ގަތަރުގެ ޝޫރާ ކައުންސިލަށް ހަތަރު އަންހެން ބޭފުޅުން އައްޔަން ކުރައްވައިފި
9 ނޮވެމްބަރު 2017 | ބުރާސްފަތި 18:36ޝޫރާ ކައުންސިލަށްވަނީ 28 މެމްބަރަކު އައްޔަން ކުރައްވާފަ
ޝޫރާ ކައުންސިލްގެ ބައްދަލުވުމެއްގައި މެމްބަރުން އިށީނދެވަޑައިގެން
ގަތަރުގެ ސަރުކާރަށް ލަފާއަރުވާ އެންމެ މުހިއްމު ގުނަން ކަމަށްވާ ޝޫރާ ކައުންސިލަށް ހަތަރު އަންހެން ކަނބަލުންނާއެކު 28 އާ މެމްބަރަކު އައްޔަން ކުރައްވައިފިއެވެ.
މިއީ 45 މެމްބަރުން ހިމެނިވަޑައިގަންނަވާ ކައުންސިލަށް އަންހެން ބޭފުޅުން އައްޔަނުކުރެވުނު ފުރަތަ ފަހަރެވެ.
މި ކައުންސިލްގެ ޒިންމާއަކީ ކެބިނެޓުން ފާސްކޮށް ފޮނުވާ ގާނޫނުތަކުގެ ޑްރާފްޓާމެދު މަޝްވަރާކޮށް އަދި ސަރުކާރުގެ އާއްމު ސިޔާސަތުތަކާ ދައުލަތުގެ ބަޖެޓާމެދު މަޝްވަރާކުރުމެވެ.
ކައުންސިލަށް އައްޔަން ކުރައްވާފައިވާ އަންހެން ބޭފުޅުންނަކީ ހިންދު އަބްދުރަހްމާން އަލް-މުފްތާހް،ހިއްސާ ސުލްތާން އަލް-ޖާބިރް،ރީމް އަލް-މަންސޫރި އަދި އާއިޝާ ޔޫސުފް އަލް-މައްނާއި އެވެ.
ޤަތަރުގެ މި ނިންމުން އައިސްފައި މިވަނީ ސައުދީ އަރަބިއްޔާއާއި، މިސްރާއި، ޔުނައިޓެޑް އަރަބް އެމިރޭޓްސް(ޔޫއޭއީ) އަދި ބަހްރެއިނުން ގަތަރާ ގުޅުން ކަނޑާލައި ދަތިކުރުމުގެ ފިޔަވަޅު އަޅާފައި އޮންނަތާ ފަސް މަސް ވެފައި ވަނިކޮށެވެ.
ގަތަރުގެ މައްސަލަ ފެށުނު ފަހުން އެ ގައުމުން ވަނީ އިޖްތިމާއީ ސިޔާސަތުތަކަށް ފާހަގަކޮށްލެވޭ ބޮޑެތި ބަދަލުތައް ގެނެސްފައެވެ. އޭގެ ތެރޭގައި ރަށްވެހިކަމުގެ ގާނޫނާއި ދެ މިލިއަނަށް ވުރެ ގިނަ ބިދޭސީ މަސައްކަތްތެރިންގެ ހައްގުތައް ރައްކާތެރިކުރުމަށްޓަކައި މަސައްކަތްތެރިންގެ ގާނޫނަށް ގެނެވުނު ބަދަލު ހިމެނެއެވެ.
ޝޫރާ ކަންސިލަށް ހަތަރު މެމްބަރުން އައްޔަން ކުރެވުނު ނަމަވެސް މިއީ އެގައުމުގެ ސިޔާސީ މައިދާނަށް އަންހެނުން ނުކުތް ފުރަތަ ފަހަރެއް ނޫނެވެ.
