަނުގައި ސެވިއްޔާ ވަނީ 20 މެޗު ކުޅެފައެވެ. އޭގެ ތެރެއިން 11 މެޗުން ސެވިއްޔާ މޮޅުވެފައިވާ އިރު، ފަސް މެޗުން ވަނީ ބަލިވެފައެވެ. ބާކީ ހަތަރު މެޗު ނިމުނީ އެއްވަރުވެގެންނެވެ.