ބަޖެޓުގައި ރައްޔިތުންނަށް ހަމަހަމަ ފުރުސަތުތަކެއް ނެތް: އިދިކޮޅު މެމްބަރުން

ދައުލަތުގެ 2018 ވަނަ އަހަރުގެ ބަޖެޓްގައި ބޮޑެތި ކަންބޮޑުވުންތަކެއް އެބަހުރި ކަމަށާއި ބަޖެޓްގައި ހިމެނޭ މަޝްރޫއުތައް ހުރިހާ އަތޮޅުތަކަށް އިންސާފުން ބެހިފައިނުވާ ކަމަށް ގުޅިފައިވާ ސިޔާސީ ޕާޓީތަކުގެ މެންބަރުން ވިދާޅުވެއްޖެ އެވެ.

މ.ކުނޫޒްގައި ބޭއްވި "ބަޖެޓް ބަހުސް"ގައި ކެންދޫ ދައިރާގެ މެންބަރު އަލީ ހުސައިން ވިދާޅުވީ ބަޖެޓުގައި ރާއްޖޭގެ އުފެއްދުންތެރިކަން އިތުުރު ކުރުމަށް އިސްކަން ދީފައިވާ މަންޒަރު ނުފެންނަ ކަމަށެވެ. އެގޮތުން، ގެސްޓް ހައުސް ވިޔަފާރި ކުރިއަރަމުން ދިޔަ ނަމަވެސް ގެސްޓް ހައުސް ޕްރޮމޯޓް ކުރުމަށް ފައިސާ ހިމަނާފައި ނުވާ ކަމަށް އޭނާ ވިދާޅުވި އެވެ.

ސްކޫލްތައް ޑިޖިޓަލްކޮށް، އަންނަ އަހަރު ހުރިހާ ދަރިވަރުންނަށް ޓެބްލެޓް ދިނުމަށް ސަރުކާރުން ރާވާފައިވާއިރު، ރާއްޖޭގެ ބައެއް ސްކޫލްތަކުގެ ހާލަތު ހުރީ ވަރަށް ދަށު ދަރަޖައެއްގައި ކަމަށާއި ބައެއް ސްކޫލްތަކުގައި އެކަށީގެންވާ ވަސީލަތްތައް ނެތް ކަމަށް އޭނާ ފާހަގަ ކުރެއްވެވި އެވެ.

"އެންމެ ފަހުގެ ޓެކްނޮލޮޖީ ތައުލީމީ ދާއިރާގައި ބޭނުން ކުރުމަކީ ދެކޮޅު ހަދާކަމެއް ނޫން. އެހެން ނަމަވެސް މިކަންތައްތަކަކީ ވަރަށް ވިސްނަން ޖެހޭނެ ކަންތައްތައް. ދުނިޔޭގެ އެންމެ މޮޅެތި ޓެކްނޮލިޖީތައް ވުޖޫދަށް ގެނެސްފައިވާ ސްޓީވް ޖޮބްސް އާއި ބިލްގޭޓް ފަދަ ބޭފުޅުންވެސް ބުނެފައިވޭ، އުމުރުން ދެ އަހަރުން ދަށުގެ ކުދިން ފޯނު ނުވަތަ ޓެބްލެޓް ފަދަ ތަކެތި ބޭނުން ކުރުން ރަގަޅު ނޫން ވާހަކަ،" އަލީ ހުސައިން ވިދާޅުވި އެވެ.

އައްޑޫ ސިޓީ މަރަދޫ ދާއިރާގެ މެންބަރު އިބްރާހިމް ޝަރީފު ވިދާޅުވީ ރާއްޖޭގެ ހުރިހާ ރައްޔިތުންނަށް ހަމަހަމަ ފުރުސަތުތަކެއް ފޯރުކޮށްދިނުމަށްޓަކައި ޓެކްސްގެ ނިޒާމަށް ވެސް ބަދަލުތަކެއް ގެންނަން ޖެހޭނެ ކަމަށާއި އެންމެ ފަގީރު މީހާ އާއި އެންމެ މުއްސަދި މީހާގެ އަތުން އެއް ހަމައަކުން ޓެކްސް ނެގުމަކީ އިޖްތިމާއީ އަދާލަތު ގެއްލޭ ކަމެއް ކަމަށެވެ. އަންނަ އަހަރުގެ ބަޖެޓްގައި އައްޑޫ ސިޓީއަށް ބޭނުންވާ މުހިއްމު ކަންކަން ނުވާތީ ޝަރީފް ވަނީ ކަންބޮޑުވުން ފާޅުކުރައްވައިފަ އެވެ.

"ޓެކްސްގެ ނިޒާމުވެސް، ފިސްކަލް ޕޮލިސީ ވެސް އިގްތިސާދީ ނިޒާމުވެސް އަދި މަނިޓަރީ ޕޮލިސީ ވެސް ގާއިމް ކުރުމުގައި ކަންބޮޑުވާ ކަންތައްތަކެއް މިހާރުވެސް އެބަހުރި. މުއްސަދިން އަތުން ނެގޭ ޓެކްސް އިން އާދައިގެ ރައްޔިތުންގެ ދިރިއުޅުން ރަގަޅު ކުރުމަށް ކުރެވޭ މަސައްކަތް ކުޑަކަން މިއީ ވަރަށް ބޮޑަށް ރާއްޖެއިން ފެންނަމުންދާ މަންޒަރެއް،" އޭނާ ވިދާޅުވި އެވެ.