ބޫޓާން ކޮޅަށް ހަތް ލަނޑު ޖަހައި އާ ކޯޗަށް އުއްމީދީ ފެށުމެއް

އޭޝިއަން ކަޕް ކޮލިފައިންގައި ކުޅުނު އެންމެ ފަހު މެޗުގައި ބޫޓާން ކޮޅަށް ހަތް ލަނޑު ޖަހައި، އާ ކޯޗާއެކު ގައުމީ ޓީމު އާ ދައުރެއް ފަށައިފިއެވެ.

ގަލޮޅު ދަނޑުގައި ބޫޓާނާއި ދެކޮޅަށް ކުޅުނު މެޗުން ރާއްޖޭގެ ގައުމީ ޓީމު މޮޅުވީ 7-0 ގެ ނަތީޖާއަކުންނެވެ. މި މެޗުގައި ރާއްޖޭގެ ޓީމުން ވަނީ ބޮޑު ބަދަލުތަކެއް ފެނިގެން ގޮސްފައެވެ. އެގޮތުން ރާއްޖޭގެ ގައުމީ ޓީމުގެ ކެޕްޓަން އަލީ އަޝްފާގް (ދަގަނޑޭ) އަށް މި މެޗުގެ ސްކޮޑުން ފުރުސަތު ދީފައިނުވާއިރު މި މެޗު ފެށުމަށް ވަގުތު ކުޑަތަން ވެފައިވަނިކޮށް ވައިސް ކެޕްޓަންގެ މަގާމުގައި ހުރި އަސްހަދު އަލީ (އަޑުބަރޭ) ވަނީ ގައުމީ ޓީމަށް ކުޅުން ހުއްޓާލިކަން އިއުލާނުކޮށްފައެވެ. މި މެޗުގައި ރާއްޖޭގެ ކެޕްޓަން ބޭންޑް އަޅައިގެން ކުޅުނީ އަކްރަމް އަބްދުލް ޣަނީއެވެ.

ފުރަތަމަ ހާފު ފެށިގެން ރާއްޖޭގެ ޓީމުން ވަނީ ބޯޅަ ހިފަހައްޓައިގެން ކުޅެ ރަނގަޅު ކުޅުމެއް ދައްކާފައެވެ. މި މެޗުގެ ނުވަވަނަ މިނެޓުގައި ނާއިޒް ހަސަން (ދާދު) އަށް ބޫޓާންގެ އޭރިއާ ތެރެއިން ފައުލް ކުރުމާއި ވިދިގެން ލިބުނު ޕެނަލްޓީ އަލީ ފާސިރު (ސެންޓޭ) ވަނީ ބޭކާރުކޮށްލާފައެވެ. ރާއްޖޭގެ ކުޅުންތެރިން ހަމަލާ އުފެއްދުމުގެ ނަތިޖާއެއްގެ ގޮތުން މެޗުގެ 34 ވަނަ މިނެޓުގައި ރާއްޖެއިން ވަނި މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. މި ލަނޑު ރާއްޖެއަށް ޖަހައިދިނީ ނިއުގެ ފޯވާޑް ހަމްޒާ މުހައްމަދު (ހަމްޕު) އެވެ.

އެއް ލަނޑުގެ ލީޑެއްގައި އޮވެ ރާއްޖެއިން ފުރަތަމަ ހާފު ނިންމާލިއިރު ދެވަނަ ހާފުގައި ރާއްޖެއިން ވަނީ މޮޅު ކުޅުމެއް ދައްކާފައެވެ. ރާއްޖޭގެ ދެވަނަ ލަނޑު މެޗުގެ 65 ވަނަ މިނެޓުގައި ޖަހައިދިނީ ދާދުއެވެ. އޭގެ ހަތަރު މިނެޓު ފަހުން ރާއްޖޭގެ ތިންވަނަ ލަނޑު ޖަހައިދިނީ އިބްރާހިމް ވަހީދު ހަސަންއެވެ. މިއީ އޭނާ ގައުމީ ޓީމަށް ކުޅުނު ފުރަތަމަ މެޗަށްވާއިރު މިއީ ގައުމީ ޓީމަށް އޭނާ ޖަހައިދިން ފުރަތަމަ ލަނޑެވެ.

ރާއްޖޭގެ ހަތަރު ވަނަ ލަނޑު 77 ވަނަ މިނެޓުގައި ޖަހައިދިނީ ދާދުއެވެ. އޭގެ ދެ މިނެޓުފަހުން ލަނޑެއް ޖަހާ ދާދު ވަނީ ގައުމީ ޖާޒީގައި އޭނާގެ ފުރަތަމަ ހެޓްރިކް ފުރިހަމަކޮށްފައެވެ. ދާދު ވަނީ 81 ވަނަ މިނެޓުގައި އަނެއްކާ ވެސް ލަނޑެއް ޖަހާ މި މެޗުގައި ހަތަރު ލަނޑު ޖަހާފައެވެ. ރާއްޖެއިން މެޗުގައި ޖެހި ހަތްވަނަ ލަނޑު ޖަހައިދިނީ ޑިފެންޑަރު ހުސައިން ސިފާއު ޔޫސުފްއެވެ.

މި ގްރޫޕްގެ ދެވަނަ މެޗުގައި އޮމާން ވަނީ އަމިއްލަ ދަނޑުގައި 1-0 ގެ ނަތީޖާއަކުން ފަލަސްތީނު ބަލިކޮށްފައެވެ.

މި ގްރޫޕުގެ އެއްވަނަގައި ކުޅުނު ހަ މެޗުން ލިބުނު 15 ޕޮއިންޓާއެކު އެއްވަނައިގައި އޮތީ އޮމާންއެވެ. ދެވަނައިގައި ހަމަ އެ އަދަދަށް ޕޮއިންޓް ހޯދައިގެން ލަނޑުގެ ތަފާތުން އޮތީ ފަލަސްތީނުއެވެ. ތިންވަނަގައި ހަ ޕޮއިންޓާއެކު ރާއްޖެ އޮތްއިރު އެއްވެސް ޕޮއިންޓެއް ނުލިބި ހަތަރު ވަނައިގައި އޮތީ ބޫޓާންއެވެ.