ނިއުކްލިއަ ހަމަލާ ދިނުމަށް ރައީސް ޓްރަމްޕްއަށް އޮންނަ އިޚްތިޔާރާ ބެހޭގޮތުން ސެނޭޓުން ސުވާލުކޮށްފި

ވޭތުވެ ދިޔަ 40 އަހަރުގެ ތެރޭގައި ފުރަތަމަ ފަހަރަށް އެމެރިކާގެ ރައީސަކު ކޮންގްރެސްއަށް ހާޒިރުކޮށް ނިއުކްލިއަރ ހަމަލާއެއް ދިނުމަށް އޮންނަ ހުއްދައާ ބެހޭގޮތުން ސުވާލުކޮށްފިއެވެ.

ސެނޭޓްގެ ޚާރިޖީ ގުޅުންތަކާ ބެހޭ ކޮމިޓީގެ އަޑުއެހުމަށް ދީފައިވާ ނަމަކީ "ނިއުކްލިއަރ ހަތިޔާރު ބޭނުންކުރުމަށް އަމުރު ކުރުމުގެ ހުއްދަ" އެވެ.

ސެނޭޓްގެ ބައެއް މެމްބަރުންވަނީ ރައީސް ޑޮނަލްޑް ޓްރަމްޕް އެ ބާރު ޒިންމާ ދާރުކަމެއްނެތި ބޭނުންކުރައްވަފާނެ ކަމުގެ ކަންބޮޑުވުން ފާޅުކުރައްވާފައެވެ. ނަމަވެސް ބައެއް މެމްބަރުންވަނީ ގާނޫނީ ވަކީލުން މެދުވެރިކުރުމެއް ނެތި އެ ބާރު ބޭނުންކުރެއްވުމުގެ އިޚްތިޔާރު އޮންނަންވާނެ ކަމަށް ވިދާޅުވެފައެވެ.

މި މައްސަލައިގައި އެންމެ ފަހުން ކޮންގްރެސްގައި ބަހުސްކޮށްފައިވަނީ 1976 ވަނަ އަހަރުގެ މާޗް މަހުއެވެ.

އޯގަސްޓް މަހު ރައީސް ޓްރަމްޕްވަނީ އުތުރު ކޮރެއާއިން އެޓޮމިކް ހަތިޔާރު އުފެއްދުން ކުރިޔަށް ގެންދާނަމަ ދުނިޔެ މީގެ ކުރިން ދެކެފައި ނުވާފަދަ ވަރުގަދަ ހަމަލާއެއް ދެއްވާނެ ކަމަށް ވައުދުވެ ވަޑައިގެންފައެވެ.

ރިޕަބްލިކަން ޕާޓީއަށް ނިސްބަތްވެ ވަޑައިގަންނަވާ،ސެނޭޓް ކޮމިޓީގެ ޗެއަރމަން ސެނޭޓަރ ބޮބް ކޯކަރ މިދިޔަ މަހުވަނީ ރައީސް ޓްރަމްޕް އެ ގައުމު ތިންވަނަ ބޮޑުހަނގުރާމައެއްގެ މަގަށް ވައްޓާލާކަމަށް ތުހުމަތު ކުރައްވާފައެވެ.