މެންބަރުން ވޯޓުދޭ ގޮތަށް ނުފޫޒު ފޯރުވާ ވަޒީރުންގެ މައްސަލަ ތަހުގީގުކުރަން ޖެހޭ:ޝިދާތާ

ރައްޔިތުންގެ މަޖިލީހުގެ މެންބަރުން ދެއްވާ ވޯޓަށް ނުފޫޒު ފޯރުވަން ވަޒީރުން ދައްކަވާ ވާހަކަތައް ތަހުގީގްކޮށް ފިޔަވަޅު އަޅަންޖެހޭ ކަމަށް އަދާލަތު ޕާޓީގެ ފޮރިން ރިލޭޝަންސް ކޮމެޓީގެ މުގައްރިރު ޝިދާތާ ޝަރީފް ވިދާޅުވެއްޖެއެވެ.

ބަޖެޓަށް ވޯޓު ނުދެއްވާ މެންބަރުންގެ ދާއިރާތަކުގައި މަޝްރޫއުތައް ހިންގަން ދަތިވާނެ ކަމަށް ފިނޭންސް މިނިސްޓަރު އަހުމަދު މުނައްވަރު ވިދާޅުވުމާ ގުޅިގެން ޝިދާތާ ކުރެއްވި ޓްވީޓެއްގައި ވިދާޅުވީ މެމްބަރުން ވޯޓް ދެއްވާ ގޮތަށް ބާރު ފޯރުވުމަށް ވަޒީރުން ދައްކަވާ ހޮޅި ވާހަކަ ތަހުގީގުކޮށް ފިޔަވަޅު އަޅަން ޖެހޭނެ ކަމުގައެވެ. ބަޖެޓަށް ވޯޓް ނުދޭ މެމްބަރުންގެ ދާއިރާތަކަށް ދައުލަތުން ހަރަދުކުރުން ހުއްޓާލާނަމަ، އެ ދާއިރާތަކުގެ ރައްޔިތުން އަތުން ޓެކްސް ނެގުންވެސް ހުއްޓާލަން ވާނެކަމަށް ޝިދާތާ ވިދާޅުވިއެވެ.

މީގެ އިތުރުން ޤާނޫނު އަސާސީގައި ބުނެފައިވާ އުސޫލުތަކުގެ ބޭރުން ހުށައަޅައި ފާސްކުރާ ބަޖެޓަކީ ޣައިރު ޤާނޫނީ ނަހަލާލު ބަޖެޓެއް ކަމަށްވެސް ޝިދާތާ ވިދާޅުވިއެވެ.

ޝިދާތާގެ އިތުރުން ގިނަ ބަޔަކު ދަނީ ފިނޭންސް މިނިސްޓަރުގެ އެވާހަކަފުޅާ ގުޅިގެން ވަރަށް ބޮޑަށް އެމަނިކުފާނަށް ފާޑު ކިޔަމުންނެވެ.

ބަޖެޓް ކޮމިޓީގައި ފިނޭންސް މިނިސްޓަރު ވިދާޅުވީ ބަޖެޓަށް ވޯޓް ދެއްވުމަކީ ކޮންމެހެން ކުރައްވަންޖެހޭ ކަމެއް ކަމަށާއި އެހެންކަމުން ބަޖެޓަށް ވޯޓް ނުދެއްވާ މެމްބަރުން ނިސްބަތްވާ ދާއިރާތަކަށް ޕްރޮޖެކްޓް ނުހިންގޭނެ ކަމަށެވެ. އަދި އިދިކޮޅު ފަރާތްތަކުގެ މެމްބަރުންގެ ތެރެއިން ބަޖެޓަށް ވޯޓް ދެއްވާ މެމްބަރުން ނިސްބަތްވާ ދާއިރާތަކަށް ޕްރޮޖެކްޓްތައް ހިންގަވާނެ ކަމަށް ވެސް މިނިސްޓަރު ވިދާޅުވި އެވެ.