ބިޝާމުގެ ކާރުކޮޅު ރޯކޮށްލިތާ މަހަކަށް ވުރެ ގިނަ ދުވަސް، އަދިވެސް މީހަކު ހައްޔަރެއް ނުކުރޭ!
20 ނޮވެމްބަރު 2017 | ހޯމަ 04:14ޕީޖީގެ ކާރުކޮޅު ރޯކޮށްލާފައިވަނީ އޮކްޓޯބަރު 8 ވަނަ ދުވަހުގެ ރޭ
ޕްރޮސެކިއުޓަރ ޖެނެރަލް ބިޝާމުގެ ކާރުކޮޅު ރޯކޮށްލާފައިވަނީ ދަންވަރު ގަޑީގައި ޕާކުކޮށްފައި އޮއްވައި
ޕްރޮސެކިއުޓަރ ޖެނެރަލް އާއިޝަތު ބިޝާމުގެ ކާރުކޮޅުގައި އަލިފާން ރޯކޮށްލިތާ މަހަކަށް ވުރެ ގިނަ ދުވަސްވީއިރުވެސް، މައްސަލައާ ގުޅިގެން މީހަކު ހައްޔަރުކުރެވިފައިނުވާ ކަމަށް ފުލުހުން ބުނެފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ ބިޝާމުގެ ކާރުކޮޅު ރޯކޮށްލި މައްސަލަ މިހާރުވެސް ތަހުގީގު ކުރަމުންދާ ކަމަށާއި، އެހެން ނަމަވެސް، މައްސަލައާ ގުޅިގެން މިހާތަނަށް މީހަކު ހައްޔަރު ކުރެވިފައިނުވާ ކަމަށެވެ.
ޖަނަވަރީ މަގުގައި ޕާކުކޮށްފައި އޮއްވައި، ބިޝާމުގެ ކާރުކޮޅުގައި ރޯކޮށްލީ އޮކްޓޯބަރު އަށް ވަނަ ދުވަހުގެ މެންދަމު އެވެ. އަލިފާން ރޯކުރުމުގެ ސަބަބުން އިތުރަށް ބޭނުން ނުކުރެވޭ ވަރަށް ކާރު ވަނީ އަނދާފަ އެވެ.
އެ މައްސަލަ ސީރިއަސް މައްސަލައެއްގެ ގޮތުގައި ބެލުމަށް ފުލުހުންގެ ހާއްސަ ޓީމެއް އެކުލަވާލި އެވެ.
އޮކްޓޯބަރު ނުވަ ވަނަ ދުވަހު ފުލުހުން ނެރުނު ބަޔާނެއްގައިވާ ގޮތުގައި، ޕްރޮސެކިއުޓަރ ޖެނެރަލް އަކީ ޖިނާއީ އަދުލުގެ ނިޒާމުގައި ހިމެނޭ އެންމެ މުހިއްމު އެއް ފަރާތަށްވާއިރު އެކަމަނާގެ ކާރު ކޮޅުގައި ރޯކޮށްލުމަކީ، ޖިނާއީ އަދުލުގެ ނިޒާމު ބަލި ކަށި ކުރުމަށް ދިން ހަމަލާއެކެވެ.
އެ ހަމަލާއަކީ ޖިނާއީ އަދުލުގެ ނިޒާމާއި މެދު ރައްޔިތުންގެ މެދުގައި ނުރަނގަޅު، ތަސައްވުރެއް އުފެއްދުމަށްޓަކައި ކުރިމަތި ކުރުވި ނުރައްކާތެރި ހަމަލާއެއް ކަމަށް ވެސް ފުލުހުންގެ ބުނެފައިވެއެވެ.
މީގެ އިތުރުން، އެ އަމަލު ހިންގުމުގައި ބައިވެރިވި ފަރާތްތައް ހޯދައި، އެފަރާތްތަކުގެ މައްޗަށް ހިންގަންޖެހޭ ތަހުގީގުތައް ހިންގައި، ޝަރީއަތަށް ހުށަހަޅާނެކަމުގެ ޔަގީންކަން ރައްޔިތުންނަށް ދޭ ކަމަށް ވެސް ފުލުހުން ބުނެފައިވެ އެވެ.
