ޓެއިލާ ސްވިފްޓުގެ "ރެޕިއުޓޭޝަން": ފުރަތަމަ ދުވަހު ހަތްލައްކަ ކޮޕީސް ވިކިއްޖެ

މަޝްހޫރު ލަވަކިޔުންތެރިޔާ ޓެއިލާ ސްވިފްޓުގެ ހަވަނަ ލަވަ އަލްބަމް "ރެޕިއުޓޭޝަން" ނެރުނުތާ 24 ގަޑިއިރު ތެރޭގައި 700،000 ކޮޕީ ވިކިއްޖެއެވެ.

އެމެރިކާގެ ނީލްސެން މިއުޒިކްގެ ސޭލްސް ރިޕޯޓްތަކުން ދައްކާގޮތުގައި އެމެރިކާގައި ޓެއިލާގެ ލަވަ އަލްބަމް ރިލީޒް ކުރިތަނުން ވަނީ 700،000 ކޮޕީސް ވިކިފައެވެ.މި ލަވަ އަލްބަމް ރިލީޒް ކުރިތާ 24 ގަޑިއިރުގެ ތެރޭގައި ވަނީ އޮންލައިންކޮށް އަލްބަމް ލީކު ކޮށްލާފައެވެ.

"ރެޕިއުޓޭޝަން" ރިލީޒްކޮށްފައިވަނީ ނޮވެމްބަރު މަހުގެ 10 ވަނަ ދުވަހުގައެވެ.

ފުރަތަމަ ދުވަހު އަލްބަމުގެ ސޭލްސް ރަނގަޅުވުމުން މި ހަފްތާ ނިމޭއިރު އެއް މިލިއަނަށް ވުރެ ގިނަ ކޮޕީ ވިކޭނެ ކަމަށް ވަނީ ބެލެވިފައެވެ. އެންމެ ފަހުން ޓެއިލާ ސްވިފްޓުގެ އަލްބަމެއް ނެރެފައިވަނީ 2014 ވަނަ އަހަރުގައެވެ. އެ އަލްބަމަށް ފުރަތަމަ ހަފްތާ ވީ އިރު 1.29 މިލިއަން ކޮޕީސް ވަނީ ވިކިފައެވެ.

މި ލަވަ އަލްބަމް ޕްރޮޑިއުސް ކޮށްފައިވަނީ ޓެއިލާގެ އިތުރުން ޖެކް އެންޓޮނޮފް، މެކްސް މާޓިންއަދި ޝެލްބެކްއެވެ. މުޅިއެކު 15 ލަވަ ހިމެނޭ މި ލަވަ އަލްބަމުގެ ޑިއުރޭޝަން އަކީ 58.33 މިނެޓެވެ.