ރައީސް ޔާމީން މިރޭ ކުރެއްވީ ރައްޔިތުންނާ ޗެލެންޖް، އެއީ ޑިކްޓޭޓަރުންގެ ސިފައެއް: އަސްލަމް
17 ނޮވެމްބަރު 2017 | ހުކުރު 19:18ރައީސް ޔާމީންގެ ވާހަކަފުޅުގައި ކުރީގެ ވެރިންނަށް ކުރީ މަލާމާތްކަމަށް ވިދާޅުވި
ރައީސް ނަޝީދުގެ ސަރުކާރުގެ ހައުސިން މިނިސްޓަރު މުހައްމަދު އަސްލަމް
ރައީސް އަބްދުﷲ ޔާމީން ކުރެއްވީ ރައްޔިތުންނާ ޗެލެންޖްކަމަށާއި އެއީ ޑިކްޓޭޓަރުންގެ ސިފައެއް ކަމަށް ރައީސް މުހައްމަދު ނަޝީދުގެ ސަރުކާރުގެ ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ރައީސް ޔާމީންގެ ސަރުކާރަށް ހަތަރު އަހަރު ފުރުމާ ގުޅިގެން ރާއްޖެޓީވީން ގެނެސްދިން ޚާއްސަ ކަވަރޭޖްގައި ވާހަކަ ދައްކަވަމުން އަސްލަމް ވިދާޅުވީ ރައްޔިތުންނަށް ކޮށްދެއްވި ކަންކަން ކަމަށް ވިދާޅުވެ ރައީސް ޔާމީންގެ ވާހަކަފުޅުގައި ވަނީ ވަރަށްބޮޑަށް އޮޅުވާލައި އިތުރުފުޅު ހައްދަވާފައިކަމަށެވެ. ރައްޔިތުން ގާތު އެމަނިކުފާނު އަދިވެސް އިމްތިހާނުކުރައްވަނީތޯ އެއްސެވުމަކީ ވަރަށްވެސް ހުތުރުކަންބޮޑު ވާހަކަފުޅެއްކަމަށް އަސްލަމް ފާހަގަ ކުރެއްވެވި އެވެ.
ކުރީގެ ލީޑަރުންނާއި ގުޅޭ ގޮތުން ރައީސް ޔާމީން ދެެއްކެވި ވާހަކަފުޅުތަކަށް ރައްދުދެއްވަމުން އަސްލަމް ވިދާޅުވީ ރައީސް ޔާމީންގެ ވާހަކަފުޅުގައި ކުރީގެ ވެރިންނަށް ކުރީ މަލާމާތްކަމަށެވެ. އަދި އެއީ ވެރިއެއްގެ ސިފަ ނޫން ކަމަށާއި، ވެރިންގެ ސިފައަކީ ކުރީގެ ވެރިންނަށް އިހްތިރާމް އަދާކުރެއްވުންކަމަށެވެ.
"މި ސަރުކާރަށް ހަތަރު އަހަރުފުރި ކޮށްދެވުނު ކަންކަން ކަމަށް ވިދާޅުވެ ދެއްކީ ދޮގުވެރި ވާހަކަތައް. ދޫ އޮވެ، ދުލުގައި ކަށިނެތީމައި ބޭނުންހާ ވާހަކައެއް ދައްކަންވީ، އެކަމަކު އެމަނިކުފަނު ދެއްކެވީ ހުސް ބުހުތާނު ދޮގު،" އަސްލަމް ވިދާޅުވިއެވެ.
އަސްލަމް ވިދާޅުވި ގޮތުގައި ކުރިއަށް އަށެއްކަ މަސްތެރޭގައި ވަރަށް ގިނަ ކަންކަންކޮށް ދެއްވުމަށް ވައުދުވެވަޑައިގަންނަަވާނެ ކަމަށެވެ. އުޑުން ތަރިވެސް ބާލައިދޭނެ ކަމަށް އެމަނިކުފާނު ވައުދުވެވަޑައިގަންނަވާނެ ކަމަށް އަސްލަމް ވިދާޅުވިއެވެ. އެއީ ކޮށްދެއްވަން ވައުދުވާ ކަންކަން ނޫން ކަމަށާއި، އެއީ ވެރިކަމުގެ އަނެއް ދައުރު ކައިރިވަމުންދާތީވެ ދެއްކެވި ހޮޅި ވާހަކަތައް ކަމަށް އޭނާ ވިދާޅުވި އެވެ.
މި ސަރުކާރުގެ ބޯހިޔާވަހިކަމުގެ ވައުދަށް އަލިއަޅުއްވާލައްވަމުން އަސްލަމް ވިދާޅުވީ މި ސަރުކާރުން އަލަށް އަޅަންފެށި އެއްވެސް ފްލެޓެއް އަދި ބޯ ހިޔާވަހިކަމުގެ އެއްވެސް ވައުދެއް ނޯންނާނެ ކަމަށެވެ. މިހާރު ދޫކުރާ ފްލެޓްތަކަކީ ހަމައެކަނި ރިބަންފަށް ކެނޑުން ކަމަށް އަސްލަމް ސިފަކުރެއްވިއެވެ. އަސްލަމް ވިދާޅުވީ، ބޯހިޔާވަހިކަމުގެ ވައުދުވެ، މިސަރުކާރުން އެޅި އެއްވެސް ފްލެޓެއް ނޯންނާނޭކަމަށެވެ. އެކަމަކު، ވެރިކަން ނިމެން ކައިރިވަމުންދާ ވަރަކަށް އެކަމުގައިވެސް ރައްޔިތުންނަށް ހުވަފެންތަކެއް ދައްކާނެކަމަށް ވެސް އޭނާ ވިދާޅުވިއެވެ.
