ވެސްޓް ބްރޮމްގެ ކޯޗު ކަމުން ޓޯނީ ޕިއުލިސް ވަކިކޮށްފި

އިނގިރޭސި ޕްރިމިއާ ލީގެގެ ކްލަބް ވެސްޓް ބްރޮމްގެ ކޯޗުކަމުގެ މަގާމުން ޓޯނީ ޕިއުލިސް ވަކިކޮށްފިއެވެ.

ޕިއުލިސް އެ މަގާމުން ވަކިކޮށްފައިވަނީ ހޮނިހިރު ދުވަހު ޗެލްސީ އަތުން 4-0 ގެ ނަތީޖާއަކުން އެ ޓީމު ބަލިވި މެޗަށް ފަހުއެވެ. މި ސީޒަނުގެ ފުރަތަމަ ތިން މެޗު އޭނާގެ އިރުޝާދުގެ ދަށުން އެ ޓީމު ކާމިޔާބުކުރި ނަމަވެސް އޭގެ ފަހުން އެ ޓީމު ކުޅުނު ހަތަރު މެޗު އެއްވަރުވިއިރު ބާކީ ހަތް މެޗުން ވަނީ ބަލިވެފައެވެ. މި ސީޒަނުގައި އެ ޓީމު އެންމެ ފަހުން މެޗަކުން މޮޅުވެފައިވަނީ އޮގަސްޓް މަހުގެ 22 ވަނަ ދުވަހު އިނގިރޭސި ލީގު ކަޕްގައި އެކްރިންޓަން އާއި ދެކޮޅަށް ކުޅުނު މެޗުންނެވެ.

ޕިއުލިސް އެ މަގާމުން ވަކިކުރުމާއި ވިދިގެން އޭނާގެ އެސިސްޓަންޓް ކޯޗުގެ ގޮތުގައި ހުރި ގެރީ މެގްސަން ވަނީ ވަގުތީ ގޮތުން އެ މަގާމާއި ހަވާލުވެފައެވެ.

ވެސްޓް ބްރޮމްގެ ޗެއާމަން ޖޯން ވިލިއަމްސް ބުނީ މި ނިންމުމަކީ ޓީމުގެ ވިސްނުން ކުރިޔަށް ބަހައްޓައިގެން ނިންމި ނިންމުމެއް ކަމަށާއި ކޯޗެއް އައްޔަނުކުރަނީ ނަތީޖާތަކުން އެކަން ދެއްކުމަށް ކަމަށެވެ. އަދި މި ސީޒަނުގެ މިހާތަނަށް ޓީމުން ހޯދަމުން އަންނަނީ ދަށް ނަތީޖާތަކެއް ކަމަށް އޭނާ ވަނީ ބުނެފައެވެ. ވިލިއަމްސް ބުނީ ކޯޗެއްގެ ގޮތުގައި ހުރެ ޕިއުލިސް ކޮށްދިން ކަންކަމަށް ވަރަށް ޝުކުރުވެރިވާ ކަމަށާއި މުސްތަގުބަލުގައި އޭނާ ކުރާ ކަންކަމުގައި ކާމިޔާބަށް އެދޭ ކަމަށެވެ.

މަގާމުން ވަކިކުރުމާއި ވިދިގެން ޕިއުލިސް ބުނީ އޭނާ ކޯޗުކަމާއި ހަވާލުވީ ރަނގަޅު ސްކޮޑެއް ބިނާކޮށް ކްލަބަށް ރަނގަޅު ނަތީޖާތަކެއް ހޯދައިދީ ކްލަބުގެ މާލީ ހާލަތު ރަނގަޅުކޮށްދިނުމަށް ކަމަށެވެ. އެގޮތުން އެ އަމާޒުގެ ބޮޑު ބައެއް ހާސިލްވެފައިވާ ކަމަށާއި އެ ކަމުގައި އިސް ދައުރެއް އަދާކުރެވުމަކީ އޭނާ ވަރަށް އުފާވާ ކަމެއް ކަމަށް ވެސް ޕިއުލިސް ބުނެފައިވެއެވެ. ޕިއުލިސް ވަނީ ކްލަބްގެ މެނޭޖްމަންޓަށާއި އޭނާގެ އިރުޝާދުގެ ދަށުން ކުޅުނު ކުޅުންތެރިންނަށް ޝުކުރު އަދާކޮށްފައެވެ.

ބެލެވޭ ގޮތުގައި ޕިއުލިސް ދެން ހަވާލުވާނީ ހުސްވެފައިވާ ވޭލްސްގެ ގައުމީ ޓިމުގެ ކޯޗުގެ މާގާމާއިއެވެ. ވެސްޓް ބްރޮމްއިން އަންނަނީ 2011 ވަނަ އަހަރުގެ ފަހުން އެ ޓީމުގެ ކޯޗުކަމާއި ހަވާލުވާނެ ހަވަނަ ކޯޗެއް ހޯދަމުންނެވެ.

ޕިއުލިސް ވެގެން ގޮސްފައިވަނީ މި ސީޒަނުގައި ޕްރިމިއާ ލީގުގެ ކްލަބަކުން ވަކިކުރި ފަސް ވަނަ ކޯޗަށެވެ. އެގޮތުން ކްރިސްޓަލް ޕެލަސްގެ ކޯޗުގެ ގޮތުގައިހުރި ފްރޭންކް ޑެބޯ އާއި ލެސްޓާ ސިޓީގެ ކޯޗު ކްރެއިގް ޝޭކްސްޕިއާ އާއި އެވަޓަންގެ ކޯޗު ރޮނާލްޑް ކޯމަންގެ އިތުރުން ވެސްޓް ހާމްގެ ކޯޗުގެ ގޮތުގައި ހުރި ސްލެވެން ބިލިޗް ވެސް ވަނީ މި ސީޒަނުގެ ތެރޭގައި އެ މަގާމުތަކުން ވަކިކޮށްފައެވެ.

ޕިއުލިސްގެ އިރުޝާދުގެ ދަށުން ވެސްޓް ބްރޮމް ކުޅުނު 121 މެޗުގެ ތެރެއިން އެ ޓީމު މޮޅުވެފައިވަނީ 36 މެޗުންނެވެ. ބާކީ 36 މެޗުން އެއްވަރުވިއިރު 49 މެޗަކުން ވަނީ ބަލިވެފައެވެ.