ލައިބީރިއާގެ ރިޔާސީ އިންތިޚާބުގެ ދެ ވަނަ ބުރުގެ ވޯޓުލުން ފަސް ކުރުމަށް އެ ގައުމުގެ ސުޕްރީމް ކޯޓުން އަމުރުކޮށްފި އެވެ.

ރިޔާސީ އިންތިޚާބުގެ ދެ ވަނަ ބުރުގެ ވޯޓުލުން ފެށުމަށް އެއް ދުވަހަށް ވެފައިވަނިކޮށް، ލައިބީރިއާގެ ސުޕްރީމް ކޯޓުން ހޯމަ ދުވަހު ވަނީ، އިންތިޚާބުގެ ފުރަތަމަ ބުރުގައި ވޯޓަށް މަކަރު ހެދުމާއި، ގަވާއިދުގެ ބޭރުން ކަންކަން ހިންގާފައިވާ ކަމަށް ބުނެ އިދިކޮޅު ލިބަޓީ ޕާޓީން ހުށަހަޅާފައިވާ ޝަކުވާ އަށް ޤާނޫނީ ގޮތުން ގޮތެއް ނިންމަންދެން އިންތިޚާބު ފަސް ކުރުމަށް ނެޝަނަލް އިލެކްޝަންސް ކޮމިޝަނަށް އަމުރުކޮށްފަ އެވެ.

ސުޕްރީމް ކޯޓުގެ ހުކުމުގައި، އިދިކޮޅު ޕާޓީން ހުށަހަޅާފައިވާ ވޯޓަށް މަކަރު ހެދުމުގެ ޝަކުވާއާމެދު ގޮތެއް ނިންމުމަށް ނެޝަނަލް އިލެކްޝަންސް ކޮމިޝަނަށް ވަނީ އަމުރު ކޮށްފައެވެ.

އޮކްޓޯބަރު މަހުގެ ކުރީކޮޅު ބޭއްވި ލައިބީރިއާގެ ރިޔާސީ އިންތިޚާބުގެ ފުރަތަމަ ބުރުގައި ކުރި ހޯއްދަވައި، ދެވަނަ ބުރުގައި ވާދަ ކުރައްވާ ދެ ކެންޑިޑޭޓުންނަކީ ނައިބު ރައީސް ޖޯސެފް ބޯކާއި އަދި ކުރީގެ ބައިނަލްއަޤްވާމީ ފުޓްބޯޅަ ކުޅުންތެރިޔާ ޖޯޖް ވިއާ އެވެ.

އިންތިޚާބުގެ ފުރަތަމަ ބުރުން މި ދެ ކެންޑިޑޭޓުން ކުރި ހޯއްދެވި ނަމަވެސް، ފުރަތަމަ ބުރުން އިންތިޚާބު ކާމިޔާބު ކުރުމަށް ބޭނުންވާ 50 އިންސައްތަ ވޯޓު އެއްވެސް ބޭފުޅަކަށް ލިބިވަޑައިގެންފައެއްނުވެއެވެ.

މި ދެ ކެންޑިޑޭޓުންގެ މެދުގައި ބޭއްވުމަށް ހަމަޖެހިފައިވާ އިންތިޚާބުގެ ދެވަނަ ބުރުގެ ވޯޓުލުން ފުރަތަމަ ތާވަލް ކުރީ ނޮވެމްބަރު މަހުގެ 7 ވަނަ ދުވަހަށެވެ.

ލައިބީރިއާގެ ޤާނޫނު އަސާސީ ބުނާ ގޮތުން، އެގައުމުގައި އެކަކަށް ވެރިކަން ކުރެވޭނީ ގިނަވެގެން ހަ އަހަރުގެ ދެ ދައުރެވެ. ފާއިތުވި 12 އަހަރު ވެރިކަމުގައި ހުންނެވި އެލެން ޖޯންސަން ސިރްލީފް، ވެރިކަމުގެ ދެ ދައުރު ފުރިހަމަކޮށްފައި ވާތީ އެކަމަނާ އަށް އިންތިޚާބަށް ނިކުމެވަޑައިގަތުމުގެ ފުރުޞަތެއް ނެތެވެ.

ލައިބީރިއާގެ މި އިންތިޚާބު ވެގެންދާނީ 1944 ވަނަ އަހަރުގެ ފަހުން ޑިމޮކްރަސީގެ ހަމަތަކުގެ މަތިން އިންތިޚާބުވެފައިވާ އެއް ވެރިޔަކު، އިންތިޚާބުވެފައިވާ އެހެން ވެރިޔަކަށް ވެރިކަން ބަދަލުވާ ފުރަތަމަ ފަހަރަށެވެ.

އިންތިޚާބުގެ ފުރަތަމަ ބުރުގައި ޖުމްލަ 20 ކެންޑިޑޭޓެއް ރިޔާސީ ރޭހުގައި ވާދަކުރެއްވިއިރު، އެފަރާތްތަކުގެ ތެރޭގައި ލިބަޓީ ޕާޓީގެ ޗާލްސް ބްރަމްސްކައިން ހިމެނެއެވެ. އިންތިޚާބުގެ ފުރަތަމަ ބުރުގައި އޭނާ އަށް ތިން ވަނަ ލިބިވަޑައިގެންނެވިއިރު، އިންތިޚާބާ ގުޅޭ ޝަކުވާތައް ހުށަހަޅާފައިވަނީ ލިބަޓީ ޕާޓީންނެވެ.

އިންތިޚާބާ ގުޅޭ ގޮތުން ހުށަހަޅާފައިވާ މައްސަލަތައް ތަހުގީގުކޮށް ނިންމުމަށް، ނޮވެމްބަރު މަހުގެ 22 ވަނަ ދުވަހާ ހަމައަށް ނެޝަނަލް އިލެކްޝަންސް ކޮމިޝަނަށް ފުރުޞަތު ލިބޭނެ އެވެ.